Binago kan Biblia an Saindang Buhay

PAANO nagkaigwa nin tunay na kahulogan an buhay nin sarong hoben na babae na nagin miserable an buhay kan aki pa? Ano an nagpahiro sa sarong madahas na rebelde sa gobyerno na magin mapagpatoninong na ministro nin relihion? Basahon an mga estorya ninda tanganing maaraman an simbag.

“Gustong-gusto Kong Makanompong nin Pagkamoot Asin Pagpadangat.”—INNA LEZHNINA

TAON NIN PAGKAMUNDAG: 1981

GINIKANAN NA NASYON: RUSIA

MISERABLE AN BUHAY KAN AKI PA

AN BUHAY KO KAIDTO: Namundag ako na bungog asin bungog man an mga magurang ko. Maogma an enot na anom na taon kan buhay ko. Dangan, nagdiborsio an mga magurang ko. Minsan ngani akion pa ako, nasabotan ko na kun ano an boot sabihon kan diborsio, asin makologon idto sa boot. Pagkatapos kan diborsio, an ama ko asin matua kong tugang na lalaki nagdanay sa Troitsk, mantang an ina ko nagbalyo sa Chelyabinsk asin iniba nia ako. Pag-abot nin panahon, nag-agom giraray an ina ko. Parainom an padrasto ko, asin pirme niang binubugbog kaming mag-ina.

Kan 1993, nalamos an namomotan kong matuang tugang na lalaki. Grabe an epekto sa pamilya mi kan aksidenteng idto. Nagpoon nang mag-inom an ina ko, asin minamaltrato na man ako arog kan padrasto ko. Pinonan kong maghanap nin mas marahay na buhay. Gustong-gusto kong makanompong nin pagkamoot asin pagpadangat. Nagpoon akong mag-atender sa pagtiripon nin laen-laen na relihion, na naghahanap nin karangahan, alagad mayo akong nanompongan.

KUN PAANO BINAGO KAN BIBLIA AN BUHAY KO: Kan ako 13 anyos na, may kaklase akong saro sa Mga Saksi ni Jehova na nagsaysay sa sako nin nagkapirang estorya sa Biblia. Naogma akong makanood manongod sa mga karakter sa Biblia na arog ni Noe asin Job, na naglingkod sa Dios dawa depisil an mga kamugtakan. Dai nahaloy, nakikipag-adal na ako sa Biblia sa mga Saksi asin nag-aatender na sa mga pagtiripon ninda.

Binuksan kan pag-adal sa Biblia an sakong mga mata sa kadakol na magayon na katotoohan. “Napahiro ako kan maaraman ko na may ngaran palan an Dios.” (Salmo 83:18) Huminanga ako kan maheling ko kun gurano kaeksaktong ihinula kan Biblia an magigin mga kamugtakan durante kan “magña huring aldao.” (2 Timoteo 3:1-5) Asin naogma akong marhay kan manodan ko an manongod sa paglaom na pagkabuhay liwat. Isip-isipa na sana—maheheling ko giraray an tugang ko!—Juan 5:28, 29.

Pero, bako gabos nakiogma sa sako. Anggoton sa mga Saksi ni Jehova an sakong ina asin padrasto. Pinirit ninda akong pumondo sa pag-adal sa Biblia. Alagad gustong-gusto ko an sakong nanonodan, asin dai nanggad ako mapondo.

Bakong pasil na makayanan an pagtumang kan pamilya ko. An saro pang makologon na pangyayari iyo an pagkalamos man kan nguhod kong tugang na lalaki, na kaibaiba ko sa mga pagtiripon kan Mga Saksi ni Jehova. Pero, yaon pirme an mga Saksi tanganing tabangan ako. Sa sainda ko nanompongan an pagkamoot asin pagpadangat na hinahanaphanap ko sa bilog kong buhay. Aram kong ini na an tunay na relihion. Kan 1996, nabautismohan ako bilang saro sa Mga Saksi ni Jehova.

KUN PAANO AKO NAKINABANG: Anom na taon na akong kasal sa sarong marahayon na lalaki na an ngaran Dmitry. Magkaibanan kaming naglilingkod sa sangang opisina kan Mga Saksi ni Jehova sa St. Petersburg. Pag-abot nin panahon, nagbago an saboot kan mga magurang ko sa sakong tinutubod.

Nagpapasalamat akong marhay na namidbid ko si Jehova! Nagkaigwa nin tunay na kahulogan an buhay ko huli sa paglilingkod sa saiya.

“Dakol na Hapot an Nakapurisaw sa Sako.”—RAUDEL RODRIGUEZ RODRIGUEZ

TAON NIN PAGKAMUNDAG: 1959

GINIKANAN NA NASYON: CUBA

DATING REBELDE SA GOBYERNO

AN BUHAY KO KAIDTO: Namundag ako sa Havana, Cuba, asin nagdakula sa tios na lugar kun saen an suruntokan sa kalye ordinaryo na sana. Mantang nagdadakula, nagkainteres ako sa judo asin iba pang mga combat sport.

Matibay ako sa klase, kaya inengganyar ako kan mga magurang ko na mag-eskuela sa unibersidad. Mantang nag-eeskuela, namatean ko na kaipuhan bagohon an politikal na sistema kan samong nasyon. Nagdesisyon akong magrebelde. Nagsurog kami kan kaklase ko tanganing agawan nin badil an sarong pulis. Huli kaiyan, naerido nin grabe an payo kan pulis. Bilang resulta, napreso kami asin nasentensiahan nin kagadanan paagi sa firing squad. Beinte anyos pa sana ako, pero magagadan na ako!

Sa mapungaw na karsel, prinaktis ko kun ano an gigibohon ko sa atubangan kan firing squad. Habo kong magpaheling nin takot. Kasabay kaiyan, dakol na hapot an nakapurisaw sa sako. Iniisip ko: ‘Taano ta kadakol nin inhustisya sa kinaban? Arog na sana daw kaini an buhay?’

KUN PAANO BINAGO KAN BIBLIA AN BUHAY KO: Pag-abot nin panahon, an sentensiang kagadanan ibinaba sa 30 taon na pagkapreso. Kaidto ko nakamidbid an nagkapira sa Mga Saksi ni Jehova, na nakapreso dahel sa relihiosong paniniwala. Hanga ako sa mga Saksi huli ta makosog an boot ninda pero matoninong. Dawa ngani bakong tama an pagkapreso sa sainda, sinda dai naanggot o nagraot an boot.

Tinokdoan ako kan mga Saksi na may katuyohan an Dios para sa katawohan. Ipinaheling ninda sa Biblia na an daga gigibohon niang paraiso na mayo nang krimen asin inhustisya. Tinokdoan ninda ako na an daga iistaran nin marahay na mga tawo, na magkakaoportunidad na mabuhay sagkod lamang sa perpektong kamugtakan.—Salmo 37:29.

Ikinaogma ko an sakong nanonodan sa mga Saksi, pero an pagkatawo ko laen na marhay sa sainda. Iniisip kong imposible para sa sako na magin neutral sa politika o na ipasampaling pa an sa ibong na pisngi. Kaya nagdesisyon akong basahon nin solo an Biblia. Kan matapos ko na iyan, narealisar ko na Mga Saksi ni Jehova sana an minagawe na arog kan enot na mga Kristiano.

Sa pag-adal sa Biblia, naaraman ko na kaipuhan ko an dakulang mga pagbabago sa buhay. Halimbawa, kaipuhan kong bagohon an sakong pagtaram, huling paramuda ako. Kaipuhan ko man ipondo an pagsigarilyo. Asin dapat na dai na ako makikampi sa mga isyu sa politika. Bakong madali an mga pagbabagong ini, pero sa tabang ni Jehova, luway-luway kong nagibo iyan.

Saro sa pinakamasakit na mga pagbabago iyo an pakanood na kontrolon an pagigin aranggoton ko. Sagkod ngonyan, ipinapamibi ko pa na logod magkaigwa ako nin pagpupugol sa sadiri. Nakatabang na marhay sa sako an mga teksto sa Biblia na arog kan Talinhaga 16:32, na nagsasabi: “Orog karahay an haloy na maang[g]ot ki kan makosog; asin an nakakarogaring [“nakakapugol,” NW] kan saiyang espiritu, ki kan minasakop nin sarong banuaan.”

Kan 1991, nabautismohan ako bilang saro sa Mga Saksi ni Jehova. Binautismohan ako sa sarong bariles nin tubig sa presohan. Kan suminunod na taon, an nagkapira sa samo na mga preso pinaluwas asin pinaduman sa España huling may mga paryente kami duman. Pag-abot duman, tolos-tolos akong nag-atender sa mga pagtiripon kan Mga Saksi ni Jehova. Maogma ninda akong inako na garo baga nakaibahan ko na sinda nin dakol na taon, asin tinabangan ninda akong magbagong buhay.

KUN PAANO AKO NAKINABANG: Maogma na ako, na naglilingkod sa Dios kaiba kan agom ko asin mga aki ming babae. Pribilehio kong gamiton an kadaklan na oras sa pagtabang sa iba na makanood sa Biblia. Kun beses, nagigirumdoman ko an hoben na lalaki na gagadanon na kutana, asin pinapahalagahan ko an dakol na nakamtan ko poon kaidto. Bako sanang buhay ako kundi may paglaom man. Hinahalat ko an ipinanugang Paraiso—an panahon na an hustisya mangingibabaw asin ‘dai nang kagadanan.’—Kapahayagan 21:3, 4.

[Blurb sa pahina 19]

“Napahiro ako kan maaraman ko na may ngaran palan an Dios”

[Ritrato sa pahina 20]

Naoogma kaming mag-agom na ipaheling sa mga bungog an mga publikasyon sa lenguaheng pasenyas