“Padagos na Gibohon Nindo Ini sa Paggirumdom sa Sako”
1 May tendensia an mga tawo na palipason an kahulogan nin importanteng mga bagay sa pag-agi nin panahon. Ini sarong dahelan kun taano ta, kan ponan an “pamanggihan kan Kagurangnan,” pinagbotan ni Jesus an saiyang mga disipulo: “Padagos na gibohon nindo ini sa paggirumdom sa sako.” Magpoon pa kaidto, sa anibersaryo kan kagadanan ni Jesus, makinuyog nang inootob kan mga Kristiano an ‘pagbalangibog kan pagkagadan kan Kagurangnan, sagkod na sia dumatong.’—1 Cor. 11:20, 23-26.
2 Dai na nanggad mahahaloy ngonyan, aakoon ni Jesus sa langitnon na ontokan an mga ultimo kan nagdidikit na “sadangoton na aripompon.” (Luc. 12:32; Juan 14:2, 3) Ngonyan na taon an natatada sa mga linahidan kaiba an padakol nang padakol na dakulang kadaklan nin “ibang karnero” magkakaigwa giraray kan pribilehio na iselebrar an Pamanggihan kan Kagurangnan, sa Abril 11. (Juan 10:16; Kap. 7:9, 10) Mapakokosog an apresasyon sa dakulang pagkamoot ni Jehova sa pagsugo sa saiyang bugtong na Aki sa kapakanan nin katawohan. Itatampok an halimbawa ni Jesus, an saiyang pagkamoot, an saiyang kaimbodan sagkod sa kagadanan sa pagtao kan pantubos, asin an saiyang pamamahala ngonyan bilang Hade kan naestablisar nang Kahadean nin Dios, siring man an mga bendisyon na itatao kan Kahadean sa katawohan. Totoong sarong okasyon nin paggirumdom!
3 Mag-andam Na Ngonyan: Maghingoa kita gabos na gibohon an panahon na ini kan Memorial na sarong dakulang kagayagayahan asin pagpapasalamat para sa satong sadiri asin para sa gabos na makikiasosyar sa sato. Puede niatong andamon an satong puso paagi sa pagbasa giraray kan mga pagkasaysay sa Biblia mapadapit sa ultimong pirang aldaw kan ministeryo ni Jesus asin sa mga pangyayari na suminagkod sa saiyang kagadanan. An satong pampamilyang pag-adal nagkapirang semana bago an Memorial puedeng gamiton sa pagrepaso kan mga kapitulo 112-16 sa librong Greatest Man.
4 Pira an aram nindo na puedeng umatender sa Memorial kun boluntad nindong paririgonon an saindang pag-apresyar para sa okasyon na ini, iimbitaran sinda, asin ipamamate sa sainda na inaako sinda? Gumibo na nin lista ngonyan, asin gibohon an makakaya nindo na matabangan sindang umatender. Pagkatapos, tabangan sindang padagos na tumalubo sa espirituwal paagi sa pag-enkaminar sa sainda na umatender nin regular sa mga pagtiripon.
5 Durante kan panahon nin Memorial, magibo nin espesyal na mga areglo na dugangan kan gabos an mga oportunidad sa paghuhulit. Paagi sa marahay na pag-iskedyul, puede daw kamong mag-auxiliary payunir sa Abril? sa Mayo? An saro sa pinakamarahay na mga paagi na ipaheling na may pagpahalaga niatong ginigirumdom an gabos na kahulogan kan pagsakripisyo ni Jesus para sa sato iyo na magtaram dapit sa satong Dios, si Jehova, asin sa mga bendisyon na itatao kan pamamahala kan Kahadean paagi sa saiyang Aki.—Sal. 79:13; 147:1.