“Si Jehova an Sakong Paratabang”
1 Kan isugo ni Jesus an saiyang enot na mga disipulo, sinabi nia sa sainda: “Uya! Isinusugo ko kamo siring sa mga karnero sa tahaw nin mga lobo.” (Mat. 10:16) Iyan daw nagcausa sa sainda na mahandal asin sumibog? Dai. Nagkaigwa sinda kan aktitud na ipinahayag sa huri ni apostol Pablo kan sia magsabi sa mga kapwa Kristiano: ‘Magkaigwa nin kapusoan asin magsabi: “Si Jehova an sakong paratabang; dai ako matatakot. Ano an magigibo nin tawo sa sako?”’ (Heb. 13:6) Sinda naggayagaya na ibilang na angay na lapastanganon sa kapakanan kan ngaran ni Jesus, asin sinda nagpadagos na dai nin ontok sa pagtokdo asin pagpahayag kan maogmang bareta.—Gibo 5:41, 42.
2 Ngonyan an paghuhulit sa bilog na kinaban nasa pangultimo nang mga tangga kaiyan. Siring sa ihinula ni Jesus, kita ikinaongis kan gabos na nasyon. (Mat. 24:9) An satong paghuhulit tinumang asin pinag-olog-olog, asin sa ibang mga parte kan daga, iyan iprinohibir pa ngani. Kun dai kita nin pagtubod, puede kitang matakot. Minsan siring, an pakaaram na si Jehova iyo an satong Paratabang nakarerepresko sa sato asin nakapakokosog sa sato na magmaigot.
3 An kapusoan kualidad nin pagigin makosog, daing takot, maisog. Iyan an kabaliktaran nin takot, pagkamasosopgon, pagkamatalaw. An mga disipulo ni Jesus pirmeng nangangaipo nin kapusoan tangani na makatagal. Iyan mahalagang marhay tanganing malikayan niato na panluyahan nin boot huli sa mga aktitud asin gawe-gawe nin kinaban na kaiwal nin Dios. Kanigoan kanakaparirigon sa boot niato na isip-isipon an marahayon na halimbawa ni Jesus, na nakadaog sa kinaban! (Juan 16:33) Girumdomon man an mga apostol na sa atubangan nin grabeng mga pagbalo mapusong nagpahayag: “Kami kaipuhan na magkuyog sa Dios bilang namamahala kisa sa mga tawo.”—Gibo 5:29.
4 Bako Kita an Klase na Minasibog: Maninigo niatong pagmaigotan na papagdanayon an positibong aktitud sa satong gibohon. (Heb. 10:39) Pirmeng girumdomon na kita isinugo ni Jehova bilang kapahayagan kan saiyang pagkamoot asin pagkaherak sa bilog na katawohan. Nungka niang hinahagad sa saiyang mga lingkod na gumibo nin ano man na mayo nin kapakipakinabang na katuyohan. An gabos na iinaasignar sa sato na gibohon sa katapustapusi para sa ikararahay kan mga namomoot sa Dios.—Roma 8:28.
5 An mapaglaom sa marahay na aktitud tatabangan kita na magpadagos na naghahanap kan mga arog-karnero sa satong teritoryo. Puede niatong mansayon an pagkaindiperente na ipinaheheling nin mga tawo bilang kapahayagan kan saindang pagkadiskontento asin kawaran nin paglaom. Togotan an satong pagkamoot na pahiroon kita na magin madinamayon asin mapasensia. Sa kada panahon na makapasakamot kita nin babasahon o makariparo man nin interes, maninigo na an satong pasohan gumibo tolos nin pagdalaw liwat asin pukawon an orog pang interes. Dai noarin man niato pagdudahan an satong abilidad na makapoon nin pag-adal sa Biblia o magin epektibo sa pagkondukta kaiyan. Imbes, maninigo na daing ontok asin mapagngayongayo niatong hagadon an tabang asin paggiya ni Jehova, na kompiado na tatabangan nia kita.
6 Marigon kitang naniniwala na sisiertohon ni Jehova na matatapos an gibohon. (Ikomparar an Filipos 1:6.) An satong bilog na pagtitiwala sa saiya bilang satong Paratabang nakapakokosog sa sato, kaya kita ‘dai nag-oontok sa paggibo nin karahayan.’—Gal. 6:9.