An Kalinigan Nagtataong Onra ki Jehova
1 Kan bumalik an natadang mga Israelita hale sa pagkabihag sa Babilonya, sinda pinagbotan: “Papagdanayon na malinig an saindong sadiri, kamo na nagdadara kan mga kasangkapan ni Jehova.” (Isa. 52:11) Mantang kita ngonyan an pinagkatiwalaan kan sagradong obligasyon na maghulit kan maogmang bareta, nagmamawot man kita na tawan nin onra si Jehova paagi sa pagpadanay kan satong sadiri, satong harong, asin satong Kingdom Hall na malinig asin presentable.
2 Sa Ministeryo: Kun kita naglilingkod sa langtad, an sato daw na gubing, bag, asin personal na pag-alinyar malinig asin presentable, na dai nakakapasingkog? Nagtatao iyan nin onra ki Jehova kun pinapagdanay niato an satong sadiri asin an satong gubing na malinig paagi sa regular na pagkarigos asin paglaba. Marahay man na inspeksionon an satong Biblia asin an mga libro na pirme niatong ginagamit tanganing maseguro na iyan bakong daan asin maating paghelingon. Minsan ngani an banwaan nin Dios bilang sarong grupo midbid sa pagigin malinig, pero marahay na an lambang saro sa sato magsiyasat sa sadiri sa bagay na ini.
3 Sa Satong mga Harong: Kumusta man an itsura kan satong harong? Irinarayo daw kaiyan an mensahe kan Kahadean na satong dinadara? Kun an satong harong bakong areglado asin an palibot daing kahusayan, bako daw na puedeng kuestionon an satong sinseridad kun kita mataram manongod sa pagliwat kan daga na magin sarong paraiso? Kun iyo, masasabi daw na napatalubo na niato an “arogan nin kalinigan na makababagay sa bagong kinaban sa irarom kan Kahadean nin Dios”?—om pahina 130-1.
4 Sa Satong Kingdom Hall: Sa parate gustong-gusto niatong imbitaran an mga bagong interesado na dumalaw sa satong Kingdom Hall. Ini espesyalmenteng totoo kun an satong Kingdom Hall nakaaatraer asin malinig, kapwa sa laog asin luwas. An pagpadanay sa malinig na kamugtakan kan propiedad nangangaipo nin paghihingoa. Helingon an palibot kan saindong hall. Malinig daw an mga tukawan, an salog, asin an mga lanob? An kasilyasan daw malinig asin daing parong? Kumusta an karatula kan Kingdom Hall? Parateng ini an enot na naririsa kan mga tawo, kaya maninigo na iyan pirmeng pinturado asin malinig.
5 Dawa dai magtaram, puede niatong pamurawayon an Dios paagi sa satong personal na itsura asin sa kalinigan patin pagkaareglado kan satong mga harong asin Kingdom Hall. An satong marahay na halimbawa dai magtatao nin ano man na singkogan kundi magpapatotoo na an satong pagsamba malinig asin matanos.—1 Cor. 10:31, 32; Sant. 1:27.