Bagong Brosyur na Iaalok!
1. Ano an iaalok niato sa Nobyembre, asin ano an katuyohan kan publikasyon na ini?
1 Sa satong Magdanay Kamong Mapagbantay! na Pandistritong Kombension kan 2009, ilinuwas an sarong bagong brosyur na may titulong An Biblia—Ano an Mensahe Kaiyan? Iaalok iyan sa kaenot-enote sa Nobyembre kan mga kongregasyon sa bilog na kinaban. Paano makikinabang sa publikasyon na ini an mga tawo sa satong teritoryo? An kadaklan, nangorogna an mga miembro nin mga relihion na bakong Kristiano, dikit sana an aram manongod sa Biblia. Huli kaiyan, ipinapaliwanag kan brosyur sa pahina 3 na iyan dinisenyo tanganing magtao nin “sumaryo kan Biblia.”
2. Paano niato puedeng ialok an brosyur?
2 Kun Paano Iyan Iaalok: Puede niatong sabihon an arog kaini: “Gusto ming maaraman an opinyon nindo dapit sa sinasabi digdi. [Basahon an 2 Timoteo 3:16.] Dakol sa nakakaolay mi an minaoyon sa mga tataramon na ini; an iba man naghohona na an Biblia saro sanang marahay na libro. Ano an saboot nindo dapit sa Biblia? [Pasimbagon.] Ano man an relihiosong paniniwala niato, may marahay na mga dahelan na siyasaton niato mismo an Biblia. [Basahon an pambukas na parapo sa itaas kan pahina 3.] Mantang binabasa nindo an marikas na sumaryo kan Biblia na yaon sa brosyur na ini, may maheheling kamong interesanteng bagay: An Biblia igwa nin sarong pangkagabsan na tema asin mensahe.”
3. Ano an saro pang presentasyon na puede niatong gamiton, nangorogna sa teritoryo na an relihion nin dakol na tawo bakong Kristiano?
3 Uya an saro pang opsion, nangorogna kun naghuhulit sa lugar na an dakol na tawo miembro nin relihion na bakong Kristiano: “Gusto ming maaraman an opinyon nindo dapit sa sinasabi digdi sa Kasuratan (o sa banal na librong ini.) [Basahon an Salmo 37:11.] Sa paghona nindo, magigin arog sa ano an daga kun maotob na an hulang ini? [Pasimbagon.] Saro ining halimbawa kan paglaom asin karangahan na makukua sa Biblia kan mga tawo hale sa gabos na kultura asin pagtubod.” Basahon an parapo sa itaas kan pahina 3, asin ialok an brosyur.
4. Paano niato puedeng gamiton an brosyur tanganing makapoon nin pag-adal sa Biblia?
4 Magpoon nin Pag-adal sa Biblia: Kun kita minadalaw liwat puede niatong ipagirumdom sa kagharong an pag-oolay niato kan nakaagi asin ipakipag-olay an saro o duwang parapo sa temang napag-olayan, na ginagamit an mga hapot sa katapusan kan seksion na pinili. O kun gusto niatong iintrodusir tolos an librong Itinotokdo kan Biblia, puede niatong basahon kaiba nia an likod na tutob kan brosyur, iabot sa saiya an libro, ihapot kun arin sa mga titulo kan kapitulo an interesante sa saiya, asin pag-olayan an saro o duwang parapo sa kapitulong iyan. Logod na kita gabos makikabtang nin lubos sa pag-alok kan brosyur na ini sa Nobyembre!