Pahalagahan an Saindong Banal na Paglilingkod
TANGANING maabot an ano man na kapakipakinabang na pasohan, kaipuhan kitang magin andam na magsakripisyo. Tanganing magin sarong doktor kaipuhan an dakol na taon nin pag-adal asin determinasyon, siring man kuwarta. An sarong mapangganang parakawat ginamit an kadaklan sa saiyang pagkahoben sa progresibong paggibo kan mas depisil na mga rutina sa daing ontok na pagmawot nin pagkasangkap. An sarong ekspertong pianista makakasalingoy man sa dakol na taon nin dusay na pag-ensayo.
Pero, igwa nin sarong pasohan na nagtatao nin mga kapakinabangan na sulit na marhay sa ano man na dapat isakripisyo. Ano daw iyan? Iyan an pribilehiyo na magin sarong lingkod kan Kaharohalangkawe, si Jehova Dios. Ano man na pagsakripisyo an ginigibo niato paagi sa panahon, kuwarta, o kosog, an pribilehiyo na pagtao nin banal na paglilingkod sa satong Kaglalang nagtatao nin mga balos na dai ikakakomparar. Totoo an mga tataramon ni apostol Pablo: “An diosnon na debosyon kapakipakinabang sa gabos na bagay, mantang iyan may panuga sa buhay ngonyan asin sa madatong.” (1 Timoteo 4:8) Helingon niato kun gurano iyan katotoo.
Kan Enot Niatong Manodan an Dapit sa Dios
An kadaklan na nag-aako sa maogmang bareta asin nagpopoon na mag-adal sa Biblia posibleng dai narerealisar an kadakolan kan pagliliwat na ibubunga sa saindang buhay. Enot, an bagohan na estudyante sa Biblia tibaad mawaran nin mga katood na dai nakakasabot kun taano ta dai na sia nakikiiba sa sainda sa mga aktibidad na ngonyan minimidbid nia na dai nagtataong onra sa Dios. (1 Pedro 4:4) May mga nakakaeksperyensia nin pagtumang kan pamilya asin puwedeng makologan na maheling idtong mga namomotan ninda na nagpapaheling nin pagsayuma, kaongisan pa ngani, ki Jehova. (Mateo 10:36) Iyan puwedeng depisil na pagsakripisyo.
Sa trabaho o sa eskuwelahan, igwa man nin dapat na isakripisyo. An bagohan na estudyante sa Biblia pag-abot nin panahon mapondo sa pakikikabtang sa kinabanon na mga parti asin iba pang selebrasyon. Dai na sia mahinanyog sa bakong malinig na orolay kan saiyang mga katrabaho o kaeskuwela, ni na sia makikisobahan sainda nin mga bastos. Imbes, pagmamaigotan niang gibohon an hatol na makukua sa Efeso 5:3, 4: “An pakikisaro asin gabos na klase nin karigsokan o kapasloan dai ngani masambitan dian sa saindo, siring sa maninigo sa mga banal; ni an makasosopog na gawe ni an rungaw na orolay ni an bastos na sorobahan, mga bagay na bakong maninigo, kundi imbes an mga pagpasalamat.”
An mga pagliliwat na iyan puwedeng gibohon an estudyante sa Biblia na sarong tagaluwas. Iyan puwedeng magin masakit, partikularmente sa sarong hoben na nag-eeskuwela pa. Napapaatubang sa sunod-sunod na selebrasyon, siring man sa kontra sa Dios na mga katokdoan, arog baga kan ebolusyon, asin padagos na pangigipit na makiiba sa kadaklan, an Kristianong mga hobenes kaipuhan na magtagal nin padagos na pakikilaban para sa pagtubod. An pagsunod sa mga dalan nin Dios gigibohon sindang napapalaen asin puwedeng magbunga nin pagtuya gikan sa mga kaklase asin paratokdo. Ini partikularmenteng masakit na akoon durante kan delikadong mga taon nin pagigin tin-edyer, alagad an pag-oyon nin Dios sulit sa pagsakripisyong iyan.
Iyan daw Tunay na mga Pagsakripisyo?
An iba pang bagay na kan enot minalataw na mga pagsakripisyo nagigin mga bendisyon. May mga nangaipong ipondo an bisyo nin pananabako. (2 Corinto 7:1) Ini puwedeng magin masakit, pero kanigoan na bendisyon kun an nakauuyam na bisyong iyan sa katapustapusi mapangganahan! Masasabi man iyan manongod sa pakapanggana sa pagkaadikto sa iba pang droga o arak. Kanigoan karahay kan buhay kun mayo nang siring kanakararaot na mga ugale! An iba kinaipuhan na itanos an saindang pag-agoman. Idtong mga nagsasaro na dai kasal maninigong magsalang magpakasal o pumondo sa pakikisaro. (Hebreo 13:4) An mga nakikisaro sa nagkapirang agom na babae maninigong magdanay kaibanan kan sainda sanang agom sa pagkabarobata. (Talinhaga 5:18) An mga pagliliwat na iyan may kalabot na pagsakripisyo, alagad an mga iyan nagdadara nin katoninongan sa harong.
Isipon an mga Balos
Tunay nanggad, an siisay man na nagkukuyog sa mga pagboot ni Jehova talagang nakikinabang. Sa kaenot-enote sa saiyang buhay, an estudyante sa Biblia, nagpopoon na umapod sa saiyang Kaglalang sa Saiyang ngaran na Jehova. (Salmo 83:18) Namomoot an estudyante ki Jehova mantang nanonodan nia an manongod sa makangangalas na mga bagay na Saiyang ginibo asin gigibohon pa para sa katawohan. Sa mga nasyon kun saen lakop an pagkatakot sa gadan, nawawara saiya an superstisyosong pagkatakot na ini, na nakakaaram na an mga gadan natotorog, na naghahalat nin pagkabuhay liwat. (Eclesiastes 9:5, 10) Asin kanigoan na kaginhawahan na marealisar na dai pinasasakitan ni Jehova an mga tawo sagkod lamang sa impierno! Iyo, talagang binubutasan sia kan katotoohan.—Juan 8:32.
Mantang an estudyante orog na iinooyon an saiyang buhay sa mga pamantayan ni Jehova, nagkakamit sia nin malinig na konsensia asin paggalang sa sadiri. An pakanood na mamuhay bilang sarong tunay na Kristiano nakakatabang saiya na atamanon nin mas marhay an saiyang pamilya, na nagdadara nin dakulang pagkakontento asin kagayagayahan. Dangan yaon an pag-atender sa mga pagtiripon sa Kingdom Hall. Kanigoan kanakaoogmang eksperyensia! Yaon digdi an mga tawo na talagang naggigibo kan mainit na pagkamoot na sinasabi kan Biblia na maninigong magpamidbid sa banwaan nin Dios. (Salmo 133:1; Juan 13:35) Malinig asin nakakapakosog an saindang pagtaram mantang nagtataram sinda kan “makangangalas na mga bagay nin Dios.” (Gibo 2:11) Iyo, an pakikipag-olay sa “bilog na kasararoan nin mga tugang” sarong gikanan nin kaogmahan. (1 Pedro 2:17) An siring kaogmang pakikikatood nakatatabang sa estudyante sa Biblia na “magsolog kan bagong pagkatawo na linalang oyon sa kabotan nin Dios sa tunay na katanosan asin kaimbodan.”—Efeso 4:24.
An Tangga na Pagdusay
Mantang nag-ooswag sa kaaraman an indibiduwal, sia sa katapustapusi namomotibar kan pagkamoot ki Jehova na idusay an saiyang buhay sa saiya asin simbolisaran an pagdusay na ini paagi sa bautismo sa tubig. (Mateo 28:19, 20) An sadol ni Jesus iyo na bago gibohon an tanggang ini, dapat na kuwentahon kan saiyang mga disipulo an gastos. (Lucas 14:28) Girumdoma, an nagdusay na Kristiano inienot an kabotan ni Jehova asin isinisikwal an mga bagay kan laman. Nagmamaigot sia na isuko an “mga gibo nin laman” asin kultibaron “an bunga kan espiritu.” (Galacia 5:19-24) An hatol na makukua sa Roma 12:2 igwa ngonyan nin mas lubos na kabtang sa saiyang buhay: “Dai kamo maglakaw na arog sa palakaw na ini nin mga bagay, kundi maliwat kamo huli kan pagbago kan saindong pag-isip, tanganing mapatunayan nindo sa saindong sadiri kun ano an marahay asin maaako patin sangkap na kabotan nin Dios.” Kun siring, an nagdusay na Kristiano namumuhay na igwa nin nabago giraray na pakamate nin katuyohan.
Pero, horophoropa kun ano an saiyang inaako. Saro, sia may personal na relasyon na ngonyan sa Kaglalang kan uniberso. Sia ipinahayag na matanos na may paglaom na magin sarong katood nin Dios! (Santiago 2:23) Igwa nin orog kararom na kahulogan, saiyang inaapod an Dios bilang “Ama niamo na nasa langit.” (Mateo 6:9) An saro pang bendisyon para sa mga bagong nagdusay iyo an pakaaram na an buhay talagang igwa nin katuyohan asin na sia namumuhay oyon sa katuyohan na iyan. (Eclesiastes 12:13) Sa pagsunod sa pangengenot ni Jesus, mapapatunayan nia na putikon an Diablo paagi sa pagdadanay na maimbod. Kanigoan na kagayagayahan an itinatao kaiyan sa puso ni Jehova!—Talinhaga 27:11.
Siyempre, mantang an Kristiano nagtatagal sa dalan nin kaimbodan, igwa nin dugang pang mga pagsakripisyo na dapat gibohon. Nangangaipo nin panahon na makikabtang sa makahulogan na personal asin pankongregasyon na pag-adal sa Tataramon nin Dios. (Salmo 1:1-3; Hebreo 10:25) An panahon para sa ministeryo sa langtad kaipuhan na tuboson sa ibang aktibidad. (Efeso 5:16) An panahon asin paghihingoa kinakaipuhan man sa pag-atender sa mga pagtiripon kan mga Saksi ni Jehova asin sa pagbiyahe pasiring sa saindang mga asamblea asin kombension. Puwedeng mangaipo nin pagsakripisyo sa sadiri na makikabtang sa paggastos sa Kingdom Hall asin sa pambilog na kinaban na paghuhulit. Minsan siring, siring sa mapatutunayan kan minilyon na Kristiano, an bilog na pusong pagpartisipar sa siring na mga bagay nagtatao nin kaogmahan. Nagsabi si Jesus: “Igwang orog na kaogmahan sa pagtao kisa pag-ako.”—Gibo 20:35.
An mga balos sa pagsuportar sa gibohon ni Jehova sulit nanggad sa mga gastos. Mantang kita nagtatalubo sa pagkamaygurang, an satong ministeryo nagigin mas mabunga asin magayagaya. Tunay nanggad, mayo nin makapagtatao nin siring kadakol na satispaksion sa pagtokdo sa saro kan katotoohan sa Biblia asin pakaheling sa sarong iyan na magsamba ki Jehova. Asin kun an bagong parasamba sarong miembro nin pamilya, tibaad aki na sinanay na “sa disiplina asin pagtatanos nin isip ni Jehova,” iyan nagdadara nin espesyal na kagayagayahan. (Efeso 6:4) Naheheling niato an mayaman na mga bendisyon nin Dios sa satong mga paghihingoa na magin saiyang “mga katabang.”—1 Corinto 3:9.
Iba Pang Balos sa Maimbod na Paglilingkod
Totoo, magkakaigwa kita nin mga problema mantang nagdadanay pa an palakaw na ini nin mga bagay. Posible, an mga problema magigin mas grabe mantang naglilipot an panahon kan Diablo. Puwede kitang magtios nin paglamag o magtagal nin pagsugot. Pero an pakaaram na an Dios kaibanan niato nagraranga sato asin nagtatao sato nin kosog na makatagal. (1 Corinto 10:13; 2 Timoteo 3:12) May mga kapwa Kristiano na nagtagal nin dakol na taon nin makuring pagtratar, alagad sinda nagtatagal huli sa saindang pagkamoot sa Dios. Idtong mga mapangganang nagtatagal nin manlaenlaen na klase nin pagbalo nakakamate siring sa ginibo kan mga apostol kan sinda hinampak dangan binutasan. Nagsasaysay an Gibo 5:41: “Sinda, kun siring, naghale sa Sanhedrin, na nag-oogma huli ta pinapagkanigo sinda na magtios nin kasopganan huli sa saiyang ngaran.”
An balos sa pakatagal sulit nanggad sa gastos minsan ngonyan. Pero girumdoma, an diosnon na debosyon “may panuga” bako sanang sa “buhay ngonyan” kundi man “sa madatong.” (1 Timoteo 4:8) Kanigoan kadakol kan paglaom nin saro na nakakatagal! Kun kamo maimbod, makakaligtas kamo sa dakulang kahorasaan na matanda kan katapusan kan palakaw na ini nin mga bagay. O kun kamo magadan bago kan makahulogan na pangyayaring iyan, kamo bubuhayon liwat sa bagong kinaban na masunod. (Daniel 12:1; Juan 11:23-25) Isipa an pakamate nin kaogmahan na aakoon nindo sa panahon na iyan na kamo makakapagsabi: “Sa tabang ni Jehova, ako nagin maimbod!” Kanigoan kanakaoogma na magmana nin kabtang sa dagang iyan, na “mapapano nanggad kan kaaraman dapit ki Jehova kun paanong an tubig nakakatahob sa mismong kadagatan.”—Isaias 11:9.
Iyo, may gastos an paglilingkod sa Dios. Pero kun ikokomparar sa mga balos, an gastos dikiton. (Filipos 3:7, 8) Huli sa gabos na ginigibo nin Dios para sa saiyang mga lingkod ngonyan asin gigibohon pa sa ngapit, inootro niato an mga tataramon kan salmista: “Ano an ibabayad ko ki Jehova para sa gabos na pakinabang na itinao nia sa sako?”—Salmo 116:12.