Magtaram Dapit ki Jehova Aroaldaw
1 An mga tawo naoogmang magtaram dapit sa ano man na bagay na mahal sa saindang puso huli ta gikan sa kapanoan kan puso an ngoso nagtataram. (Luc. 6:45b) Ano an harani sa satong puso? An salmista nagsurat: “An sakong dila magtaram sa maluya sanang tingog kan saimong katanosan, sa bilog na aldaw kan saimong kaomawan.” (Sal. 35:28) Hararom an saiyang apresasyon ki Jehova asin ibinilang nia na sarong tunay na pribilehio an magtaram dapit sa Dios asin omawon Sia sa gabos na panahon. Mantang pamilyar na marhay ki Jehova, an salmista may dakol na bagay na dapat ipaggayagaya nin labi-labi. (Sal. 35:9) Paano ta maaarog an saiyang marahay na halimbawa?
2 Magtaram Dapit ki Jehova sa Saindong Harong: Si Jehova maninigong magin pan-aroaldaw na topiko nin pag-orolay sa laog nin pamilya. An mga magurang na may makosog na pagkamoot ki Jehova natural sanang magtataram manongod sa saiya sa gabos nindang aktibidad. (Deut. 6:5-7) Mantang ginigibo ninda ini, mamamasdan kan mga aki na an saindang ama asin ina namumuhay sono sa pagtubod asin minamahal an ley nin Dios. Dangan mamansayon kan mga aki an pampamilyang pag-adal sa Biblia bilang tunay na kapahayagan nin diosnon na debosyon kan saindang mga magurang.—2 Ped. 3:11.
3 Magtaram Dapit ki Jehova sa Saindong mga Tugang: Sa satong semanal na teokratikong rutina, igwa kita nin dakol na oportunidad na pakakanon nin espirituwal na pagkakan an satong isip asin puso. Nungka kitang nagkukulang nin marahay na mga bagay na ikasasabi. (Luc. 6:45a) Igwa daw kamong nanodan na sarong punto sa saindong personal na pag-adal o semanal na pagbasa sa Biblia na espesyalmenteng nagustohan nindo? Ihiras nindo iyan sa saindong mga tugang, sa siring tinatabangan sinda na paoswagon an saindang pagkamoot ki Jehova.—Sal. 35:18; Heb. 10:24.
4 Magtaram sa Iba Dapit ki Jehova: Sa satong pan-aroaldaw na pakikipag-olay sa mga tawo—sa trabaho, sa eskuelahan, asin sa mga kapamilya na daing pagtubod—maninigong madaling marisa na nakapokus an satong buhay sa pagpatotoo dapit ki Jehova. (Ikomparar an Juan 18:37.) Imbes na maatian kan bulgar asin bastos na mga pananaram kan kinaban, an satong pagtaram maninigong magpamuraway sa Dios. Aroaldaw, sa gabos na oportunidad, magtaram sa iba dapit sa maogmang bareta na isinugo nia sa sato na ihulit.—Gibo 5:42; Col. 4:6.
5 Bilang tunay na mga parasamba ki Jehova, aroaldaw na aprobetsaran logod niato an mga oportunidad na magtaram dapit sa satong daing kaparehong Dios, si Jehova.—Sal. 106:47.