Arogon an Pagkaherak nin Dios Ngonyan
“Ipinakikimaherak ko na kami maholog sa kamot ni Jehova, huli ta kadakol kan saiyang pagkaherak.”—2 SAMUEL 24:14.
1. Ano an namatean ni David manongod sa pagkaherak nin Dios, asin taano?
ARAM ni Hadeng David hale sa eksperyensia na si Jehova mas maheherakon kisa mga tawo. Sa pagsarig na an mga dalan, o dana, nin Dios an pinakamarahay, minawot ni David na manodan an Saiyang mga dalan asin maglakaw sa Saiyang katotoohan. (1 Cronica 21:13; Salmo 25:4, 5) Siring daw ki David an namamatean nindo?
2. Anong sadol an itinao ni Jesus sa Mateo 18:15-17 sa pag-atubang sa magabat na kasalan?
2 An Biblia nag-aalok sato nin pakasabot sa pag-iisip nin Dios, maski sa mga bagay siring sa kun ano an maninigo niatong gibohon kun may magkasala tumang sato. Sinabihan ni Jesus an saiyang mga apostol, na kan huri magigin Kristianong mga paraataman: “Kun magkasala an saimong tugang, magduman asin ihayag an saiyang kasalan na kamo sanang duwa. Kun maghinanyog sia saimo, ikinaligtas mo an saimong tugang.” An kasalan na kalabot digdi bako sanang personal na diperensia kundi magabat na kasalan, siring sa pandadaya o pagpakaraot. Sinabi ni Jesus na kun an tanggang ini dai makaresolber sa problema asin kun may mga saksi, an sarong napagkasalaan maninigong ipag-iba sinda tanganing magpatunay na may nagibong sala. Ini na daw an huring tangga? Bako. “Kun [an nagkasala] dai maghinanyog sa sainda, itaram mo sa kongregasyon. Kun dai pa sia maghinanyog minsan sa kongregasyon, ibilang mo sia na arog kan tawo kan mga nasyon asin parasingil nin buhis.”—Mateo 18:15-17.
3. Ano an boot sabihon ni Jesus sa pagsabing an dai nagsosolsol na parakasala ibibilang na “arog kan tawo kan mga nasyon asin parasingil nin buhis”?
3 Bilang mga Judio, masasabotan kan mga apostol kun ano an kahulogan kan trataron an nagkasala “arog kan tawo kan mga nasyon asin parasingil nin buhis.” An mga Judio naglikay na makiiba sa mga tawo kan mga nasyon, asin saindang minimenus an mga Judio na nagtrabaho bilang mga parasingil nin buhis kan Roma.a (Juan 4:9; Gibo 10:28) Kaya, sinadol ni Jesus an mga disipulo na kun isinikwal kan kongregasyon an parakasala, dai sinda makikiiba saiya. Alagad, paano iyan magigin kaoyon kan pakikiiba ni Jesus kun minsan sa mga parasingil nin buhis?
4. Kaoyon kan saiyang mga tataramon sa Mateo 18:17, taano si Jesus ta nakiiba sa nagkapirang parasingil nin buhis asin mga parakasala?
4 An Lucas 15:1 nagsasabi: “An gabos na parasingil nin buhis asin mga parakasala padagos na nagdodorolok sa saiya sa paghinanyog sa saiya.” Bakong gabos na parasingil nin buhis o parakasala an yaon duman, kundi “gabos” sa pakahulogan na dakol. (Ikomparar an Lucas 4:40.) Sairisay? Idtong mga interesado na patawadon an saindang mga kasalan. An iba sa siring mas naenot na napahiro kan mensahe sa pagsolsol ni Juan Bautista. (Lucas 3:12; 7:29) Kaya kan an iba nagdorolok ki Jesus, an saiyang paghulit sainda dai nakabalga sa saiyang sadol sa Mateo 18:17. Mangnohon na “dakol na parasingil nin buhis asin mga parakasala [an nakadangog ki Jesus] asin sinda nagpoon na sumunod saiya.” (Marcos 2:15) An mga ini bako idtong nagmamawot magpadagos sa maraot na dalan nin buhay, na habo nin ano man na tabang. Imbes, nadangog ninda an mensahe ni Jesus asin natanyog an saindang puso. Maski kun padagos pa sindang nagkakasala, pero posibleng nagmamaigot magbakle, “an marahay na pastor” paagi sa saiyang paghuhulit sainda nag-aarog sa saiyang maheherakon na Ama.—Juan 10:14.
Pagpapatawad, Sarong Kristianong Obligasyon
5. Ano an pundamental na paninindogan nin Dios manongod sa pagpatawad?
5 Kita may nakaoogmang kasegurohan sa pagigin andam na magpatawad kan satong Ama: “Kun ituga niato an satong mga kasalan, sia maimbod asin matanos tanganing ipatawad sa sato an satong mga kasalan asin linigan kita sa gabos na kabikoan.” “Isinusurat ko sa saindo an mga bagay na ini tanganing dai kamo makagibo nin kasalan. Minsan siring, kun an siisay man makaginibo nin kasalan, igwa kita nin parasorog sa Ama, si Jesu-Cristo, sarong matanos.” (1 Juan 1:9; 2:1) Posible daw an kapatawadan sa natiwalag?
6. Paano an tawong natiwalag puwedeng patawadon asin ibalik?
6 Iyo. Sa panahon nin pagtiwalag sa saro huli sa daing pagsolsol na kasalan, an mga magurang na nagrerepresentar sa kongregasyon nagpapaliwanag saiya na posible siang magsolsol asin mag-ako kan kapatawadan nin Dios. Puwede siang mag-atender sa mga pagtiripon sa Kingdom Hall, kun saen makadadangog sia nin pagtotokdo sa Biblia na makatatabang saiya na magsolsol. (Ikomparar an 1 Corinto 14:23-25.) Sa tamang panahon puwede niang hagadon na makabalik sa malinig na kongregasyon. Dangan sa pakipag-olay kan mga magurang sa saiya, pagmamaigotan nindang aramon kun baga nagsolsol na sia asin binayaan na an saiyang makasalan na pamumuhay. (Mateo 18:18) Kun iyan an kamugtakan, puwede siang ibalik, kaoyon kan arogan sa 2 Corinto 2:5-8. Kun natiwalag sia nin dakol na taon, kaipuhan siang gumibo nin plinanong paghingoa tanganing umoswag. Tibaad mangaipo man sia nin awad-awad na tabang pakatapos tanganing paoswagon an saiyang kaaraman asin apresasyon sa Biblia tanganing sia magin marigon sa espirituwal na Kristiano.
Pagbalik ki Jehova
7, 8. Anong arogan an itinao nin Dios may koneksion sa saiyang nadistiyerong banwaan?
7 Pero an mga magurang daw puwedeng magkaigwa nin inisyatiba sa pagdolok sa natiwalag na tawo? Iyo. An Biblia nagpaheling na an pagkaherak ipinahahayag bako sanang sa negatibong pagpogol sa pagpadusa kundi parate paagi sa positibong mga hiro. Igwa kita kan halimbawa ni Jehova. Bago nia idinistiyero an saiyang bakong maimbod na banwaan, makahula niang itinao an paglaom sa pagbalik ninda: “Girumdoma an mga bagay na ini, O Jacob, asin ika, O Israel, huli ta kamo an sakong lingkod. . . . Paparaon ko an saimong kasumbikalan siring sa panganoron, asin an saindong kasalan siring sa dampog. Magbalik kamo sa sako, huli ta tutuboson ko kamo.”—Isaias 44:21, 22.
8 Dangan, sa pagkadistiyero ninda, si Jehova naggibo nin orog pang tangga, na naghiro sa positibong paagi. Isinugo nia an mga propeta, an saiyang mga representante, tanganing imbitaran an Israel na ‘hanapon sia asin makua sia.’ (Jeremias 29:1, 10-14) Sa Ezequiel 34:16, iinagid nia an saiyang sadiri sa sarong pastor asin an mga tawo kan nasyon nin Israel sa nawarang karnero: “Hahanapon ko an nawara, asin ibabalik ko an nalagalag.” Sa Jeremias 31:10, naggamit man si Jehova nin piguratibong pagtaram manongod sa saiyang pagigin pastor kan mga Israelitas. Dai, dai nia ilinadawan an saiyang sadiri bilang pastor kan aripompon na naghahalat magbalik an nawara; imbes, ilinadawan nia an saiyang sadiri bilang sarong pastor na naghahanap kan nawara. Mangnohon na maski sa panahon na an banwaan sa pankagabsan dai nagsosolsol asin nadidistiyero, an Dios an nag-enot sa paghingoang magbalik sinda. Asin kaoyon kan Malaquias 3:6, an Dios dai nagliliwat kan paagi nia nin pagtratar sa Kristianong areglo.
9. Paano an halimbawa nin Dios sinusunod sa Kristianong kongregasyon?
9 Bako daw na nagsusuherir ini na may rason sa pagkakaigwa nin inisyatiba sa ibang natiwalag na tibaad nagsosolsol na ngonyan? Girumdomon na si apostol Pablo nagtao nin paggiya na haleon an maraot na tawo sa kongregasyon nin Corinto. Pakatapos sinadol nia an kongregasyon na patunayan an saindang pagkamoot sa tawo huli sa saiyang pagsolsol, na naggiya sa kasunod na pagpabalik saiya sa kongregasyon.—1 Corinto 5:9-13; 2 Corinto 2:5-11.
10. (a) Anong motibo an maninigong magpahiro sa ano man na paghingoa na makaolay an ibang natiwalag? (b) Taano an Kristianong mga paryentes ta bakong an magibo nin inisyatiba na makikomunikar?
10 An ensiklopedyang kinotar sa enotan nagsasabi: ‘An pangenot na dahelan sa pagtiwalag iyo an pagprotehir sa mga pamantayan kan grupo: “an kadikit na lebadura nakakapausbog sa bilog na masa” (1 Cor. 5:6). An motibong ini maliwanag sa kadaklan na biblikal asin ekstrakanonikong mga tataramon, pero an pagmakolog sa indibiduwal, maski pakatiwalag, iyo an basihan kan kahagadan ni Pablo sa 2 Cor. 2:7-10.’ (Samo an italiko.) Kaya, an arog kaining pagmakolog tama sanang ipaheling ngonyan kan mga pastor sa aripompon. (Gibo 20:28; 1 Pedro 5:2) An dating mga katood asin mga paryentes tibaad naglalaom na an sarong natiwalag magbalik; alagad huli sa paggalang sa pagboot sa 1 Corinto 5:11, dai sinda makikiiba sa tawong natiwalag.b Linalaom nindang an nombradong mga pastor magibo nin inisyatiba tanganing aramon kun an sarong iyan interesadong makabalik.
11, 12. Anong klaseng mga natiwalag an maski kamagurangan dai makikikomunikar, alagad anong klase an mamawoton nindang dalawon?
11 Bakong angay maski sa mga magurang na gumibo nin inisyatiba sa nagkapirang natiwalag, siring sa mga apostata, na ‘nagtataram nin biribid na mga bagay tanganing maguyod sa sainda an mga disipulo.’ An mga ini ‘falsong mga paratokdo na nagmamaigot magdara nin nakalalaglag na mga sekta asin mag-aaprobetsar sa kongregasyon paagi sa mga tataramon na putik.’ (Gibo 20:30; 2 Pedro 2:1, 3) An Biblia dai man nagtatao nin ano man na basihan para hanapon an mga natiwalag na makiiwalon o aktibong nandadagka sa iba na magkasala.—2 Tesalonica 2:3; 1 Timoteo 4:1; 2 Juan 9-11; Judas 4, 11.
12 Alagad, an dakol na natiwalag bakong siring kaiyan. An saro tibaad nag-ontok na sa magabat na pagkakasala na huli kaiyan natiwalag sia. An saro tibaad nananabako kaidto, o tibaad kan nakaagi nagbuburat, pero dai na sia ngonyan nagmamaigot na giyahan an iba sa pagkakasala. Girumdomon na maski ngani dai pa nagbalik sa Dios an nadistiyerong Israel, nagsugo sia nin mga representante na sinasadol sindang magbalik. Baga man si Pablo o an mga magurang sa kongregasyon sa Corinto naggibo nin inisyatiba sa pagsiyasat sa tawong natiwalag, dai sinasabi kan Biblia. Kan an tawong iyan nagsolsol asin binayaan an saiyang inmoralidad, pinagbotan ni Pablo an kongregasyon na ibalik sia.
13, 14. (a) Ano an nagpapaheling na an ibang natiwalag tibaad maghimate sa maheherakon na inisyatiba? (b) Paano iaareglo kan grupo nin mga magurang an pakikomunikar?
13 Dai pa nahahaloy may mga kaso na dian an sarong magurang nangyaring nakanompong nin natiwalag na tawo.c Kan iyan angay, halipot na renepaso kan pastor an mga tangga na kaipuhan tanganing makabalik. An ibang tawo na siring kaini nagsolsol asin nakabalik. An siring na magayagayang resulta nagpapaheling na tibaad may mga natiwalag o dis-asosyado na mahimate sa maheherakon na pagdolok kan mga pastor. Alagad paano aatubangon kan kamagurangan an bagay na ini? Dai malabi sa sarong beses kada taon, an grupo nin mga magurang maninigong konsideraron kun baga may siring na mga tawong nag-iistar sa saindang teritoryo.d An kamagurangan magkokonsentrar sa mga natiwalag nin labing sarong taon na. Sono sa mga kamugtakan, kun angay, mag-aasignar sinda nin duwang magurang (kutana an mga pamilyar sa kamugtakan) na dumalaw sa siring na indibiduwal. Dai dadalawon an siisay man na nagpaheling nin mapagtatsar, mapanganib na kaisipan o nagpahayag na habo ninda nin ano man na tabang.—Roma 16:17, 18; 1 Timoteo 1:20; 2 Timoteo 2:16-18.
14 Puwedeng mag-apod sa telepono an duwang magurang tanganing ihapot kun puwede an halipot na pagdalaw, o puwede sindang umagi sa angay na panahon. Durante kan pagdalaw, dai sinda nangangaipong magin estrikto o indiperente pa ngani kundi maninigong maogmang ipaheling an saindang maheherakon na pagmakolog. Imbes na repasohon an nakaaging kaso, puwede nindang ipakipag-olay an mga teksto sa Biblia siring kan Isaias 1:18 asin 55:6, 7 asin Santiago 5:20. Kun an tawo interesadong bumalik sa aripompon nin Dios, puwede nindang maboot na ipaliwanag an mga tanggang maninigo niang gibohon, siring kan pagbasa kan Biblia asin mga publikasyon kan Watch Tower Society asin pag-atender sa mga pagtiripon sa Kingdom Hall.
15. Ano an maninigong isaisip kan kamagurangan sa pakikomunikar sa natiwalag?
15 An mga magurang na ini nangangaipo nin kadonongan asin pagmansay sa pagdeterminar kun baga may indikasyon nin pagsolsol asin kun marahay na dumalaw liwat. Siyempre, maninigo nindang isipon na an ibang natiwalag nungka na ‘mapakosog giraray sa pagsolsol.’ (Hebreo 6:4-6; 2 Pedro 2:20-22) Pakatapos kan pagdalaw, an duwa magtatao nin halipot na berbal na report sa Komite sa Paglilingkod kan Kongregasyon. Dangan, ipaaaram man ninda iyan sa grupo nin mga magurang sa saindang masunod na pagtiripon. An maheherakon na inisyatiba kan mga magurang magpapaheling kan pagmansay nin Dios: “‘Pagbalik kamo sa sakuya, asin ta ako mabalik sa saindo,’ nagsabi si Jehova nin mga hukbo.”—Malaquias 3:7.
Iba Pang Maheherakon na Tabang
16, 17. Paano niato mamansayon an Kristianong mga paryentes kan natiwalag?
16 Kumusta kita na bakong mga paraataman asin dai magibo kan siring na inisyatiba sa mga natiwalag? Ano an magigibo niato na kaoyon kan areglong ini asin bilang pag-arog ki Jehova?
17 Sagkod na an saro tiwalag o dis-asosyado, kaipuhan niatong sunudon an instruksion: “Umontok sa pakikiiba sa siisay man na inaapod na tugang na nagin parapakisaro o paslo o parasamba sa ladawan o paramuda o paraburat o parakikil, na dai ngani makikakan sa siring na tawo.” (1 Corinto 5:11) Alagad an Biblikal na direktibang ini maninigong dai makaapektar sa satong pagmansay sa mga miembro nin Kristianong pamilya na nag-iistar kairiba nin tawong natiwalag. An suanoy na mga Judio sobrang gayo an nagin reaksion sa mga parasingil nin buhis kaya an saindang pagkaongis minasagkod pa ngani sa pamilya kan parasingil nin buhis. Dai iyan sinuportaran ni Jesus. Sinabi nia na an parakasala na nagsayumang tabangan maninigong ibilang “na arog kan tawo kan mga nasyon asin parasingil nin buhis”; dai nia sinabing an Kristianong mga miembro kan pamilya maninigong trataron nin siring.—Mateo 18:17.
18, 19. Ano an nagkapirang paagi na dian ikapaheheling niato an satong pagka-Kristiano sa maimbod na mga paryentes kan natiwalag?
18 Maninigo kitang nangorognang nagsusuportar sa mga miembro nin pamilya na maimbod na mga Kristiano. Sinda tibaad nakaatubang na sa kakologan asin mga olang huli sa pamumuhay na kairiba nin natiwalag na tibaad aktuwal na nagpapadisganar sa saindang espirituwal na mga gibohon. Tibaad habo niang dumalaw an mga Kristiano sa saindang harong; o kun mag-abot sinda tanganing kumustahon an maimbod na mga miembro kan pamilya, tibaad dai sia nin kortesiya na dai makiiba sa mga bisita. Tibaad inoolang man nia an mga paghihingoa kan pamilya na atenderan an gabos na Kristianong pagtiripon asin mga asamblea. (Ikomparar an Mateo 23:13.) An mga Kristianong nasa siring na bakong paborableng kamugtakan tunay na angay sa satong pagkaherak.—2 Corinto 1:3, 4.
19 An saro pang paagi na makakapaheling kita nin maboot na pagkaherak iyo an ‘pagranga’ asin nagpapakosog na pakikipag-olay sa siring na mga maimbod sa pamilya. (1 Tesalonica 5:14) May marahay man na mga oportunidad na magtao nin suporta bago asin pakatapos nin pagtiripon, mantang nasa paglilingkod sa langtad, o kun nagtitiripon sa ibang panahon. Dai ta kaipuhan sambiton an pagtitiwalag pero puwedeng pag-olayan an dakol na nakakapakosog na bagay. (Talinhaga 25:11; Colosas 1:2-4) Mantang an kamagurangan magpapadagos na magpastor sa mga Kristiano sa pamilya, tibaad manompongan niato na kita puwede man dumalaw na dai nakikiiba sa natiwalag. Kun an natiwalag an magsimbag kun dumalaw kita o sa telepono, puwede sana niatong ihapot an Kristianong paryente na hinahanap niato. Kun minsan an Kristianong mga miembro kan pamilya puwedeng mag-ako kan imbitasyon sa satong harong para sa asosasyon. An punto iyo ini: Sinda—hoben man asin gurang—kapwa niato mga lingkod, namomotan na mga miembro kan kongregasyon nin Dios, na dai dapat nagsosolosolo.—Salmo 10:14.
20, 21. Ano an maninigo niatong mamatean asin ihiro kun an saro nakabalik?
20 An saro pang oportunidad sa pagpaheling nin pagkaherak nabubuksan kun ibinalik an natiwalag. An mga ilustrasyon ni Jesus nagtatampok kan kaogmahan sa langit kun an ‘sarong parakasala nagsolsol.’ (Lucas 15:7, 10) Isinurat ni Pablo sa mga taga-Corinto manongod sa lalaking natiwalag: “Maninigo sia nindong maboot na patawadon asin rangahon, tanganing an siring na tawo dai madaog kan saiyang labi-labing kamondoan. Kaya sinasadol ko kamo na parigonon an saindong pagkamoot sa saiya.” (2 Corinto 2:7, 8) Satong iaplikar an sadol na iyan sa realistiko asin mamomoton na paagi sa mga aldaw asin mga semana pakatapos na makabalik an saro.
21 An ilustrasyon ni Jesus sa gastador na aki nagpapalataw nin peligro na maninigo tang likayan. An mas matuang tugang dai naogma sa pagbalik kan gastador kundi naghinanakit. Logod bako kitang arog kaiyan, na nagtatanom nin maraot na boot sa nakaaging kasalan o maghinanakit na nakabalik an tawo. Imbes, an satong pasohan magin arog kan ama, na nag-iilustrar sa reaksion ni Jehova. An ama maogma na an saiyang aki, na nawara asin garo gadan na, nanompongan, o nabuhay. (Lucas 15:25-32) Kaoyon kaiyan, libre kitang makipag-olay sa nakabalik na tugang asin pakosogon pa ngani sia. Iyo, maninigo niatong ipaheling na nagpapaheling kita nin pagkaherak, siring kan ginigibo kan satong nagpapatawad asin maheherakon na langitnon na Ama.—Mateo 5:7.
22. Ano an kalabot sa pag-arog niato ki Jehova Dios?
22 Daing duwa-duwa na kun boot niatong arogon an satong Dios, maninigo kitang magpaheling nin pagkaherak kaoyon kan saiyang mga pagboot asin saiyang hustisya. Ilinadawan sia kan salmista sa paaging ini: “Si Jehova maboot asin maheherakon, haloy na maanggot asin dakulaon sa mamomoton na pagkaherak. Si Jehova marahay sa gabos, asin an saiyang mga pagkaherak yaon sa gabos niang ginibo.” (Salmo 145:8, 9) Kanigoan kamamomoton na arogan na maninigong arogon nin mga Kristiano!
[Mga Nota sa Ibaba]
a “An mga parasingil nin buhis nangorognang minimenus kan Judiong populasyon sa Palestina huli sa nagkapirang rason: (1) naniningil sinda nin kuwarta para sa dayong kapangyarihan na nag-ookupar sa daga kan Israel, sa siring indirektang nagsusuportar sa karatan na ini; (2) sinda midbid na daing konsensia, nagyayaman sa pagsasakripisyo kan iba sa saindang sadiring banwaan; asin (3) an saindang gibohon naglalabot sainda na magkaigwa nin regular na pakikiiba sa mga Hentil, na nagpapangyaring maramog sinda sa rituwal na paagi. An pagduhagi sa mga parasingil nin buhis manonompongan kapwa sa B[agong] T[ipan] asin sa rabinikong literatura . . . Sono sa huri, an pagkaongis sagkod pa ngani sa pamilya kan parasingil nin buhis.”—The International Standard Bible Encyclopedia.
b Kun sa sarong Kristianong pamilya may natiwalag na paryente, an sarong iyan puwede pa man giraray na magin kabtang nin normal, pan-aroaldaw na pakikiiba asin gibohon kan pamilya. Puwedeng kabilang kaini an pagigin presente kun an espirituwal na materyal kinokonsiderar bilang pamilya.—Helingon an The Watchtower kan Nobyembre 15, 1988, pahina 19-20.
c Helingon an 1991 Yearbook of Jehovah’s Witnesses, pahina 53-4.
d Kun an siisay man na Saksi, sa paghuhulit sa harong-harong o sa iba pang paagi, nakaaram na may natiwalag na nag-iistar sa teritoryo, maninigo niang itao an impormasyon na iyan sa kamagurangan.
Narisa daw Nindo an mga Puntong Ini?
◻ Paano trinatar kan mga Judio an mga parasingil nin buhis asin mga parakasala, alagad taano si Jesus ta nakiiba sa nagkapira sa sainda?
◻ Ano an Makakasuratan na basihan para sa maheherakon na inisyatiba na ginigibo sa dakol na nawara?
◻ Paano an grupo nin mga magurang makakagibo nin siring na inisyatiba, asin kiisay?
◻ Paano kita makakapaheling nin pagkaherak sa mga nakabalik asin sa mga pamilya kan natiwalag?
[Kahon sa pahina 17]
An siisay man na dating kabtang kan malinig asin maogmang kongregasyon nin Dios alagad ngonyan natiwalag o dis-asosyado dai nangangaipong magdanay sa siring na kamugtakan. Imbes, an sarong iyan puwedeng magsolsol asin magkaigwa nin inisyatiba na makikomunikar sa kamagurangan kan kongregasyon. An dalan pabalik bukas.
[Pasasalamat para sa Retrato sa pahina 18]
Garo Nalbandian