Satong ‘Ihinuhulit an Tataramon’
1 Siring sa sinasabi kan Biblia mapadapit sa “huring mga aldaw,” an kadaklan na tawo ngonyan igwa sanang “porma nin diosnon na debosyon.” (2 Tim. 3:1, 5) Ini huli ta an mga namomoon sa relihion dai nagsusuportar sa Biblia. Mas gusto nindang kotaron an mga katokdoan nin mga pilosopo asin teologo o pag-olayan an sosyal asin politikal na mga isyu imbes na ihulit an Tataramon nin Dios. An dakol na namomoon sa relihion nakamamate na daan na an Biblia, kaya mas gusto nindang palakopon an teoriya nin ebolusyon imbes na an katokdoan kan Biblia dapit sa Kaglalang. An kadaklan na klerigo dai ngani naggagamit kan personal na ngaran nin Dios, asin dai sinda nagkokontra sa paghale kaiyan sa kadaklan na modernong mga traduksion kan Biblia.
2 Kun paanong totoo sa mga namomoon sa relihion kan kaaldawan ni Jesus, an klero ngonyan naghuhulit na daing kamanungdanan. (Mat. 15:8, 9) Siring iyan kan ihinula ni propeta Amos, igwa nin “sarong gutom, bakong sa tinapay, asin pagkapaha, bakong sa tubig, kundi sa pagdangog kan mga tataramon ni Jehova.” (Amos 8:11) Orog sa ano man na ibang bagay, an mga tawo nangangaipo kan espirituwal na pagkakan na nasa Tataramon nin Dios.
3 Kun Paano Paninigoan an Espirituwal na Pangangaipo nin mga Tawo: Dinagka ni Pablo si Timoteo na mangapot sa ‘banal na mga kasuratan, na nakakapagpadonong sa saro para sa kaligtasan,’ asin tinawan nia sia nin instruksion na ‘ihulit an tataramon’ sa iba. (2 Tim. 3:14, 15; 4:2) Bilang Mga Saksi ni Jehova, dapat kitang mangapot sa itinotokdo kan Biblia kun kita naghuhulit, sa siring inaarog si Jesus, na nagsabi: “An sakong itinotokdo bako ko, kundi kaidtong nagsugo sa sako.” (Juan 7:16) Boot niatong maaraman nin mga tawo na an Tataramon nin Dios iyo an gikanan kan impormasyon na ihinihiras niato sa sainda.—1 Cor. 2:4-7.
4 Dapat ngunang madangog nin mga tawo an katotoohan hale sa Biblia tanganing magtubod ki Jehova. Makatanosan na nagsurat si Pablo: “Paano man sinda matubod sa saiya na dai ninda nadangog? Paano man sinda makadadangog kun mayo nin parahulit?” (Roma 10:14) Paagi sa paghuhulit kan Tataramon nin Dios, tinatabangan niato an iba na magkamit nin pagtubod paagi sa tamang kaaraman. An siring na kaaraman nakapababago nin mga buhay na magin mas marahay. An autor na taga-Inglaterra na si Charles Dickens nagsurat mapadapit sa Biblia: “Iyan an pinakamarahay na libro kasuarin man o noarin man sa kinaban, huli ta itinotokdo kaiyan sa saindo an pinakamarahay na mga leksion na paagi kaiyan an siisay man na tawong linalang na naghihingoang magin sadiosan asin fiel posibleng magiyahan.”
5 An mga nagugutom sa espirituwal na katotoohan madaling nakamimidbid na iyan sinusuportaran kan autoridad kan Tataramon nin Dios. Kaidto pang 1913, si Frederick W. Franz, bilang hoben na estudyante sa kolehio, tinawan nin sarong pulyeto na may temang Where Are the Dead? Pakabasa sa simbag kan Biblia, ipinahayag nia: “Ini na an katotoohan.” Padagos niatong ihulit nin maigot an Tataramon asin sa siring mamatean man an kagayagayahan na madangog an iba na magsabi: “Ini na an katotoohan.”