An Pinakadakulang Tawo na Nabuhay Kasuarin Pa Man

Kapitulo 46: Tinikwil Nia an Saiyang Gubing

AN BARETA dapit sa pagbalik ni Jesus hale sa Decapolis nakaabot sa Capernaum, asin an sarong dakulang kadaklan nagtiripon sa gilid kan dagat tanganing sabaton sia. Mayong duwa-duwa na nabaretaan ninda na pinaontok nia an bagyo asin pinaomayan an mga lalaking sinasaniban nin demonyo. Ngonyan, pagtungtong nia sa baybayon, sinda nagtiripon sa palibot nia, galaga asin naghahalat.

An saro sa mga gustong-gusto nang maheling si Jesus iyo si Jairo, sarong nangengenot na opisyal sa sinagoga. Naglaob sia sa pamitisan ni Jesus asin paorootrong nakimaherak: “An sakong sadit na aking babae nasa maraot na kamugtakan. Tabi dumuman ka asin ibugtak mo an saimong kamot sa saiya tanganing sia maomayan asin mabuhay.” Huling solo niang aki ini asin 12 anyos pa sana, ini padangat na marhay ni Jairo.

Naghimate si Jesus asin, inibanan kan kadaklan, nagpasiring sa harong ni Jairo. Maiimahinar niato an kaogmahan kan mga tawo mantang inaantisipar ninda an saro pang milagro. Pero an atension nin sarong babae na yaon sa kadaklan nakasentro sa saiya mismong masakit na problema.

Sa laog na nin 12 halawig na taon, an babaeng ini pinag-aawasan nin dugo. Nagpaheling na sia sa manlaenlaen na doktor, na inuubos an gabos niang kuwarta sa mga pagpabolong. Alagad dai sia natabangan; imbes, mas naggrabe an saiyang problema.

Siring sa puwedeng masabotan nindo, apuwera sa pinapanluluya siang marhay, an saiyang kamatean makasosopog man asin kahamakhamak. An saro sa parate dai nagtataram sa publiko manongod kan siring na helang. Saro pa, sa irarom kan Mosaikong Pagboot an pag-awas nin dugo nagpapagin maramog sa sarong babae, asin an siisay man na makadota sa saiya o sa saiyang mantsado nin dugo na mga gubing kinakaipuhan na maghanaw asin magin maramog sagkod sa banggi.

Nabaretaan kan babae an mga milagro ni Jesus asin hinanap nia sia ngonyan. Huli kan saiyang pagigin maramog, sagkod na mapupuwede habo niang mareparo mantang nakikisusuan sia sa kadaklan, na nagsasabi sa saiya man sana: “Kun titikwilon ko dawa an saiya sanang pan-ibabaw na mga gubing maoomayan ako.” Kan ginibo nia iyan, tolos-tolos na namatean nia na napongpong na an pag-awas nin dugo sa saiya!

“Siisay an nagtikwil sa sako?” Ikinabigla nanggad nia an mga tataramon na idto ni Jesus! Paano nia naaraman? ‘Paratokdo,’ an pagreklamo ni Pedro, ‘pinipiot asin sinususo ka kan kadaklan, asin sinasabi mo, “Siisay an nagtikwil sa sako?”’

Kinalagkalag an babae, si Jesus nagpaliwanag: “May nagtikwil sako, huli ta naaraman ko na luminuwas sako an kapangyarihan.” Iyo nanggad, bako idto ordinaryong pagtikwil, huli ta an ibinungang pagkaomay nakaina sa kosog ni Jesus.

Kan maheling kan babae na sia nareparo, an babae nagdolok asin naglaob sa atubangan ni Jesus, na natatakot asin nagtatakig. Sa atubangan kan gabos na tawo, isinabi nia an bilog na katotoohan manongod sa saiyang kamatean asin kun paano sia nabolong pa sana ngonyan.

Napahiro kan saiyang lubos na pagtuga, may pagkaherak na rinanga sia ni Jesus: “Aking babae, pinaomayan ka kan saimong pagtubod. Lakaw sa katoninongan, asin magin marahay an salud gikan sa masakiton na helang.” Kanigoan karahay na maaraman na an Saro na pinili nin Dios na mamahala sa daga siring kaiyan kainit, kamaheherakon na persona, na kapwa may pagmakolog sa mga tawo asin igwa nin kapangyarihan na tumabang sainda! Mateo 9:​18-22; Marcos 5:​21-34; Lucas 8:​40-48; Levitico 15:​25-27.

▪ Siisay si Jairo, asin taano ta nagdolok sia ki Jesus?

▪ Ano an problema nin sarong babae, asin taano ta depisilon para sa saiya an pagdolok ki Jesus para sa tabang?

▪ Paano naomayan an babae, asin paano sia rinanga ni Jesus?

(Ipagpapadagos sa masunod na luwas.)

An mga Limitasyon daw Nakakapadisganar Saindo?

MGA limitasyon! Mayo ni saro na talagang gusto kaiyan; alagad kita gabos dapat na tagalan an mga iyan sa nagkapirang kamugtakan. Alagad, kamo daw paminsanminsan nadidisganar huli ta an saindong buhay garo baga limitadong gayo? Tibaad mas marahay an mamamatean nindo kun binago nindo an saindong punto-de-vista. Imbes na mapungot manongod sa dai nindo kayang gibohon, taano ta dai aprobetsaran sa pinakalubos na paagi an ano man na katalingkasan na talagang nakakamtan nindo?

Halimbawa, an dakol na dukha sa ekonomiya nagmamawot na kutana mayaman sinda. Pero, mantang linilimitaran kan kadukhaan an kayang gibohon niato sa palakaw na ini nin mga bagay, makukua kan gabos an importanteng mga bagay sa buhay. An dukhang mga tawo siring man an mayayaman namomoot, nag-aagom, nangangaki, naoogma sa marahay na pakikikatood, asin iba pa. Mas mahalaga, an dukhang mga tawo siring man an mayayaman namimidbid si Jehova asin naglalaom sa ipinanugang bagong kinaban. An dukhang mga tawo siring man an mayayaman nag-ooswag sa Kristianong kadonongan asin kaaraman, na mas marahay kisa sa kayamanan. (Talinhaga 2:​1-9; Eclesiastes 7:12) An gabos​—mayaman asin dukha—​puwedeng gumibo para sa sadiri nin ekselenteng ngaran ki Jehova. (Eclesiastes 7:1) Kan kaaldawan ni Pablo an Kristianong kongregasyon binibilog sa kadaklan nin mga tawo na may hamak na kamugtakan sa sosyal​—an iba sainda mga oripon—​na madonong na ginamit an ano man na katalingkasan na itinogot kan saindang mga kamugtakan.​—1 Corinto 1:​26-29.

Makakasuratan na Pagkapayo

Sa Kristianong pag-agoman, an agom na babae sakop kan saiyang agom​—sarong areglo na dinisenyo sa kapakinabangan kan bilog na pamilya. (Efeso 5:​22-24) Maninigo daw na an agom na babae makamate na menus huli kaini? Dai nanggad. An agom na lalaki asin babae magkagrupo. An pagkapayo kan lalaki, kun ginigibo sa arog-Kristong paagi, nagbubugtak nin kakadikit nanggad na limitasyon sa saiyang agom asin tinatawan sia nin dakol na oportunidad na maotob an saiyang potensial. (Efeso 5:​25, 31) Sa Talinhaga 31 an “mahusay na agom na babae” okupado nin dakol na interesante asin mapan-angat na mga gibohon. Malinaw nanggad, an pagpasakop sa saiyang agom dai nakakauyam para sa saiya.​—Talinhaga 31:​10-29.

Kaagid kaiyan, mayo nin probisyon para sa babae na pangenotan an kuwalipikadong mga lalaki sa Kristianong kongregasyon. (1 Corinto 14:34; 1 Timoteo 2:​11, 12) Maninigo daw na dai manigoan an mga Kristiana sa irarom kan limitasyon na iyan? Dai. An kadaklan nagpapasalamat na maheling na inaasikaso sa teokratikong paagi an kabtang na iyan nin Kristianong paglilingkod. Naoogma sinda na makinabang gikan sa pagpapastor asin pagtotokdo kan nombradong mga magurang asin nakikikabtang mismo sinda sa mahalagang gibohon na paghuhulit asin paggibo nin mga disipulo. (Mateo 24:14; 28:​19, 20) An mga Kristiana dakol an nagigibo sa langtad na ini, asin tinatawan sinda kaini nin onra sa pagheling ni Jehova Dios.​—Salmo 68:11; Talinhaga 3:35.

Mga Limitasyon sa mga Hobenes

An mga hobenes man kun beses nagrereklamo na an saindang buhay limitadong gayo, parateng huli ta sinda napapairarom sa autoridad kan saindang mga magurang. Alagad ini Makakasuratan man. (Efeso 6:1) Imbes na mauyam sa mga limitasyon na ipinaootob sainda kan saindang mga magurang, an madonong na Kristianong mga hobenes nakasentro sa pag-ogma sa mga katalingkasan ninda​—kabale, sa parate, an katalingkasan sa magagabat na paninimbagan. Kun siring puwede nindang aprobetsaran an saindang kosog asin mga kamugtakan bilang hoben tanganing andamon an sadiri para sa adultong buhay.

An sarong dating paraataman sa sirkito sa Brazil nagigirumdoman na marhay an sarong 12-anyos na aking lalaki sa sarong sadit na nasusuhay na grupo na limitado sa saiyang magiginibo. An saro na nag-aasikaso sa mga rekord sibot sa sekular na trabaho asin dai nakakatao nin dakol na atension sa grupo, pero inareglo nia na an solteritong ini tumabang sa saiya. Nanodan nia kun saen nakabugtak an gabos na porma asin perming yaon tanganing tumabang. Nakakapakosog an saiyang interes, asin sia maimbod na kaibaiba sa paglilingkod sa langtad. An solteritong iyan nombrado nang magurang ngonyan.

Igwa nin dakol na situwasyon na puwedeng limitaran an katalingkasan nin saro. An iba linilimitaran nin helang. May mga nakaistar sa nababangang mga pamilya asin naheheling na linilimitaran an saindang katalingkasan kan mga kahagadan nin sarong daing pagtubod na agom. Minsan ngani an mga namumuhay na may mga limitasyon tibaad nagmamawot na kutana laen an mga bagay, puwede pa man giraray sindang mamuhay na kontento. An magasin na ini nagdara nin dakol na kasaysayan nin siring na mga indibiduwal na nagin pinakanakapakokosog sa iba huli ta sinda naglalaom ki Jehova asin inaaprobetsaran an saindang mga kamugtakan.

Sa pagtaram manongod sa lakop na situwasyon kan saiya mismong kaaldawan, si apostol Pablo nagsabi: “Ika daw inapod kan oripon pa? Dai mo iyan ikahadit; alagad kun puwede man ikang magin talingkas, agawa an oportunidad.” (1 Corinto 7:21) Kanigoan katimbang na punto-de-vista! Nagliliwat an nagkapirang situwasyon. Nagdadakula an mga hobenes. Kun beses nag-aako kan katotoohan an nagtutumang na mga agom. An mga situwasyon sa ekonomiya aram nang nag-oswag. Puwedeng rumahay an mga tawong naghehelang. Sa ibang kamugtakan, puwedeng dai maliwat an mga bagay sagkod na dumatong an bagong kinaban ni Jehova. Minsan siring, ano an pakikinabangon sa pagpungot huli ta dai kayang gibohon nin saro an kayang gibohon nin iba?

Nakamasid na daw kamo nin mga gamgam na naglalayog sa kalangitan sa itaas kan daga asin hinangaan an kagayonan asin katalingkasan kan saindang mga paghiro? Tibaad minawot nindong makalayog nin siring kaiyan. Bueno, dai nindo kaya asin nungkang makakalayog kamo siring sa mga gamgam! Pero posibleng dai kamo nagrereklamo. Imbes, naggagayagaya kamo sa itinao saindo nin Dios na mga abilidad. Kamo nakapanggaganang marhay sa paglakawlakaw sana sa ibabaw kan daga. Kaagid kaiyan, ano man an satong situwasyon sa buhay, kun kita magkokonsentrar sa kaya niatong gibohon imbes na mapungot dapit sa dai niato kayang gibohon, an buhay magigin nakakakontento, asin makakanompong kita nin kagayagayahan sa paglilingkod ki Jehova.​—Salmo 126:​5, 6.

[Ritrato sa pahina 28]

Namamatean daw nindo na kinukudalan kamo kan saindong mga magurang?

Pahalagahan an Saindong Banal na Paglilingkod

TANGANING maabot an ano man na kapakipakinabang na pasohan, kaipuhan kitang magin andam na magsakripisyo. Tanganing magin sarong doktor kaipuhan an dakol na taon nin pag-adal asin determinasyon, siring man kuwarta. An sarong mapangganang parakawat ginamit an kadaklan sa saiyang pagkahoben sa progresibong paggibo kan mas depisil na mga rutina sa daing ontok na pagmawot nin pagkasangkap. An sarong ekspertong pianista makakasalingoy man sa dakol na taon nin dusay na pag-ensayo.

Pero, igwa nin sarong pasohan na nagtatao nin mga kapakinabangan na sulit na marhay sa ano man na dapat isakripisyo. Ano daw iyan? Iyan an pribilehiyo na magin sarong lingkod kan Kaharohalangkawe, si Jehova Dios. Ano man na pagsakripisyo an ginigibo niato paagi sa panahon, kuwarta, o kosog, an pribilehiyo na pagtao nin banal na paglilingkod sa satong Kaglalang nagtatao nin mga balos na dai ikakakomparar. Totoo an mga tataramon ni apostol Pablo: “An diosnon na debosyon kapakipakinabang sa gabos na bagay, mantang iyan may panuga sa buhay ngonyan asin sa madatong.” (1 Timoteo 4:8) Helingon niato kun gurano iyan katotoo.

Kan Enot Niatong Manodan an Dapit sa Dios

An kadaklan na nag-aako sa maogmang bareta asin nagpopoon na mag-adal sa Biblia posibleng dai narerealisar an kadakolan kan pagliliwat na ibubunga sa saindang buhay. Enot, an bagohan na estudyante sa Biblia tibaad mawaran nin mga katood na dai nakakasabot kun taano ta dai na sia nakikiiba sa sainda sa mga aktibidad na ngonyan minimidbid nia na dai nagtataong onra sa Dios. (1 Pedro 4:4) May mga nakakaeksperyensia nin pagtumang kan pamilya asin puwedeng makologan na maheling idtong mga namomotan ninda na nagpapaheling nin pagsayuma, kaongisan pa ngani, ki Jehova. (Mateo 10:36) Iyan puwedeng depisil na pagsakripisyo.

Sa trabaho o sa eskuwelahan, igwa man nin dapat na isakripisyo. An bagohan na estudyante sa Biblia pag-abot nin panahon mapondo sa pakikikabtang sa kinabanon na mga parti asin iba pang selebrasyon. Dai na sia mahinanyog sa bakong malinig na orolay kan saiyang mga katrabaho o kaeskuwela, ni na sia makikisobahan sainda nin mga bastos. Imbes, pagmamaigotan niang gibohon an hatol na makukua sa Efeso 5:​3, 4: “An pakikisaro asin gabos na klase nin karigsokan o kapasloan dai ngani masambitan