“Kaipuhan Nindo an Pakatagal”
KITA ‘nangangaipo nin pakatagal,’ tanganing maako niato “an kaotoban kan panuga.” (Hebreo 10:36) An sarong iskolar sa Biblia nagpapaliwanag na an Griegong termino para sa “pakatagal” na ginamit ni apostol Pablo sa tekstong ini kun minsan naglaladawan sa “kakayahan nin sarong tinanom na mabuhay sa irarom nin masakit asin bakong paborableng mga sirkumstansia.”
Sa kabukidan nin Europa, igwang nabubuhay na siring nanggad kaiyan na tinanom. Pambihira nanggad, iyan inaapod na mabuhay-sagkod-lamang. Siempre, an nabubuhay sa bukid na tinanom na ini dai man nabubuhay sagkod lamang, alagad iyan nakatatagal nin dakol na taon, na nagkakaigwa nin magayonon na marhay na mga burak kada tig-init. Ipinaliliwanag kan The New Encyclopædia Britannica na an tinanom nginaranan na mabuhay-sagkod-lamang huli sa “kakayahan na mabuhay sa masakit na kamugtakan asin katagalan” kaiyan. (An sientipikong ngaran para sa mga tinanom na ini na kabilang sa klaseng Sempervivum nangangahulogan man na “mabuhay-sagkod-lamang.”)
An kahangahanga sa matagal na tinanom na ini iyo na iyan nagtatalubo sa pinakamasakit na mga lugar. Iyan manonompongan sa itaas nin madoros na mga bakilid nin bukid, kun saen an temperatura puedeng bumaba nin sagkod sa 35° C sa laog sana nin 24 oras. Iyan puedeng magkagamot sa magapong gatak na may kadikit na daga. Ano an nagkapirang sekreto kan pagigin matagal kaiyan sa siring kasakit na mga kamugtakan?
An mabuhay-sagkod-lamang igwa nin matagok na mga dahon, na maingat na nagtitipon nin tubig. Ini nagpapangyari na aprobetsaran kaiyan nin biyo an gabos na dampog na makukua sa oran o sa natutunaw na niebe. Saro pa, iyan nagtatalubo na tumpok-tumpok na nakapagsasararo kan saindang kosog tanganing makakapot nin marigon sa saindang magapong suporta. Paagi sa pagkagamot sa mga gatak, iyan napoprotehiran tumang sa maraot na panahon, dawa ngani tibaad kakadikit kan daga. Sa ibang pagtaram, iyan nabubuhay paagi sa pag-aprobetsar sa kun anong makukuang bentaha sa masakit na mga sirkumstansia.
Sa espirituwal na pananaram, tibaad manompongan niato an satong sadiri sa mga sirkumstansia na mabalo kan kualidad kan satong pakatagal. Ano an matabang sa sato na makatagal sa irarom nin pagbalo? Arog kan tinanom na mabuhay-sagkod-lamang, puede kitang magtipon kan nagtatao nin buhay na tubig kan Tataramon nin Dios asin makiasosyar nin dayupot sa tunay na mga Kristiano para sa suporta asin proteksion. Orog sa gabos, arog kan nabubuhay sa bukid na burak, kaipuhan niatong higotan an pagkapot sa satong “gapo,” si Jehova, siring man sa saiyang Tataramon asin sa saiyang organisasyon.—2 Samuel 22:3.
Tunay nanggad, an tinanom na mabuhay-sagkod-lamang sarong magayon na pagirumdom na, minsan sa masakit na palibot, kita puedeng makatagal kun aaprobetsaran niato an makukuang mga probisyon. Inaasegurar kita ni Jehova na an siring na pakatagal magiya sa sato sa ‘pagmana sa mga panuga,’ na literal na mangangahulogan nin pagkabuhay sagkod lamang.—Hebreo 6:12; Mateo 25:46.