Pag-alok kan Librong Creation
1 Mantang an kadaklan na tawo sa satong teritoryo nagtutubod sa kaglalang, nakaaangat na makipag-olay sa satong mga kataraed dapit sa temang ini. Ano an puwede niatong sabihon tanganing mapukaw an interes kan kagharong? Anong mga punto an itatampok nindo? An minasunod na suhestion matabang sato na magin andam na magkaigwa nin interesanteng mga pakikipag-olay sa satong pagtaraed mantang iinaalok niato an libro sa satong mga teritoryo. Puwedeng iadaptar an mga suhestion sa lokal na mga kamugtakan.
2 Taano ta Tinotogotan nin Dios an Kasakitan?: Minsan an dakol na naghihingakong Kristiano naghohorophorop dapit sa hapot na ini. Kaya puwede niatong palatawon iyan sa satong introduksion tanganing mapukaw an interes nin kagharong.
3 Pakatapos nin angay na pataratara, puwede nindong sabihon:
◼ “Sa pakikipag-olay sa samong mga kataed, nanompongan mi na dakol na tawo an naghahapot kun taano ta tinotogotan nin Dios an grabeng kasakitan ngonyan. An iba binabasol pa ngani an Dios huli sa saindang mga problema. Ano an reaksion nindo manongod kaini? [Pakomentohon.] Alagad bako daw totoo na kadaklan kan satong mga problema dahelan sa tawo, bakong sa Dios? Mangnoha kun paano ini ipinaheling digdi sa Eclesiastes 8:9. [Basahon.] Ipinaheheling man kan Biblia na sa dai na mahahaloy lalaglagon nin Dios an mga naglalaglag kan daga, sa siring tinatapos an kasakitan sagkod lamang. [Basahon an Kapahayagan 11:18.]” Dangan darahon an atension sa Kapitulo 16 kan librong Creation, na ipinaheheling an ilustrasyon sa pahina 197.
4 Dakol an nakadiskobre na an pagbasa sa sarong kapitulo sa libro na naglalaman nin sarong puntong interesante nakatatabang. Mangnoha kun paano ini magigibo sa temang kun baga an Biblia ipinasabong o dai.
5 Pakatapos na ipamidbid an saindong sadiri, puwede nindong sabihon:
◼ “An dakol na tawo ngonyan igwa nin Biblia, alagad nagtutubod daw talaga sinda na iyan Tataramon nin Dios? Digdi sa 2 Timoteo 3:16 sinasabi na an Biblia ipinasabong nin Dios. [Basahon.] Kun an saro maghapot saindo, paano nindo patutunayan na ini totoo? [Pasimbagon.] Digdi sa Kapitulo 17 kan librong ini na Life—How Did It Get Here? By Evolution or by Creation?, may patotoo kita na an Biblia kaoyon kan siensia, medisina, asin kasaysayan, asin na iyan sadiosan asin nagkakaoroyon. [Basahon an mga subtema.] Ipinaheheling man kan Kapitulo 18 na tama an pagkahula kaiyan sa ngapit, na Dios sana an makagigibo. Mantang iyan Tataramon nin Dios, kaipuhan na pag-adalan ta iyan asin iaplikar an sadol kaiyan. Tanganing matabangan kamo na magibo ini naoogma akong iwalat an librong ini sa diit na kontribusyon.”
6 Iba Pang Nakatatabang na Kabtang: An mahiwas na mga reperensia sa likod kan libro magagamit man tanganing ipaheling an pagsiyasat na ginibo. Para sa mga interesado sa pagkokomparar nin ebolusyon sa paglalang, an tsart sa pahina 112 nagtatao nin halipot na sumaryo. Asin sa mga interesado sa sientipikong mga bagay, nagtatao nin ekselenteng impormasyon an Kapitulo 9 sa temang “Our Awesome Universe” asin an Kapitulo 10 sa temang “Evidence From a Unique Planet.” Kun boot nindong repasohon an mga hula na nagpapaheling na nasa huri na kitang mga aldaw, bukasan sana nindo an pahina 224 asin 225 para sa halipot na lista.
7 Paagi sa paggamit nin epektibong mga paagi tanganing ialok an librong Creation, matatabangan niato an dakol pa na magtaong onra sa kaglalang asin mag-adal kan saiyang Tataramon.