Maimbod na Paglingkudan an Diyos sa Ibong nin “Dakul na Kasakitan”

1. Taano ta dai na ikinakabigla kan mga lingkod nin Diyos an kasakitan?

NAKAKABIGLA daw na maaraman na maagi ka nin “dakul na kasakitan” bago mo makamit an premyong buhay na daing katapusan? Posibleng marhay na dai. Baguhan ka man sa katotoohan o haloy nang lingkod ni Jehova, aram mong parte na kan buhay an kasakitan sa kinaban na ini ni Satanas.—Kap. 12:12.

2. (a) Apuwera sa mga problema na nakakaapektar sa gabos na bakong perpektong tawo, ano pang klase nin kasakitan an inaatubang kan mga Kristiyano? (Hilingon an ritrato sa itaas.) (b) Siisay an nasa likod kan satong mga kasakitan, asin paano ta iyan naaraman?

² Apuwera sa mga kadipisilan na “ordinaryo nang minaabot sa tawo”—mga problemang nakakaapektar sa gabos na bakong perpektong tawo—an mga Kristiyano napapaatubang sa saro pang klase nin kasakitan. (1 Cor. 10:13, BPV)a Ano iyan? An grabeng pagtumang huli sa marigon nindang pagsunod sa mga ley nin Diyos. Sinabi ni Jesus sa mga parasunod niya: ‘An uripon bakong urog sa saiyang kagurangnan. Kun ako pinaglamag ninda, kamo man pagraralamagon.’ (Juan 15:20) Siisay an nasa likod kan siring na pagtumang? Daing iba kundi si Satanas, na ilinaladawan kan Bibliya na sarong ‘nagngangarob na leon’ na “naghahanap nin masisiba” sa mga lingkod nin Diyos. (1 Ped. 5:8) Gagamiton ni Satanas an gabos na paagi tanganing rauton an integridad kan mga disipulo ni Jesus. Pag-isipan an nangyari ki apostol Pablo.

KASAKITAN SA LISTRA

3-5. (a) Anong kasakitan an inatubang ni Pablo sa Listra? (b) Sa anong paagi nakakapakusog an sinabi niya manungod sa maabot na mga kasakitan?

³ Bako sanang sarong beses na pinersegir si Pablo huli sa saiyang pagtubod. (2 Cor. 11:23-27) Nangyari an saro kaiyan sa Listra. Pagkatapos paumayan an sarong lalaking pilay puon pagkamundag, si Pablo asin an kaibanan niyang si Bernabe irinukyaw bilang mga diyos. Pinakiulayan kan duwa an ugmahon na mga tawo na dai sinda pagsambahon! Pero dai nahaloy, nag-abot an nagkokontrang mga Judio asin pinakaraot ninda si Pablo asin Bernabe sa mga tawo. Biglang nabaliktad an pangyayari! Ginarapo kan mga tawo si Pablo asin binayaan siyang haros gadan na.—Gui. 14:8-19.

⁴ Pagkatapos magdalaw sa Derbe, si Pablo asin Bernabe ‘nagbalik sa Listra, saka nagdagos sa Iconio sagkod sa Antioquia. Pinakusog ninda an buot kan mga [disipulo] asin sinadol na magdanay sa pagtubod. Sinabihan pa ninda an mga parasunod: “Kaipuhan mag-agi kita nin dakul na kasakitan bago makalaog sa Kahadian nin Diyos.”’ (Gibo 14:21, 22, BPV) Sa primero, tibaad ikangalas ta an mga tataramon na iyan. Ta kun iisipon, dai man nakakapakusog sa buot an pagkaigwa nin “dakul na kasakitan,” kundi nakakapurisaw. Kaya, paano ‘pinakusog’ ni Pablo asin Bernabe an mga disipulo paagi sa sinabi nindang mapapaatubang sinda sa dakul na kasakitan?

⁵ Makukua ta an simbag kun sisiyasaton tang marhay an sinabi ni Pablo. Dai niya sana sinabi: “Kaipuhan kitang magtagal nin dakul na kasakitan.” Imbes, sinabi niya: ‘Kaipuhan mag-agi kita nin dakul na kasakitan bago makalaog sa Kahadian nin Diyos.’ Kaya pinakusog ni Pablo an mga disipulo paagi sa pagduduon kan positibong resulta kan pagdanay na maimbod. Bako sanang imahinasyon an premyong iyan. Sa katunayan, sinabi ni Jesus: ‘An makatagal sagkod sa katapusan iyo an makakaligtas.’—Mat. 10:22.

6. Anong premyo an naghahalat sa mga makakatagal?

⁶ Kun makatagal kita, maako kita nin premyo. Para sa linahidan na mga Kristiyano, an premyong iyan iyo an imortal na buhay sa langit bilang kairibang tagapamahala ni Jesus. Para sa ‘ibang mga karnero,’ iyan iyo an buhay na daing katapusan sa daga kun sain ‘an katanusan mag-iirok.’ (Juan 10:16; 2 Ped. 3:13) Pero arog kan sinabi ni Pablo, mapapaatubang nguna kita sa dakul na kasakitan. Pag-isipan an duwang klase nin kasakitan na puwedeng mapaatubang sa sato.

DIREKTANG PAG-ATAKE

7. Anong klaseng kasakitan an puwedeng ibilang na direktang pag-atake?

⁷ Ihinula ni Jesus: ‘Itatao ninda kamo sa mga konseho, asin sa mga sinagoga hahampakon kamo, asin matindog kamo sa atubangan nin mga gobernador asin mga hadi.’ (Mar. 13:9) Arog kan ipinapahiling kan mga tataramon na iyan, an sarong klase nin kasakitan na aatubangon nin nagkapirang Kristiyano iyo an pisikal na persekusyon, tibaad huli sa sutsut kan mga lider sa relihiyon o pulitika. (Gui. 5:27, 28) Sa giraray, pag-isipan an halimbawa ni Pablo. Suminibog daw siya sa takot huli sa posibilidad na mapaatubang sa siring na persekusyon? Dai nanggad.—Basahon an Guibo 20:22, 23.

8, 9. Paano ipinahiling ni Pablo na determinado siyang magtagal, asin paano ipinahiling kan nagkapira ngunyan an kaparehong determinasyon?

⁸ Makusog an buot na inatubang ni Pablo an direktang pag-atake ni Satanas, asin siya nagsabi: ‘Dai ko ibinibilang na mahalaga sa sako an sakong buhay, tanganing matapos ko an pagdalagan asin an paglingkod na sakong inako sa Kagurangnan na si Jesus, na magpatotoo kan ebanghelyo nin biyaya nin Diyos.’ (Gui. 20:24) Malinaw nanggad na dai natakot si Pablo sa persekusyon. Sa kabaliktaran, determinado siyang magtagal, ano man an mangyari. An pinakamahalaga sa saiya iyo an lubos na ‘magpatotoo kan ebanghelyo’ sa ibong nin ano man na kasakitan.

⁹ Ngunyan, dakul sa mga tugang ta an nagpahiling nin kaparehong determinasyon. Halimbawa, sa sarong nasyon, may mga Saksi na nagtios nin haros 20 taon sa presuhan huli sa pagdanay na neutral. Mayong ginibong pagbista sa saindang kaso huling an ley sa nasyon na iyan daing probisyon para sa mga nagsasayumang magsuldados. Mantang yaon sa presuhan, dai sinda tinugutan na dalawon dawa pa kan kapamilya ninda, asin an nagkapirang preso binugbog saka pinasakitan nin grabe sa lain-lain na paagi.

10. Taano ta dai kita maninigong matakot sa mga kasakitan na bigla na sanang minaabot?

¹⁰ An mga tugang ta sa ibang lugar nagtatagal nin mga kasakitan na bigla na sanang minaabot. Kun mangyari iyan sa saimo, dai magpadaog sa takot. Girumdumon si Jose. Ipinabakal siya tanganing magin uripon, pero ‘ilinigtas siya ni Jehova sa gabos niyang kasakitan.’ (Gui. 7:9, 10) Magigibo man iyan ni Jehova sa saimo. Dai nuarin man paglingawan na si Jehova ‘tataong magligtas kan diyosnon na mga tawo’ hali sa ‘mga pagbalo sainda.’ (2 Ped. 2:9, BPV) Padagos ka daw na magtitiwala ki Jehova, sa pakaaram na kaya ka niyang iligtas sa maraot na sistemang ini nin mga bagay asin kakamtan mo an buhay na daing katapusan sa irarom kan pamamahala kan saiyang Kahadian? Igwa ka kan gabos na dahilan na gibuhon iyan asin kusog buot na atubangon an persekusyon.—1 Ped. 5:8, 9.

DAING GAYO RISANG PAG-ATAKE

11. Paano naiiba an daing gayo risang pag-atake ni Satanas sa saiyang direktang pag-atake?

¹¹ An saro pang klase nin kasakitan na puwedeng mapaatubang sa sato iyo an daing gayo risang pag-atake. Paano ini naiiba sa direktang pag-atake siring kan pisikal na persekusyon? An direktang pag-atake garo buhawi na kayang gabaon tulos an saimong harong. An daing gayo risang pag-atake garo mga anay na dikit-dikit na rinaraot an kahoy kan saimong harong sagkod na magaba iyan. Sa pag-atakeng ini, puwedeng dai ngani mariparo nin sarong tawo an peligro sagkod na magin huri na an gabos.

12. (a) Ano an saro sa mga daing gayo risang taktika na ginagamit ni Satanas, asin taano ta epektibong marhay iyan? (b) Paano si Pablo naapektaran nin pangluluya nin buot?

¹² Gustong rauton ni Satanas an relasyon mo ki Jehova paagi sa direktang pag-atake siring kan persekusyon asin paagi sa daing gayo risang pag-atake na dikit-dikit na rinaraot an saimong pagtubod. An saro sa pinakaepektibong mga taktika na ginagamit ni Satanas na daing gayo risa iyo an pangluluya nin buot. Inadmitir ni apostol Pablo na may mga panahon na pinangluyahan siya nin buot. (Basahon an Roma 7:21-24.) Ngunyan, taano ta inapod ni Pablo—sarong lalaking makusog sa espirituwal asin posibleng marhay na miyembro kan namamahalang grupo kan inot na siglo—an saiyang sadiri na ‘kahirak-hirak,’ o miserable? Sinabi ni Pablo na nakamati siya kaiyan huli sa saiyang pagkabakong perpekto. Gusto niya talagang gibuhon an tama, pero may namamati siyang puwersa sa laog niya na nagkokontra sa saiya. Kun may panahon na linalabanan mo an arog kaiyan na pagmati, bako daw na nakakarangang maaraman na dawa si apostol Pablo napaatubang sa arog kaiyan na kadipisilan?

13, 14. (a) Taano ta pinangluluyahan nin buot an nagkapirang lingkod nin Diyos? (b) Siisay an gustong magluya an pagtubod niyato, asin taano?

¹³ Kun beses, dakul na tugang an pinangluluyahan nin buot, nahahadit, asin nakakamati pa ngani na mayo sindang halaga. Halimbawa, sarong maigot na payunir na aapudon tang Deborah an nagsabi: “Pauruutro kong naiisip an nagibo kong sala, asin sa kada maisip ko iyan, lalo akong nangluluya. Pag nagigirumduman ko an gabos na kasalan ko, pagmati ko dai na ako mamumutan nin siisay man, dawa ni Jehova.”

¹⁴ Taano ta pinangluluyahan nin buot an nagkapirang maigot na lingkod ni Jehova, arog ni Deborah? Tibaad may nagkapirang dahilan. An nagkapira tibaad may tendensiyang mag-isip nin negatibo sa sadiri asin sa kamugtakan ninda sa buhay. (Tal. 15:15) An iba tibaad nagkakaigwa nin negatibong mga sabuot huli sa problema sa salud na nakakaapektar sa saindang emosyon. Ano man an dahilan, dapat niyatong girumdumon na igwang saro na gustong aprobetsaran an siring na mga sabuot. Siisay talaga an saro na gustong pangluyahan kitang marhay nin buot tanganing sumuko kita? Siisay an gustong magpamati sa saimo na kinondenar ka man nin Diyos arog niya? (Kap. 20:10) Siyempre, si Satanas. An totoo, direkta man o daing gayo risang pag-atake an gamiton niya, pareho an katuyuhan ni Satanas—mahadit kita, magluya an kaigutan ta, asin sumuko kita. Dai paglingawan na kalabot sa espirituwal na ralaban an mga lingkod nin Diyos!

15. Paano ta maipapahiling na determinado kitang dai magpadaog sa pangluluya nin buot?

¹⁵ Magin determinado na dai sumuko. Pirming magpokus sa premyo. Nagsurat si Pablo sa mga Kristiyano sa Corinto: “Dai kami minasuko, kundi minsan ngani an samong pagkatawo sa luwas nalalapa, tunay nanggad na an samong pagkatawo sa laog nababago aroaldaw. Huli ta minsan ngani an kasakitan minaagi sana asin magian, iyan nagbubunga para sa samo nin kamurawayan na paurog nang paurog an kadakulaan asin daing katapusan.”—2 Cor. 4:16, 17, NW.

MAG-ANDAM NA NGUNYAN PARA SA MGA KASAKITAN

16. Taano ta mahalagang mag-andam na ngunyan para sa mga kasakitan?

¹⁶ Arog kan nahiling na niyato, naggagamit si Satanas nin dakul na ‘katusuhan’ o pakana. (Efe. 6:11) An lambang saro sa sato kaipuhan na magsunod sa patanid na yaon sa 1 Pedro 5:9: “Magin pusog kamo sa saindong pagtubod saka labanan nindo siya.” (BPV) Tanganing magibo iyan, kaipuhan tang andamon an satong isip asin puso saka sanayon na ngunyan an satong sadiri na gibuhon an tama. Sa pag-ilustrar: Bago pa man magkagiyera, an mga suldados haloy nang nagkakaigwa nin masakit asin sigidong mga pagsasanay. Siring man kaiyan an espirituwal na hukbo ni Jehova. Dai ta aram kun ano an kalabot sa pakikilaban niyato sa maabot na panahon. Kaya, bako daw na sarong kadunungan na magsanay nang marhay ngunyan mantang matuninong pa? Nagsurat si Pablo sa mga taga Corinto: “Padagos na baluon kun baga kamo nasa pagtubod; padagos na patunayan kun ano man nanggad kamo.”—2 Cor. 13:5, NW.

17-19. (a) Paano ta masisiyasat an satong sadiri? (b) Paano puwedeng mag-andam an mga hoben na idepensa an saindang pagtubod mantang nasa eskuwelahan?

¹⁷ An sarong paagi tanganing masunod an ipinasabong na sadol ni Pablo iyo an seryosong pagsiyasat sa sadiri. Ihapot sa sadiri: ‘Nagmamaigot daw ako na pirming mamibi? Kun ginigipit ako kan kairiba ko, sinusunod ko daw an Diyos bilang tagapamahala imbes na an mga tawo? Regular daw akong nag-aatender sa Kristiyanong mga pagtiripon? Daing takot ko daw na ipinapakipag-ulay an pagtubod ko? Hinihinguwa ko daw na pagpasensiyahan an mga pagkukulang kan mga kapagtubod ko—kun paanong pinagpapasensiyahan man ninda ako? Nagpapasakop daw ako sa mga nanginginot sa kongregasyon mi asin sa mga nanginginot sa pambilog na kinaban na kongregasyon?’

¹⁸ Mangnuhon na duwa sa mga hapot an manungod sa daing takot na pagdepensa kan satong pagtubod asin paninindugan sa panggigipit nin kairiba. Kinaipuhan iyan na gibuhon kan satong mga hoben mantang nasa eskuwelahan. Nanudan nindang dai matakot o dai masupog na sabihon an saindang pagtubod. Imbes, sinda nagtataram na may kusog nin buot. May makakatabang na mga suhestiyon an satong mga magasin tanganing magibo ini. Halimbawa, isinusuherir kan Awake! na Hulyo 2009 na kun an kaklase mo maghapot: “Ta’no ta dai ka naniniwala sa ebolusyon?” puwede mong sabihon: “Ta’no man ta maniniwala ako sa ebolusyon? An mga siyentista ngani na mga eksperto na dai nagkakauruyon diyan!” Mga magurang, siyertuhon na magpraktis kaiba an saindong mga aki tanganing andam sindang atubangon an arog kaining mga panggigipit kan kairiba ninda sa eskuwelahan.

¹⁹ Totoo, bako pirming pasil na idepensa an satong mga tinutubod o na gibuhon an iba pang bagay na hinahagad sa sato ni Jehova. Pagkatapos nin maghapon na trabaho, tibaad kaipuhan tang piriton an satong sadiri na mag-atender sa pagtiripon. Tibaad dipisil magbuhat sa higdaan pag aga tanganing maghulit lalo na kun masiramon pang maghigda. Pero girumdumon: Kun mag-abot an mas darakulang pagbalo, mas maaatubang mo iyan kun ngunyan pa sana igwa ka na nin marahay na espirituwal na rutina.

20, 21. (a) Paano makakatabang an paghurop-hurop sa pantubos tanganing malabanan an negatibong mga sabuot? (b) Ano an maninigong magin determinasyon niyato?

²⁰ Paano man an daing gayo risang mga pag-atake? Halimbawa, paano ta malalabanan an pangluluya nin buot? An saro sa pinakaepektibong paagi iyo an paghurop-hurop sa pantubos. Iyan an ginibo ni apostol Pablo. Kun beses, pagmati niya miserable siya. Pero aram man niya na nagadan si Cristo, bako para sa mga tawong perpekto, kundi para sa mga makasalan. Asin si Pablo saro sa mga makasalan na iyan. Sa katunayan, isinurat niya: ‘Namumuhay ako sa pagtubod na yaon sa Aki nin Diyos, na namuot sako asin uminatang kan saiya man sana [para] sako.’ (Gal. 2:20) Iyo, inako ni Pablo an pantubos. Aram niyang aplikado sa saiya mismo an pantubos.

²¹ An kaparehong pananaw—na an pantubos regalo mismo sa saimo ni Jehova—makakatabang na marhay sa saimo. Dai ini nangangahulugan na mawawara na tulos an pangluluya nin buot. An nagkapira sa sato tibaad padagos na lalabanan an daing gayo risang pag-atakeng ini sagkod na mag-abot an bagong kinaban. Pero girumdumon: Itatao an premyo sa mga dai masuko. Haranihon na kita sa mamuraway na aldaw na eestablisaron kan Kahadian nin Diyos an katuninungan asin ibabalik sa pagigin perpekto an gabos na maimbod na tawo. Magin determinadong makalaog sa Kahadian na iyan—dawa sa ibong nin dakul na kasakitan.