Pag-aatubang kan Maogmang Bareta na May Positibong Aktitud
1 Kita gabos gustong makanompong nin kagayagayahan sa kun ano an satong ginigibo, nangorogna sa paggibo nin mga disipulo. Ano an nagtatao sa sato nin siring na pagkakontento? Nagpopoon iyan sa pagpapadanay niato nin positibong aktitud sa isip kun tinatabangan an iba. (Tal. 11:25) An satong paagi nin pag-atubang kan maogmang bareta maninigong magpaheling na kita totoong naniniwala sa satong sinasabi. Kun kita magtataram gikan sa satong puso, kun siring mababanaag an satong sinseridad asin personal na kombiksion. (Luc. 6:45) Paagi sa pag-ensayo kan satong pag-atubang, magigin orog na kompiado kita kun nakikipag-olay sa mga tawo. Makatatabang ini sa sato nangorogna ngonyan na Pebrero kun iinaalok an librong Life—How Did It Get Here? By Evolution or by Creation? Puede nindong manompongan na makatatabang an minasunod na mga suhestion.
2 Kun iinaalok an librong “Creation,” puede nindong sabihon ini sa enot na pagsongko:
◼ “Sa pakikipag-olay sa samong mga kataed, nanompongan niamo na an nagkapira may kompiansa sa Dios. An iba nadedepisilan na maniwala sa saiya. Ano an saboot nindo? [Pasimbagon.] Mangnoha kun paano nangangatanosan an Biblia sa bagay na ini. [Basahon an Roma 1:20.] Naheheling niato an prueba kan ‘daing sagkod na kapangyarihan asin pagka-Dios’ nin Dios paagi sa pagmasid sa mga bagay na linalang nia.” Basahon an ultimong parapo sa pahina 48 kan librong Creation, asin darahon an atension sa pagigin komplikado kan buhay na selula. O gamiton an parapo 18 sa pahina 147 tangani na ipaheling kun paano an makangangalas na sistema nin sirkulasyon nin sarong kahoy ta nagtatampok kan gibo nin Kaglalang. Ialok an libro asin iareglo na madalaw liwat.
3 Kun minabalik tangani na dalawon an mga nakaolay nindo manongod sa pagigin Kaglalang nin Dios, tibaad boot nindong sabihon ini:
◼ “Kan nakaagi kong pagdalaw, napag-olayan niato an manongod sa ebidensia kan pag-eksister nin Dios—an saiyang makangangalas na mga linalang. Nasasakitan daw kamong maniwala na an Saro na naglalang kan uniberso magigin interesado man sa satong ngapit? [Pasimbagon.] Interesanteng mangnohon na an ngapit dineterminaran na kan Kaglalang.” Basahon an Isaias 46:9, 10. Depende sa interes kan indibiduwal, gamiton an mga retrato asin kapsion sa kapitulo 19 kan librong Creation tanganing itampok an sangkap na mga kamugtakan na ipinanuga nin Dios. Basahon an parapo 1 kan kapitulo 20, asin ialok an pag-adal sa Biblia. Kun akoon, ponan an pag-adal sa librong Kaaraman.
4 Puede nindong probaran an pag-atubang na ini kun iinaalok an librong “Creation”:
◼ “Sa pakikipag-olay sa saindong mga kataed, narisa ko na an kadaklan naghihimuyawot nin sarong daing peligrong komunidad asin matoninong na kinaban. Taano sa paghona nindo ta nasudya an tawo na magkamit nin siring na mga kamugtakan? [Pasimbagon.] An nagkapirang namomoon tibaad sinsero asin naggigibo nin marahay, alagad mangnoha an ihinahatol kan Biblia.” Basahon an Salmo 146:3, 4; dangan ihapot: “Igwa daw nin siisay man na makapaninigo sa mga pangangaipo nin tawo?” Basahon an bersikulo 5 asin 6. Ipaheling an retrato na nasa pahina 251 kan librong Creation, asin darahon an atension sa mga pakinabang sa pamamahala nin Dios. Ialok an libro.
5 Kun an ipinakipag-olay kan enot pamamahala nin Dios, puede nindong probaran an suhestion na ini sa pagdalaw liwat:
◼ “Kan magdigdi ako pirang aldaw na an nakaagi, pinag-olayan niato an pagkasudya nin tawo na papangyarihon an katoninongan digdi sa daga. Tibaad nagigirumdoman nindo an dahelan na itinatao kan Biblia sa siring na pagkasudya. [Basahon giraray an Salmo 146:3.] Nariparo daw nindo kun taano ta nagsasadol sa sato an Dios na dai kita maglaom sa mga tawo? [Pasimbagon.] Tibaad minaoyon kamo na an ano man na paglaom para sa permanenteng solusyon dapat na maghale sa Dios. An dahelan na puede kitang magkaigwa kan kompiansang ini ipinaliliwanag sa Salmo 146:10. [Basahon.] Kun boot niatong magin sakop kan Kahadean nin Dios, ano an dapat niatong gibohon?” Buksan sa pahina 250 an librong Creation, basahon an parapo 13, asin itampok an Juan 17:3. Alokon na idemonstrar kun paano makakamit an kaaraman na minagiya pasiring sa buhay na daing katapusan. Kun tumogot, iintrodusir an librong Kaaraman asin ponan an pag-adal.
6 Sa paghuhulit sa mga tindahan, puede nindong gamiton an halipot na pagdolok na ini na dara an librong “Creation”:
◼ “Ngonyan na aldaw nagtatao kami nin espesyal na paglilingkod sa mga negosyante sa komunidad. Kita gabos nahahadit sa pagdakol nin krimen asin kadahasan sa satong lugar. Sa paghona daw nindo igwa nin siisay man na may tunay na solusyon sa problema? [Pasimbagon.] An Dios igwa nin solusyon.” Buksan sa pahina 196 an librong Creation; basahon asin komentohan an Talinhaga 2:21, 22 sa parapo 19. Ipaheling an titulo kan kapitulo 16, asin ialok an libro.
7 Kun nagdadalaw liwat sa sarong negosyante na napasakamotan nindo kan librong “Creation,” puede nindong sabihon ini:
◼ “Kan nakaagi kong pagdalaw, nasambitan ko na an Dios sana an talagang igwa nin nagdadanay na solusyon sa krimen asin kadahasan. Sono sa saiyang panuga, makapagtitiwala kita na magigin totoo an sarong matoninong na daga. Mangnoha an pagpipilian na itinatao sa kada saro sa sato.” Basahon an parapo 11 sa pahina 250 kan librong Creation, kabale an Salmo 37:37, 38. Komentohan an retrato na nasa pahina 251, asin basahon an enot na sentence sa parapo 14. Mag-alok nin daing bayad na pag-adal sa Biblia, na kokonduktahan magsalang sa saindang lugar nin negosyo o sa saindang harong.
8 Bilang “mga katabang nin Dios,” yaon sa sato an gabos na dahelan na magin positibo kun iinaatubang an maogmang bareta. (1 Cor. 3:9) An pagpapadanay niato kan aktitud na ini magbubunga nin mayaman na bendisyon ni Jehova.