“An Kapangyarihan na Lihis sa Ordinaryo”
GURANONG pagsakit an matitios nin sarong Kristiano? Ngonyan, an mga Kristiano sa bilog na kinaban nakaatubang sa kadaihon, kariribokan sa pamilya, makolog na mga pangyayari sa emosyon, helang, guerra, asin paglamag. Posible daw na laoman sinda na magdanay sa integridad sa ibong kan gabos na ini? Sinabi ni apostol Pablo na iyo. Isinurat nia: “Igwa ako nin kosog para sa gabos na bagay huli sa saiya na nagtatao nin kapangyarihan sa sako.”—Filipos 4:13.
An kasaysayan nagpapaheling na an kosog hale ki Jehova tunay na igo para sa gabos na bagay. Halimbawa, durante kan rehimen na Nazi sa Alemania, an mga Saksi ni Jehova nagtios nin maringis na paglamag. Nakatagal daw sinda? An librong Les Bibelforscher et le nazisme (The Bible Students and Nazism) nagsasabi: “Sa ibong kan gabos na pangongolog, paghuma, asin pagbabawal, sa ibong nin pagsopog sa publiko, pagkabilanggo asin detension sa mga kampo de konsentrasyon, an mga Estudyante kan Biblia [mga Saksi ni Jehova] dai nanggad tinogotan na sinda mismo ‘edukaran giraray.’”
Sa mga kampo de konsentrasyon, an mga Saksi namimidbid paagi sa saradit na purpurang mga triangulo sa saindang mga manggas asin pinili para sa espesyal na karingisan. Nalaglag daw sinda kaini? Narisa kan sikologong si Bruno Bettelheim na sinda “bako sanang nagpaheling nin pambihira kalangkaw na dignidad nin tawo asin moral na ugale, kundi garo protektado tumang sa iyo man sanang eksperyensia sa kampo na dai naghaloy naglaglag sa mga tawo na kinonsiderar ko mismo na lubos nanggad na sararo asin kan sakong sikoanalitikong mga katood.”
Iyo, igwa sinda ‘nin kosog para sa gabos na bagay.’ Taano? Huli ta sinda nanarig ki Jehova. Sinabi ni Pablo: “Kami may kayamanan na ini sa mga lalagan na laboy, tanganing an kapangyarihan na lihis sa ordinaryo magin sa Dios asin bakong an gikan mismo sa samo.” (2 Corinto 4:7) Kun mapaatubang kamo sa nagbabalo sa pasensiang situwasyon, manarig ki Jehova para sa tabang. Napakosog kan kapangyarihan na lihis sa ordinaryo na itinatao nia, makatatagal kamo.—Lucas 11:13.