Hapot
◼ Paano ikapahahayag nin mga nag-atender sa bautismo an kagayagayahan?
An bautismo magayagayang okasyon. Ikinaoogma niatong maheling an mga bagohan na ipinaheheling sa publiko an saindang pagtubod. (Sal. 40:8) Sinabi ni Jesus na ini dahelan nin dakulang kagayagayahan sa kalangitan. (Luc. 15:10) An mga kapamilya asin parahayag na nakipag-adal sa mga nagpapabautismo nangorognang magayagaya na maheling na gibohon nin mga bagohan an kinakaipuhan na tanggang ini. Pero paano ikapahahayag nin tama an siring na kagayagayahan?
An bautismo ni Jesus iyo an arogan para sa Kristianong mga bautismo ngonyan. Namimibi sia kaidto kan sia bautismohan. (Luc. 3:21, 22) Aram nia na an bautismo panahon nin paghorophorop asin toltol na pag-isip. Minidbid man kan saiyang mga disipulo an halaga nin bautismo. Kan aldaw nin Pentecostes 33 C.E., mga 3,000 an nabautismohan. Ano an reaksion kan mga disipulo na nakaheling sa okasyon na idto? “Sinda nagpadagos sa pagdusay kan saindang sadiri sa katokdoan kan mga apostol . . . asin sa . . . pamibi.” (Gibo 2:41, 42) An mga disipulo naghorophorop nin espirituwal na mga bagay.
Sa modernong mga panahon an mga asambleang Kristiano tinampokan nin mga pagbautismo. Tama nanggad na ipahayag an satong kagayagayahan paagi sa pag-urupakan kun naheheling niato an mga indibiduwal na naninindogan para ki Jehova. Sa ibong na lado, dai magigin angay an pagpaheling nin daing kontrol na pag-urupakan, pagpaypay nin takyag, asin pagkurahaw kan mga ngaran. An siring na gawe nagpaparisa nin kakulangan nin pag-apresyar sa kabanalan kan pagpapahayag na ini nin pagtubod. Ni angay man ining panahon para sa pagtao nin mga burak o iba pang regalo sa mga nagpabautismo pagbutwa ninda sa tubig. An bautismo kapinonan kan Kristianong paorumbasan para sa kaligtasan. Ikapaheheling niato an satong kagayagayahan paagi sa pagtabang sa mga bagong mabautismohan na apresyaron an dayupot na relasyon ki Jehova na binubukasan para sa sainda kan bautismo.
An lugar nin bautismo bakong tamang lugar para sa pagkawat, paglangoylangoy, o iba pang gawe na makahahale kan pagkaseryoso kan okasyon. An satong kagayagayahan maninigong ipahayag sa paaging may dignidad. An satong pagigin areglado asin seryoso makakokontribuwir sa kagayagayahan nin gabos na presente.