Inaapresyar daw Nindo an Pagpapasensia ni Jehova?
1 Kun si Jehova dai nagpasensia sa nakaaging 10, 20, asin dakol pang taon, na tinotogotan an pagtao nin halawig na patotoo, posible daw na nanodan nindo an katotoohan? Kanigoan nanggad an pasasalamat niato na tinogotan nia an dakol pang tawo na “makapagsolsol.” Alagad ta an dakulang aldaw nin paghokom ni Jehova “madatong siring sa parahabon.” (2 Ped. 3:9, 10) Huli kaini, an pagpapasensia nin Dios dai maninigong misinterpretaron na pag-atraso sa pagtapos sa sistemang ini nin mga bagay.—Hab. 2:3.
2 Maherak sa mga Tawo: An pakatios ni Jehova harayong marhay sa satong pakasabot. Dai ta dapat lingawan an katuyohan kaiyan. (Jon. 4:1-4, 11) Naheheling ni Jehova an kaherakherak na kamugtakan nin katawohan asin sia may pakikidamay sa sainda. Siring man kaiyan an saboot ni Jesus. Huling naherak sa kadaklan na hinulitan nia, boot niang humiwas an pag-ebanghelyo tanganing dakol pa an magkaoportunidad na magkamit nin buhay na daing katapusan.—Mat. 9:35-38.
3 Kun may mga trahedya asin kalamidad, dai daw kita nakikidamay sa mga tawo na dai nakaaaram kan katotoohan? An mga tawo ngonyan garo “mga karnero na mayo nin pastor” mantang hinihingoa nindang atubangon asin saboton an mga kariribokan sa kinaban. (Mar. 6:34) Paagi sa maigot na paghuhulit kan maogmang bareta, rinaranga niato an mga tama an tendensia kan puso asin ipinaheheling an satong pag-apresyar sa pagpapasensia ni Jehova.—Gibo 13:48.
4 May Pagkasibot an Satong Gibohon: Kan nakaaging taon 323,439 an nabautismohan asin labing 14,000,000 an nag-atender sa Memorial. Kanigoan na potensial para sa dakol pa na dumulag sa pagkalaglag kan maraot na sistemang ini! Dai ta aram kun magigin gurano kadakula kan “dakulang kadaklan.” (Kap. 7:9) Dai ta aram kun gurano pa kahaloy na magpapadagos an isinugo sa sato na paghuhulit. Alagad si Jehova nakaaaram. An maogmang bareta ihuhulit sa paaging kontento sia, “dangan madatong an katapusan.”—Mat. 24:14.
5 Nainaan na an panahon na natatada, asin madali nang umabot an aldaw nin Dios. (1 Cor. 7:29a; Heb. 10:37) Daing duwa-duwa na “an satong kaligtasan orog na harani kisa kan kita magturubod.” (Roma 13:11) Dai ta paglipasan an katuyohan kan pagpapasensia nin Dios. Imbes, may pagkasibot kitang maghulit tanganing an dakol pa na naghihimuyawot nin katanosan makaeksperyensia kan dakulang pagkaherak ni Jehova.