Siisay an Mahinanyog sa Satong Mensahe?
1 Dai pa noarin man sa kasaysayan nin tawo, an mga tawo tinatawan nin kadakoldakol na impormasyon, na an kadaklan kaiyan bakong importante asin nakadadaya pa ngani. Bilang resulta, dakol an may pagmateng nalulunosan, asin kun siring depisil para sa sato na mapahinanyog sinda sa mensahe kan Kahadean. Dai ninda pinahahalagahan an puedeng magin positibong epekto sa sainda kan saindang paghinanyog sa Tataramon nin Dios.—Luc. 11:28.
2 Naggagayagaya kita na sa dakol na parte kan kinaban, manampulong ribo katawo an naghihinanyog sa mensaheng iyan asin nag-aako kan iinaalok niatong mga pag-adal sa Biblia sa harong. Minsan siring, sa ibang mga teritoryo bakong gayong dakol an naghihimate. An kadaklan sa mga pagsongko na ginigibo niato sa ministeryo mayo nin positibong mga resulta, asin tibaad naghohorophorop kita kun siisay an mahinanyog sa satong mensahe.
3 Dapat kitang mag-ingat tumang sa pagigin pinanluluyahan nin boot. Ipinaliwanag ni Pablo: “‘An gabos na nag-aapod sa ngaran ni Jehova maliligtas.’ Minsan siring, paano sinda mag-aapod sa saiya . . . na dai ninda nadangog? Paano man sinda makadadangog kun mayo nin parahulit? . . . ‘Abaang gayon kan mga bitis kan mga nagpapahayag kan maogmang bareta nin marahay na mga bagay!’” (Roma 10:13-15) Kun mahigos kitang nagtatanom nin banhi kan Kahadean, patutuboon iyan nin Dios sa mga may sadiosan na puso.—1 Cor. 3:6.
4 An Liabe Iyo na Gumibo nin Regular na mga Pagdalaw Liwat: Sa mga teritoryo na kun saen dikit na tawo an naghihinanyog sa satong mensahe, kaipuhan niatong kultibaron an ano man na interes na nanonompongan niato, baga man nakakapasakamot kita nin literatura o dai. Taano ta listong magkonklusyon na mayo nin magiginibo? Kun kita nagtatanom nin banhi, dai niato aram kun saen iyan magkakaigwa nin kapangganahan. (Ecl. 11:6) Kun mabalik kitang andam na ihiras an sarong bagay hale sa Kasuratan, dawa halipot sana, tibaad mataros niato an puso nin saro. Puede kitang magwalat nin tract o mag-alok nin bagong mga magasin. Pag-abot nin panahon, tibaad ikademonstrar niato an pag-adal sa Biblia. Bebendisyonan ni Jehova an satong mga paghihingoa.—Sal. 126:5, 6.
5 Sarong tract an iwinalat sa sarong babae na nagpaheling nin kadikit na interes. Dai na sia liwat nanompongan sa harong sagkod na pakalihis nin duwang bulan, kan sia sibot-sibot na dai puedeng makipag-olay. Iwinalat liwat sa saiya an iyo man sanang tract. Sa ibong nin padagos na paghihingoa kan parahayag, nagtolo pang bulan tangani na makaolay sia, alagad nanompongan na sia palan naghehelang. Suminongko liwat an tugang na babae kan suminunod na semana, asin pinag-olayan ninda sa halipot an tract. Kan buminalik an tugang na babae kan sumunod na semana, nagpahayag nin tunay na interes an babae. An pagliliwat nin mga kamugtakan sa saiyang buhay pinangyari siang makamate kan saiyang espirituwal na pangangaipo. Naponan an pag-adal sa Biblia, asin ipinadagos iyan kada semana pakalihis kaiyan.
6 Siring sa ano man na boot niatong maheling na tumalubo, baga man mga burak, gulay, o interes sa mensahe kan Kahadean, kaipuhan an pagkultibar. Iyan nangangaipo nin panahon, paghihingoa, may pagmakolog na kaisipan, asin determinasyon na dai sumuko. Kun padagos kitang maghuhulit, makasisierto kitang makanompong nin dakol pang maghihinanyog sa satong mensahe.—Ikomparar an Galacia 6:9.