Pagtabang sa mga Dai Pa Handang Akuon an Librong Itinotokdo kan Biblia
1. Magugustuhan daw tulos kan gabos an librong Itinotokdo kan Biblia? Ipaliwanag.
1 Tanganing magin parasamba ni Jehova, kaipuhan na manudan nin saro an itinutukdo kan Bibliya. Minsan siring, may nagkapira na bakong Kristiyano asin dai naniniwala na an Bibliya Tataramon nin Diyos. An iba dai talaga naniniwala sa Diyos asin mayong paggalang sa Bibliya. Arin na mga publikasyon an puwede tang gamiton sa mga dai pa handang akuon an librong Itinotokdo kan Biblia? An minasunod na mga suhestiyon hali sa komento nin mga parahayag sa mga 20 nasyon.
2. Kun may magsabi sa sato na dai siya naniniwala sa Diyos, ano an maninigong pagmaigutan tang aramon, asin taano?
2 Sa mga Dai Naniniwala sa Diyos: Kun may magsabing dai siya naniniwala sa Diyos, marahay na aramon kun taano. Huli daw ta naniniwala siya sa ebolusyon? Nawawaran na daw siya nin pagtubod sa Diyos huli sa inhustisya sa kinaban o pagsagin-sagin sa relihiyon? Hali daw siya sa nasyon na pinupugulan an mga tawo na magtubod sa Diyos? Tibaad dai man niya prangkang sinasabi na mayong Diyos, pero nungka niyang namatian an pangangaipo na magtubod sa Saiya. Naeksperyensiyahan nin dakul na parahayag na pag naghapot sinda nin, “Dati na pong arog kaiyan an paniniwala nindo?” nagpapaliwanag an kaulay ninda. Magdangog asin dai magsabad. Kun nasasabutan niyato kun taano ta an saro dai naniniwala sa Diyos, aram ta kun paano masimbag asin kun arin na publikasyon an iaalok.—Tal. 18:13.
3. Paano niyato ikakapahiling an paggalang sa kaulay ta asin sa mga paniniwala niya?
3 Pag nagsisimbag, likayan na ipamati sa kaulay na inaatake mo an paniniwala niya. An suhestiyon na ini hali sa Estados Unidos: “Mahalagang marhay na igalang an personal na desisyon nin mga indibidwal kun ano an gusto nindang paniwalaan. Imbes na hinguwahon na manggana sa argumento, pinakamarahay na maghapot para mag-isip an mga tawo asin sinda mismo an maggibo nin sadiring kongklusyon.” Pagkatapos madangog an opinyon nin kagharong, parating pinupunan nin sarong nagbibiyaheng paraataman an simbag niya paagi sa paghapot nin, “Napag-isip-isip na daw nindo na posible man ini?”
4. Paano ta matatabangan an mga Budista?
4 Dai aram kan dakul na Budista an ideya manungod sa Diyos. An nagkapirang parahayag sa Britania gustong gamiton an brosyur na Lasting Peace and Happiness—How to Find Them pag nagpapatotoo sa siring na mga tawo. Pagkatapos pag-ulayan an introduksiyon, pinag-uulayan ninda an seksiyon na “Is There Really a Most High Creator?” dangan an seksiyon na “A Guidebook for the Blessing of All Mankind.” Pagkatapos, tibaad puwede na nindang ipahiling an librong Itinotokdo kan Biblia asin sabihon sa kagharong na, “Dawa kun dai kamo naniniwala sa Diyos, puwede kamong makinabang sa pag-adal kan Bibliya ta igwa iyan nin dakul na praktikal na giya para sa buhay ta.” Sarong payunir sa Estados Unidos na naglilingkod sa lugar na dakul an Intsik an nagsabi: “Dakul sa teritoryo mi an mahilig magbasa. Kaya sa parati nabasa na ninda an publikasyon bago kami magbalik. Pero tibaad dai pa ninda aram kun paano ginigibo an pag-Bible study. Kaya inaalok ko na nguna an brosyur na Maogmang Bareta sa inot na pagdalaw ta dinisenyo iyan para makadagka nin pag-uulay.” An sarong paraataman nin sirkito sa Estados Unidos, na naglilingkod sa sirkito na Intsik an lengguwahe, nagsabi na puwedeng ipahiling sa inot na pagdalaw an librong Itinotokdo kan Biblia. Pero, tibaad mas marahay na punan an pag-adal sa kapitulo 2, na manungod sa Bibliya, imbes na sa kapitulo 1, na manungod sa Diyos.
5. Taano ta mahalaga an pagigin mapasensiya?
5 Kaipuhan an panahon bago magkaigwa nin pagtubod sa Diyos an sarong tawo, kaya mahalaga an pagigin mapasensiya. Sa inot tang pakikipag-ulay tibaad dai siya mag-uyon na igwa nin Kaglalang. Pero tibaad pag-abot nin panahon akuon niya na posible iyan, o sabihon niya na nasasabutan niya kun taano ta may mga naniniwala sa Kaglalang.
6. Taano ta tibaad dai interesado sa Bibliya an nagkapira?
6 Sa mga Daing Interes o Tiwala sa Bibliya: Minsan siring, sa parati an saro na nagsasabing tibaad may Diyos dai interesado sa itinutukdo kan Bibliya huling dai siya naniniwala na Tataramon iyan nin Diyos. Tibaad nakaistar siya sa bakong Kristiyanong nasyon asin ikinokonektar niya an Bibliya sa Kakristiyanuhan. O tibaad nakaistar siya sa Kristiyanong nasyon na bakong gayong relihiyoso asin dai man niya iniisip na kapaki-pakinabang sa saiya an Bibliya. Paano ta matatabangan an siring na mga tawo na magkainteres sa Bibliya asin pag-abot nin panahon mag-ako nin pag-adal sa librong Itinotokdo kan Biblia?
7. Ano sa parati an marahay na paagi tanganing mapukaw an interes sa Bibliya?
7 An sangang opisina sa Grecia nagsurat: “An pinakamarahay na paagi na tabangan an mga dai interesado sa Bibliya iyo na buklaton an Bibliya asin ipahiling sa sainda an laog kaiyan. Narisa nin dakul na parahayag na an epekto kan mensahe kan Bibliya sa puso nin tawo mas mapuwersa kisa sa ano man na sasabihon ninda. (Heb. 4:12) Dakul an natabangan na magkainteres sa Bibliya kan mahiling ninda sa Bibliya an pangaran nin Diyos.” An sangang opisina sa India nagsurat: “Dakul na Hindu an talagang gustong pag-ulayan an katotoohan manungod sa buhay asin kagadanan pati na an panuga kan Bibliya dapit sa sarong kinaban na mayo nang diskriminasyon huli sa caste system.” An pagsambit kan mga problema na ikinakahadit nin dakul sa lugar nindo sa parati nagtatao nin oportunidad sa mga parahayag na ipahiling an sinasabi kan Bibliya na gigibuhon kan Kahadian nin Diyos na itanos an mga bagay.
8. Ano an puwede tang sabihon sa saro na negatibo sa Bibliya huli sa Kakristiyanuhan?
8 Kun an saro negatibo dapit sa Bibliya huli sa Kakristiyanuhan, sabihon sa saiya na minimisrepresentar nin Kakristiyanuhan an Bibliya asin an mga itinutukdo kaiyan. An sangang opisina sa India nagsurat: “Kun beses, kaipuhan tang tabangan an mga indibidwal na mahiling na bakong an mga simbahan an tagaingat kan Bibliya.” Sinabi ninda na parating napapahanga an mga Hindu sa seksiyon 4 kan brosyur na What Is the Purpose of Life? How Can You Find It?, na nagpapaliwanag kun paano pinagmaigutan kan mga simbahan na salakan nin salang mga katukduan asin paraon an Tataramon nin Diyos. Sarong payunir sa Brazil an nagsasabi nin arog kaini sa mga tawo: “Taano ta dai po nindo aramon nin urog pa an laog kan Bibliya? Dakul na tawo an naggigibo kaini na may bukas na isip, na bako man miyembro nin ano man na relihiyon. Tibaad masorpresa kamo sa mga manunudan nindo.”
9. Taano ta dai kita dapat sumuko kun sa primero an saro dai interesado sa itinutukdo kan Bibliya?
9 Si Jehova naghihiling sa puso nin lambang tawo. (1 Sam. 16:7; Tal. 21:2) Dinadagka niya sa tunay na pagsamba an mga may marahay na kamugtakan nin puso. (Juan 6:44) Dakul sa sainda an dai lamang natukduan dapit sa Diyos o mayo nin aram sa Bibliya. An satong ministeryo nagtatao sa sainda nin pagkakataon na ‘makaligtas asin makasabot kan katotoohan.’ (1 Tim. 2:4) Kaya, kun sa primero an nagkapira dai interesado sa itinutukdo kan Bibliya, dai magsuko! Gamiton an saro sa mga publikasyon na makukua sa lengguwahe nindo tanganing pukawon an interes ninda. Paghaloy-haloy, tibaad puwede na nindong ibalyo an pag-urulay sa panginot tang ginagamit sa pagkondukta nin mga pag-adal sa Bibliya, an librong Ano Man Nanggad an Itinotokdo kan Biblia?
[Kahon sa pahina 4]
Purbaran ini kun an kagharong dai naniniwala sa Bibliya:
• Ipakipag-ulay an kapitulo 17 asin 18 kan librong Life—How Did It Get Here? By Evolution or by Creation?
• Para sa mga Hindu, gamiton an brosyur na Why Should We Worship God in Love and Truth?
• Para sa mga Judio, gamiton an brosyur na Will There Ever Be a World Without War?, pahina 3-11.
• Pag-ulayan an mga pakinabang nin pagsunod sa mga prinsipyo sa Bibliya. An mga publikasyon na magagamit nindo tanganing ipahiling sa saro an praktikal na kahalagahan kan Bibliya iyo an:
Serye kan Awake! na “Help for the Family”
Video na The Bible—Its Power in Your Life
Brosyur na Maogmang Bareta Hale sa Dios!, leksiyon 9 asin 11; Sarong Libro Para sa Gabos na Tawo, pahina 22-26; asin A Satisfying Life—How to Attain It, seksiyon 2
Para sa mga Budista, gamiton an brosyur na The Pathway to Peace and Happiness, pahina 3-7.
Para sa mga Muslim, gamiton an brosyur na Real Faith—Your Key to a Happy Life, seksiyon 3.
Kun naghuhulit sa lugar na grabe an pagkontra sa Bibliya, tibaad pinakamarahay na dai nguna pagsabihon kun sain hali an ipinapaabot nindong mensahe sagkod na makadalaw kamo nin nagkapirang beses.
• Ipaliwanag kun paano nautob an mga hula sa Bibliya. Mga publikasyon na magagamit nindo:
Video na The Bible—Accurate History, Reliable Prophecy
Brosyur na Sarong Libro Para sa Gabos na Tawo, pahina 27-29
• Ibalyo tulos sa librong Itinotokdo kan Biblia pag naghapot na siya kun ano an itinutukdo kan Bibliya dapit sa manlain-lain na topiko.
[Kahon sa pahina 5]
Kun magsabi an kagharong: “Dai ako naniniwala sa Diyos,” puwede nindong sabihon:
• “Puwede ko daw tabing sabihon sa halipot kun ano an nakakumbinsir sa sako na magtubod na igwa nin Kaglalang?” Dangan sambiton an mga punto hali sa librong Reasoning, pahina 84-86, o sabihon na dadarahan mo siya nin publikasyon na nagustuhan mong basahon.
• “Pero kun may Diyos, anong mga kuwalidad an gusto mong yaon sa saiya?” An kadaklan na kagharong nagsasabi na an gusto nindang Diyos igwa nin pagkamuot, hustisya, pagkahirak, asin mayong ipinapaurog. Ipahiling sa saiya sa Bibliya na an Diyos igwa kan siring na mga kuwalidad. (Tibaad posible pa ngani na gamiton an kapitulo 1 kan librong Itinotokdo kan Biblia, puon sa parapo 6.)
Kun magsabi an kagharong: “Dai ako naniniwala sa Bibliya,” puwede nindong sabihon:
• “Dakul an arog kaiyan an opinyon. Iniisip nin nagkapira na an Bibliya bakong kauyon kan siyensiya o an mga pamantayan kan Bibliya bakong praktikal. Nabasa na daw po nindo an Bibliya? [Pasimbagon. Dangan ipahiling an introduksiyon sa pahina 3 kan brosyur na Sarong Libro Para sa Gabos na Tawo, asin ialok an brosyur.] Dai iginagalang nin dakul an Bibliya huling minimisrepresentar nin relihiyon an mga itinutukdo kaiyan. Sa sunod gusto kong pag-ulayan ta an halimbawa sa pahina 4 asin 5.”
• “Dakul an may arog kaiyan na opinyon. Gusto ko tabing ipahiling sa saindo an sarong bagay na hinangaan ko sa Bibliya. [Basahon an Job 26:7 o Isaias 40:22, na nagpapahiling na an Bibliya eksakto pag-abot sa siyensiya.] An Bibliya igwa man nin madunong na mga prinsipyo na nakakatabang sa mga pamilya. Sa sunod gusto kong ipahiling sa saindo an sarong halimbawa.”
• “Salamat po sa pagsabi nindo kaiyan sa sako. Kun talagang nagsurat an Diyos nin libro para sa mga tawo, ano daw sa hiling nindo an laog kaiyan?” Dangan ipahiling sa saiya an sarong teksto na kauyon kan simbag niya.