Magin mga Paragibo—Bakong mga Paradangog Sana
1 An tunay na mga Kristiano ngonyan isinasapuso an hatol sa Biblia na magin mga paragibo kan tataramon, bakong mga paradangog sana. (Sant. 1:22) Ipinalalaen nanggad sinda kaini sa mga, dawa ngani naghihingakong Kristiano, naglilingkod sa Dios paagi sana sa ngabil. (Isa. 29:13) Malinaw na sinabi ni Jesus na solamente an mga naggigibo kan kabotan nin Dios an maliligtas.—Mat. 7:21.
2 An pagsamba na mayong diosnon na mga gibo daing kamanungdanan. (Sant. 2:26) Kaya maninigo niatong hapoton an satong sadiri, ‘Paano an sakong mga gibo nagpapatunay na an sakong pagtubod tunay? Ano an nagpapaheling na talagang namumuhay ako kaoyon kan sakong tinutubod? Paano ako biyo pang makaaarog ki Jesus?’ An sadiosan na simbag sa mga hapot na ini matabang sato na maheling kun anong pag-oswag an nagibo na niato o kaipuhan pang gibohon sa paggibo kan kabotan nin Dios.
3 Bilang mga parasunod sa lakad ni Jesus, an satong pangenot na pasohan sa buhay dapat na kapareho kan ipinahayag kan salmista: “Sa Dios kita matao nin pag-omaw sa bilog na aldaw, asin sagkod sa panahon na daing katapusan an saimong ngaran samong pag-oomawon.” (Sal. 44:8) Kanigoan na satispaksion an satong nakakamtan mantang ipinaheheling niato sa gabos niatong aktibidad an satong odok sa pusong pagmawot na omawon si Jehova!—Fil. 1:11.
4 Labi Pa an Kalabot sa Pag-omaw ki Jehova Kisa sa Matanos Sanang Pamumuhay: Kun marahay na paggawe sana an hinahagad nin Dios, puede sana kitang magkonsentrar sa pagpakarhay kan satong personalidad. Minsan siring, kalabot man sa satong pagsamba an lakop na pagpahayag kan mga kamurawayan ni Jehova asin pagpahayag sa publiko kan saiyang ngaran!—Heb. 13:15; 1 Ped. 2:9.
5 An paghuhulit kan maogmang bareta sa publiko kabale sa pinakamahalagang mga trabaho na ginigibo niato. Idinusay ni Jesus an saiyang sadiri sa gibohon na ini huli ta aram nia na nangangahulogan iyan nin buhay na daing katapusan sa mga magdadangog. (Juan 17:3) Ngonyan an “ministeryo kan tataramon” siring man kaimportante; iyan an solamenteng paagi na an mga tawo puedeng maligtas. (Gibo 6:4; Roma 10:13) Narerealisar an darakulang pakinabang, masasabotan niato kun taano ta sinadol kita ni Pablo na ‘ihulit an tataramon,’ asin “gibohon iyan na may pagkasibot.”—2 Tim. 4:2.
6 Sagkod saen na maninigong omawon si Jehova sa satong buhay? Nagsabi an salmista na iyan nasa isip nia sa bilog na aldaw. Bako daw na siring man an saboot niato dapit kaiyan? Iyo, asin ibibilang niato an kada pakikipag-olay sa ibang tawo na oportunidad na magtaram manongod sa ngaran ni Jehova. Mahanap kita nin angay na mga oportunidad na giyahan an satong pag-orolay pasiring sa espirituwal na mga bagay. An mga igwa nin marahayrahay na mga kamugtakan puedeng magtao nin odok na pagkonsiderar sa paglilingkod bilang payunir, huli ta tinatabangan kita kaini na ipaorog sa satong buhay an paghuhulit aroaldaw. Inaasegurar kita kan Tataramon nin Dios na paagi sa pagigin maigot na mga paragibo kan kabotan nin Dios, magigin kitang maogma.—Sant. 1:25.