An Panahon na Hanapon an Dios
AN ILUSTRASYON sa pahinang ini sa Acropolis sa Atenas, na kaidto sentro nin pagsamba sa dakol na dios asin diosa. Sa ibaba kan Acropolis an Areopago, na sinasabing namumugtakan nin sarong husgado kan suanoy na mga panahon. Sa lugar na ini, kaidtong haros 2,000 na taon na an nakaagi, na si apostol Pablo tuminindog asin nagtao nin pambihira nanggad na diskurso. Uya an iba sa sinabi nia:
“Ginibo [nin Dios] hale sa sarong tawo an gabos na nasyon kan mga tawo, tanganing mag-erok sa bilog na daga, asin saiyang ibinugtak an itinalaan na mga panahon asin an mga kasagkodan kan erokan nin mga tawo, tanganing hanapon ninda an Dios, ta tibaad pa kapkapon sia ninda asin talagang makua sia ninda, minsan ngani, sa katunayan, sia bakong harayo sa lambang saro sa sato. Huli ta paagi sa saiya kita igwa nin buhay asin naghihiro asin nagdadanay.”—Gibo 17:26-28.
Laen kutanang marhay an kasaysayan kun an kadaklan sa katawohan naghimate sa mga tataramon ni Pablo! Pirang guerra, pirang kasakitan, an nalikayan kutana kun minidbid nin mga tawo an saro sana nindang interes bilang gikan kan sarong tawo na linalang kan Soberanong Kagurangnan, si Jehova.
Ngonyan, an katawohan baranga huli sa nasyonalismo, pagpalaenlaen, pagkaongis sa ibang rasa, asin sosyal na mga inhustisya. Pero, sagkod ngonyan aplikado pa an mga tataramon ni Pablo. Kita gabos gikan kan sarong tawong iyan na linalang nin Dios. Sa sentidong iyan kita gabos magturugang. Asin bako pang huri na hanapon an Dios mantang puwede pa siang makua.
Orog pang nagigin seryoso an mga tataramon ni Pablo kun kokonsideraron niato an ultimong mga tataramon kan saiyang diskurso. Sia nagsabi: “[An Dios] nagtalaan nin aldaw na katuyohan niang hokoman an ineerokan na daga sa katanosan paagi sa sarong lalaki na saiyang ninombrahan, asin sia nagtao nin garantiya sa gabos na tawo na binuhay nia sia liwat hale sa mga gadan.”
An pagkabuhay liwat ni Jesus sarong katotoohan sa kasaysayan, asin arog kan ipinaheheling ni Pablo, iyan garantiya na magkakaigwa nin aldaw nin paghokom sa katawohan. Noarin? Bueno, aram niato na iyan haros 2,000 na taon na mas harani kisa kan si Pablo tumindog sa Areopago asin isinabi an mga tataramon na ini. An totoo, ipinaririsa kan kaotoban nin hula sa Biblia na iyan haranihon na. Iyan nakapagpapapensar na bagay! Apretado nanggad na hanapon niato an Dios na may lubos na sinseridad, ta, arog kan sinabi ni Pablo sa mga taga-Atenas, “ngonyan sinasabihan nia an katawohan na sinda gabos saen man na lugar magsorolsol”!—Gibo 17:30, 31.