Mag-ingat sa Napasalang Kabootan
1 Midbid an banwaan ni Jehova sa saindang espiritu nin pagkamatinao. Parateng ipinaheheling ini sa materyal na paagi kun inaarog niato an Samaritano sa parabola ni Jesus. (Luc. 10:29-37) Alagad, may mga bakong angay na tabangan na tibaad magprobar na aprobetsaran an satong kabootan. Kaya, an satong pagkamoot para sa iba kaipuhan na timbangan nin “tamang kaaraman asin lubos na pagmansay.”—Fil. 1:9.
2 Sa Laog kan Kongregasyon: Halimbawa, tibaad may saro na magsabing mayo sia nin trabaho o magtao nin ibang rason sa paghagad nin tabang. Kun beses an mga tawong ini habong magtrabaho kundi gusto sanang tawan sinda kan iba nin mga pangangaipo sa buhay. Manongod sa mga siring nagboot si apostol Pablo: “Kun an siisay man habong magpagal, dai man sia pagpakakanon.”—2 Tes. 3:10.
3 An “panahon asin pagkanorongod” nangyayari sa sato gabos, kaya kun may pangangaipo kita sa materyal, na mayo kan ‘satong kakanon para sa aldaw na ini,’ maninigo na dai kita makamate nin sobrang kahaditan, mantang si Jehova nagtatao sa mga namomoot sa saiya. (Ecl. 9:11; Mat. 6:11, 31, 32) Imbes na humagad nin kuwarta sa satong mga tugang sa kongregasyon, pinakamarahay na kaolayon an saro sa mga magurang. Dangan, puwede kaining kaolayon nin kompidensial an grupo nin kamagurangan. An gurang na mga lalaking ini tibaad nakaaaram manongod sa mga programa kan gobyerno sa pagtao nin tabang asin tibaad makatabang sa sarong nangangaipo na makinabang sa siring na mga programa. Ano man an mangyari, puwedeng siyasaton kan grupo nin kamagurangan an situwasyon kan kada saro na naghahagad nin tabang asin pag-olayan kun paano pinakamarahay na makatatabang an kongregasyon.
4 Nagbibiyaheng mga Impostor: An Sosyedad padagos na nakareresibi nin mga bareta na an nagkapira sa mga kongregasyon nadaya na makuanan nin kuwarta asin materyal na mga bagay nin nagbibiyaheng mga impostor. Dai ini maninigong ipagngalas niato, huli ta nagpapatanid an Kasuratan na an “mga maraot asin madaya orog na magraraot, na nandadaya asin nadadaya.” (2 Tim. 3:13) Sa parate an mga impostor na ini nagsasabi na nagkaproblema an saindang biyahe asin nagkakaipo sinda nin kuwarta para sa transportasyon asin pagkakan tanganing makapuli. Minsan ngani garo baga sinsero sinda, sa kadaklan na kamugtakan bako sindang mga Saksi ni Jehova kundi nagsasaginsagin sana.
5 Kun naghahagad nin tabang an sarong estranyo, madonong na konsultahon an saro sa mga magurang, na makadedeterminar kun baga an tawong ini satong tugang. Puwedeng apodan sa telepono an kongregasyon kaini tanganing siertohon an kamugtakan kan tawong ini. An tunay na mga tugang na namumugtak an sadiri sa pangangaipo makasasabot na an siring na paghapot para sa proteksion kan gabos na kalabot. Sa ibong na kampi, an mga impostor mahahayag paagi sa arog kaining pagsiyasat. Dai kinakaipuhan na magin sobra kamapagsuspetsa sa gabos na dai niato kamidbid, alagad kaipuhan niatong mag-ingat sa mga impostor.
6 Nagsadol an madonong na si Hadeng Salomon: “Dai ipanguri an marahay sa mga nanonongdan kaiyan, kun nasa kapangyarihan kan saimong kamot na gibohon iyan.” (Tal. 3:27) Paagi sa satong madonong na pagmansay, makapadadagos kita na magin maheherakon mientras na nag-iingat sa napasalang kabootan.