Kapahayagan—An Mamuraway na Kulminasyon Kaiyan Harani Na
Kapitulo 3: Mga Bagay na Kaipuhan na Mangyari sa Dai Na Mahahaloy
1. Paano kamo puwedeng makadulag sa paghokom nin Dios sa kinaban na ini?
Maninigo nindong tawan nin atension an mga nangyayari sa kinaban ngonyan. Taano man? Huli ta an kinaban na ini dai makadudulag sa paghokom nin Dios. Alagad kamo puwedeng makadulag. Magigibo nindo ini paagi sa paggibo kan saindong sadiri na “bakong kabtang kan kinaban” na nakatalagang malaglag. Dai ini nangangahulogan nin pagkaigwa nin simpleng-simple, garo sa monasteryong pamumuhay. Iyan nangangahulogan na mantang may marahay, makahulogan na buhay, isinisiblag nindo an saindong sadiri sa politikal na karatan, sa paslong komersialismo, asin sa relihiyon na naglalanghad sa Dios, saka sa madahas asin inmoral na gawe. Kadungan kaiyan, kaipuhan na kuyogon nindo an halangkaw na pamantayan nin Dios sa paggawe asin maghingoa na otobon an saiyang kabotan. (Juan 17:14-16; Sofonias 2:2, 3; Kapahayagan 21:8) Ipinaheheling kan libro sa Biblia na Kapahayagan kun gurano kahalaga na kamo maghingoa sa mga bagay na ini, na ginigibo an kinakaipuhan na mga pagbakle sa saindong pamumuhay.
2. Paano iiniintrodusir ni apostol Juan an makangangalas na hula sa Kapahayagan, asin kiisay itinao nin Dios an magabat na mensaheng ini?
2 Iiniintrodusir ni apostol Juan an makangangalas na hulang ini paagi sa mga tataramon na: “Sarong kapahayagan ni Jesu-Cristo, na itinao sa saiya nin Dios, tanganing ipaheling sa saiyang mga oripon an mga bagay na kaipuhan na mangyari sa dai na mahahaloy.” (Kapahayagan 1:1a) Kaya an binuhay liwat na si Jesu-Cristo iyo an nag-ako kan magabat na mensaheng ini hale sa Dios. Imbes na kabtang nin sarong mistikong Trinidad, si Jesus ipinaheheling digdi na sakop kan saiyang Ama. Sa kaparehong paagi, an “mga oripon” na minabilog sa Kristianong kongregasyon sakop ni Jesu-Cristo, kaya sinda ‘nagsusunod sa saiya minsan sia magsaen.’ (Kapahayagan 14:4; Efeso 5:24) Alagad siisay ngonyan an talagang “mga oripon” nin Dios, asin paano sinda nakikinabang sa Kapahayagan?
3. (a) Sairisay an “mga oripon” na sakop ni Jesu-Cristo? (b) Anong gibohon an ginigibo kan maimbod na “mga oripon” sa irarom kan paggiya nin mga anghel?
3 Si apostol Juan, na nagsurat kan Kapahayagan, inaapod an saiyang sadiri na siring na oripon. Sia an ultimong natatada sa mga apostol asin saro sa piniling linahidan nin espiritung grupo nin “mga oripon” na magmamana nin inmortal na buhay sa kalangitan. Ngonyan, pipira na sanang ribo an natatada kaini digdi sa daga. An Dios igwa man nin ibang lingkod, sarong dakulang kadaklan, mga lalaki, babae, asin aki, na ngonyan minilyon na an kabilangan. Sa paggiya nin mga anghel, an mga ini nakiiiba sa linahidan na “mga oripon” sa pagpahayag kan daing katapusan na maogmang bareta sa gabos na tawo. A, kanigoan an paghihingoa kan gabos na “mga oripon” na ini tanganing matabangan an mga mahoyo sa daga na makanompong nin kaligtasan! (Mateo 24:14; Kapahayagan 7:9, 14; 14:6) Ipinaheheling kan Kapahayagan kun ano an dapat nindong gibohon tanganing makinabang sa nakapagagayagayang maogmang bareta.
4. (a) Mantang haros 1,900 na taon na an nakaagi poon kan isurat ni Juan an Kapahayagan, paano sia makapagtataram manongod sa “mga bagay na kaipuhan na mangyari sa dai na mahahaloy”? (b) Ano an ipinaheheling ngonyan kan ebidensia manongod sa mga bagay na ihinula?
4 Alagad paano masasabi ni Juan na an “mga oripon” na ini pahehelingan nin “mga bagay na kaipuhan na mangyari sa dai na mahahaloy”? Bako daw na an mga tataramon na iyan itinaram haros 1,900 na taon na an nakaagi? Sa punto-de-vista ni Jehova, na sa saiyang pagheling an sangribong taon garo sana “an kasuodma,” an 1,900 na taon halipot na panahon kun ikokomparar sa binilyon na taon na ginamit nia sa paglalang asin pag-andam kan daga para sa pag-istar nin tawo. (Salmo 90:4) Si apostol Pablo nagsurat manongod sa saiya mismong “galagang paghalat asin paglaom,” ta sierto na an katunayan kan saiyang balos garo baga haranihon na para sa saiya. (Filipos 1:20) Alagad ngonyan, kadakol kan ebidensia na an gabos na ihinula mangyayari sono sa iskedyul. Dai pa noarin man nangyari sa kasaysayan na nakataya an mismong kaligtasan nin katawohan. Solamente an Dios an may solusyon!—Isaias 45:21.
Paagihan nin Komunikasyon
5. Paano ipinaabot an Kapahayagan ki apostol Juan dangan sa mga kongregasyon?
5 An Kapahayagan 1:1b, 2 nagpapadagos: “Asin isinugo nia [ni Jesus] an saiyang anghel asin itinao iyan [an Kapahayagan] sa mga tanda paagi sa saiya sa saiyang oripon na si Juan, na nagpatotoo sa tataramon na itinao nin Dios asin sa patotoo na itinao ni Jesu-Cristo, patin sa gabos na bagay na saiyang naheling.” Kaya, naresibi ni Juan an ipinasabong na rekord paagi sa sarong mensaherong anghel. Isinurat nia iyan sa sarong balumbon, na ipinaaabot iyan sa mga kongregasyon kan saiyang panahon. Makaoogma para sa sato, ipreneserbar iyan nin Dios para sa pagpakosog sa labing 66,000 na kongregasyon kan saiyang sararong mga lingkod digdi sa daga ngonyan.
6. Ano an iinapod ni Jesus sa pinakapaagihan na gagamiton nia sa pagtao nin espirituwal na kakanon sa saiyang mga “oripon” ngonyan?
6 An Dios may pinakapaagihan sa pagkomunikar kan Kapahayagan kaidtong kaaldawan ni Juan, asin si Juan an daganon na kabtang kan pinakapaagihan na iyan. Siring man, an Dios may pinakapaagihan sa pagtao nin espirituwal na kakanon sa saiyang mga “oripon” ngonyan. Sa saiyang dakulang hula manongod sa pagtatapos kan palakaw nin mga bagay, inapod ni Jesus an daganon na kabtang kan pinakapaagihan na ini bilang “an maimbod asin madonong na oripon na pinaniwalaan kan saiyang kagurangnan kan saiyang mga domestiko, tanganing magtao sainda kan saindang kakanon sa igong panahon.” (Mateo 24:3, 45-47) Ginagamit nia an grupong Juan na ini sa pagbukas sa kahulogan kan hula.
7. (a) Paano kita maninigong maapektaran kan mga tanda na yaon sa Kapahayagan? (b) Gurano na kahaloy na nakikikabtang an nagkapira sa grupong Juan sa kaotoban kan mga bisyon sa Kapahayagan?
7 Isinurat ni apostol Juan na itinao ni Jesus an Kapahayagan “sa mga tanda,” o simbolo. An mga ini buhay asin kawiliwiling siyasaton. An mga iyan naglaladawan nin dinamikong aktibidad asin maninigo man na pumukaw sato sa maigot na paghihingoa sa pagpahayag sa iba kan hula asin kan kahulogan kaiyan. An Kapahayagan nagtatao sato nin pirang nakapalalaad nin boot na mga bisyon, na sa kada saro si Juan nakikabtang magsalang aktibo o bilang nagmamasid. An mga kabilang sa grupong Juan, na an nagkapira nakikabtang sa laog nin sagkod sa 70 taon sa kaotoban kan mga bisyon na ini, naoogma na binukasan kan espiritu nin Dios an kahulogan tanganing ikapaliwanag ninda iyan sa iba.
8. (a) Ano an napapalaen manongod sa kada saro sa mga bisyon sa Kapahayagan? (b) Paano kita tinatabangan kan hula sa Daniel na masabotan kun ano an mga hayop sa Kapahayagan?
8 An mga bisyon na ini sa Kapahayagan dai iinaatubang sa kronolohikong pagkasunodsunod. An lambang saro may sadiring peryodo nin pagkaotob. An dakol sa bisyon inootro an mga tataramon nin mas naenot na mga hula na nagtatao nin giya sa interpretasyon kaiyan. Halimbawa, an hula ni Daniel naglaladawan sa apat na makatatakot na hayop, na ipinaliliwanag na an mga ini naglaladawan sa mga kapangyarihan na namamahala sa daga. Kun siring, tinatabangan kitang masabotan na an mga hayop sa Kapahayagan nagrerepresentar sa politikal na mga pamamahala, pati an mga nag-eeksister ngonyan.—Daniel 7:1-8, 17; Kapahayagan 13:2, 11-13; 17:3.
(Ipagpapadagos sa masunod na luwas.)
[Kahon sa pahina 30]
Tanganing masabotan an libro nin Kapahayagan kaipuhan niato na
● Akoon an tabang kan espiritu ni Jehova
● Mamansayan kun kasuarin nagpoon an aldaw kan Kagurangnan
● Mamidbid an maimbod asin madonong na oripon ngonyan