Pagpamidbid kan Ngaran ni Jehova sa Bilog na Daga
1 Kan sugoon ni Jesus an saiyang mga disipulo na magin mga saksi “sagkod sa kaporoporohi kan daga,” itinao na nia an halimbawa na susunodon ninda. (Gibo 1:8) Noarin man asin saen man nia manompongan an mga tawo, ipinakipag-olay nia an manongod sa katuyohan nin Dios para sa katawohan. Bilang pag-arog ki Jesus, an fiel na grupong oripon naggagamit nin dakol na laen-laen na paagi tangani na “ipamareta sa bilog na daga” an ngaran ni Jehova.—Isa. 12:4, 5.
2 Kun Ano an Ginibo kan Nakaaging mga Aldaw: Sa nag-aging mga taon, ipinublikar an mga sermon sa mga peryodiko; ginibo an “Photo-Drama of Creation” asin ipinadalan sa minilyon; asin mahiwas na ginamit an ponograpo patin, sa kadikit na panahon, an radyo—gabos sa paghulit kan maogmang bareta. Siempre, kaidto pa pirme nang pangenot na idinodoon an personal na pakikipag-olay sa mga tawo tanganing an interes na nanompongan puedeng makultibar. Bilang resulta, an ministeryo sa harong-harong napatunayan na sarong epektibong marhay na paagi nin pagpamidbid kan ngaran ni Jehova sa gabos na lugar.—Gibo 5:42.
3 Kun Ano an Ginigibo sa Satong Aldaw: Huli sa nagbabagong mga panahon an kinaban sibot-sibot na naghihiro, asin sa dakol na lugar an mga tawo bihirang manompongan sa harong. Pira sana an may tendensiang magtao nin panahon sa pagbasa asin paghorophorop manongod sa espirituwal na mga bagay. Kun siring dapat niatong ibagay dian an satong ministeryo. Apuera sa padagos na pagkobre kan teritoryo sa harong-harong, kita inenkaminar na dumuman saen man may mga tawo asin magin “pirmeng andam” na gumibo nin pagdepensa para sa paglaom na nasa sato. (1 Ped. 3:15) Ini nangangahulogan nin paghihingoang maghulit sa mga katrabaho, sa mga kaeskuela, sa mga tawo sa tinampo asin sa parke o paradahan, sa mga tindahan, asin sa iba pang lugar na puedeng manompongan an mga tawo. Huling igwa kan suporta ni Jehova, magigin mapangganang marhay an satong mga paghihingoa. Nakikikabtang daw kamo sa pag-aabot sa mga tawo saen man sinda?
4 Logod na pagmaigotan niato bilang indibiduwal an gabos na posibleng paagi kun manongod sa pagpamidbid kan ngaran ni Jehova sa satong teritoryo. Makanonompong kita nin dakulang pagkakontento sa lubos na paggibo kan satong ministeryo, mantang inaasahan niato na dadagkahon ni Jehova an mga tama an kamugtakan nin puso.—Juan 6:44.