Ano an Sasabihon Nindo sa Sarong Hindu?
1 Arog kan tibaad aram nindo, kadakol na Hindu an nakaistar sa manlaenlaen na lugar, kaiba an nasyon na ini. Ini nangangahulogan na maabot an panahon na tibaad makanupar kamo nin sarong Hindu sa saindong ministeryo. Kun mangyari iyan, paano kamo makikipag-olay?
2 Girumdomon an mga Puntong Ini: An mga misyonero na nagin mapanggana sa pagpapatotoo sa mga Hindu nagsasabi na dai man kaipuhan na pag-adalan nin hararom an Hinduismo tanganing makatao nin epektibong patotoo. An sarong simple, mataktikang pag-atubang kan katotoohan an sa parate nagbubunga nin positibong reaksion. Hagadon na makaolay nguna an payo kan pamilya. Kun an reaksion paborable, magigin mas pasil an magpatotoo sa iba pang miembro kan pamilya. Sa primero likayan an pagsuherir na dinadara nindo an sarong mensahe na mas marahay kisa tinutubod kan kagharong o na gusto nindong ipakipag-olay an iyo sanang tunay na Dios o an kagurangguranging sagradong kasuratan. Huli ta minimidbid kan mga Hindu na an Biblia sarong libro na hale sa Solnopan, puede nindong haleon an prehuwisyo paagi sa pagpaliwanag na iyan dai nagpapalakop nin kolonyalismo o nin pagigin superyor nin sarong rasa kisa iba.
3 Gumamit nin Tamang mga Kasangkapan: Duwang brosyur an ginibo na espesipikong nasa isip an mga Hindu. An mga ini iyo an: Why Should We Worship God in Love and Truth? asin Our Problems—Who Will Help Us Solve Them? Parehong makukua iyan sa Ingles. An brosyur na “Uya! Ginigibo Kong Bago an Gabos na Bagay” asin An Dios daw Talagang May Pagmakolog sa Sato? nagin epektibo man kun nagpapatotoo sa mga Hindu. An brosyur na Kahagadan asin an librong Kaaraman mapangganang magagamit sa pagkondukta nin mga pag-adal sa Biblia.
4 Mag-establisar nin Puntong Mapagkakaoyonan: Bako man depisil na makakua nin puntong mapagkakaoyonan sa mga Hindu. Sinda nagtutubod na kita nabubuhay sa sarong panahon na grabe an karatan asin na hahaleon nin Dios an mga problema sa kinaban paagi sa sarong dakulaon na kapahamakan na susundan nin peryodo nin katotoohan. Maheheling nindo kun gurano kapasil na ikonektar an mga paniniwalang ini sa mga katokdoan kan Biblia manongod sa huring mga aldaw, sa dakulang kahorasaan, asin sa maabot na bagong kinaban. Huling an kadaklan na Hindu nagtutubod na an buhay sarong serye nin mga problema na mayo nin solusyon, sinda interesado sa mga tema dapit sa buhay pampamilya, krimen asin pagigin ligtas sa peligro, patin sa nangyayari pagkagadan. Uya an duwang sampol nin pag-atubang na puede nindong probaran.
5 An sarong de pamilyang lalaki puedeng magkainteres digdi:
◼ “Sinosongko ko an mga tawong nahahadit manongod sa kamugtakan nin buhay pampamilya sa dakol na nasyon ngonyan. Sa paghona tabi nindo ano daw an makatatabang na mapagdanay na borogkos an pamilya? [Pasimbagon.] An nagkapira nakaaaram kun ano an sinasabi kan kasuratan na Hindu manongod sa pamilya, alagad nungka sindang nagkaoportunidad na ikomparar ini sa sinasabi kan Biblia dapit sa siring na tema. Gusto kong ihiras sa saindo an ideyang ini sa Colosas 3:12-14.” Pakatapos na basahon an teksto, ipaheling sa kagharong an kapitulo 15 kan librong Kaaraman asin magsabi: “Naoogma akong basahon saindo nin pirang minuto an kapitulong ini.”
6 An sarong hoben puedeng maghimate digdi:
◼ “Daing duda na ika nagtutubod sa Dios. Sa paghona mo ano daw an katuyohan nin Dios para sa sato?” Pasimbagon. Dangan basahon an Genesis 1:28, asin magsabi: “Sa dakol na lugar an daga sobra na an populasyon asin dinadamat nin mga problema. Sa paghona mo daw an Kaglalang gustong tumabang sa sato na maresolberan an satong mga problema?” Pakatapos na dangogon an simbag, ialok an angay na publikasyon.
7 Magkamit nin positibong mga resulta: An sarong 22 anyos na lalaking Hindu duminolok sa sarong tugang na babae na nagpapatotoo sa sadan asin naghagad nin pag-adal sa Biblia. Ipinaliwanag nia sa tugang na babae na kaidtong walong taon na an nakaagi nadangog nia nin dai tinutuyo an pag-oolay ninda kan saiyang ina manongod sa Biblia. Minsan ngani naghanga sia sa praktikal na mga solusyon kan Biblia sa mga problema kan katawohan, an saiyang ina dai interesado asin sia naghona na sia hoben pang marhay tanganing hanapon an katotoohan na sia sana. Ngonyan na nasa edad na, gusto niang makanood nin dakol pa. An hoben na lalaki daing sinayang na panahon. Sa laog sana nin 23 na aldaw, natapos nia an saiyang pag-adal sa librong Kaaraman, asin apat na bulan pa sana an nakalihis kan nanompongan nia an tugang na babae sa sadan, gusto na niang magpabautismo!
8 An sarong tugang na lalaki nakapoon nin pag-adal sa Biblia sa sarong lalaking Hindu na nabisto nia sa tren. An lalaki may mga problema sa saiyang pag-agom. Igwa man sia nin problema sa pag-inom. An lalaki uminoyon na an Saksi sumongko sa saiya asin ihiras an sadol kan Biblia dapit sa buhay pampamilya. An moral na mga katokdoan kan Biblia nakaakit sa saiya, asin uminoyon sia sa sarong pag-adal sa Biblia. Sia asin an saiyang pamilya nagpoon na mag-atender sa mga pagtiripon na magkairibanan. Paghaloyhaloy ihinihiras na ninda an katotoohan sa mga katood asin paryentes. Sagkod sa presente, anom na sa mga ini an nag-ako kan katotoohan!
9 Kabotan nin Dios na “an gabos na klase nin tawo makaligtas asin makaabot sa tamang kaaraman sa katotoohan.” (1 Tim. 2:4) Kabale dian an mga lalaki asin babae na an relihion bakong Kristiano, siring kan Hinduismo. Kun igwa nin mga Hindu sa saindong teritoryo, taano ta dai tolos sinda songkoon asin gamiton an nagkapira sa mga suhestion na iinatubang sa artikulong ini?