Ano an Prioridad Nindo?
1 Idinodoon nin dakol na relihiosong organisasyon an mga gibong pag-abuloy, arog baga nin pagdonar nin mga pasilidad para sa sekular na edukasyon o medikal na mga pangangaipo. Minsan siring, mantang dai nakalilingaw sa ‘paggibo nin marahay asin sa paghiras nin mga bagay sa iba,’ tinatawan nin prioridad kan Mga Saksi ni Jehova an pagtabang sa mga tawo sa espirituwal na paagi.—Heb. 13:16.
2 An Arogan kan Enot na Siglo: Dakol an marahay na ginibo ni Jesus durante kan saiyang daganon na ministeryo, alagad an pangenot na gibohon nia iyo an pagpatotoo sa katotoohan. (Luc. 4:43; Juan 18:37; Gibo 10:38) Pinagbotan nia an mga parasunod nia na “kun siring paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda.” (Mat. 28:19, 20) Asin sinabi nia na an mga nagtutubod sa saiya magibo sa mas mahiwas na sokol kan gibohon na pinonan nia. (Juan 14:12) Tinawan ni Jesus nin prioridad an paghuhulit huli ta iyan nakakatabang sa mga tawo na manodan an dalan nin kaligtasan.—Juan 17:3.
3 Minansay ni apostol Pablo an saiyang paghuhulit na sarong “kaipuhan,” sarong kahagadan na dai nia puedeng ignorohon. (1 Cor. 9:16, 17) Sia andam na gumibo nin ano man na sakripisyo, magtagal nin ano man na pagbalo, o magdusa nin ano man na kasakitan na kaipuhan tanganing magibo an ministeryo nia. (Gibo 20:22-24) Si apostol Pedro asin an mga kaibaiba nia nagpaheling nin kaparehong aktitud. Dawa sa ibong nin pagkabilanggo asin mga paghampak, “nagpadagos sinda na dai nin ontok sa pagtokdo asin pagpahayag kan maogmang bareta dapit ki Cristo, si Jesus.”—Gibo 5:40-42.
4 Kumusta man kita? Tinatawan daw niato nin prioridad an pagbalangibog kan maogmang bareta kan Kahadean asin paggibo nin mga disipulo? Siring ki Jesus, igwa daw kita nin tunay na pagmakolog sa mga “naanitan asin nagkakaralagalag siring sa mga karnero na mayong pastor”? (Mat. 9:36) An presenteng mga pangyayari sa kinaban asin hula sa Biblia malinaw na nagpapatunay na an panahon nauubos na para sa maraot na sistemang ini! An pagkonsentrar sa importansia kan paghuhulit an mapahiro sa sato na magpadagos sa paghuhulit nin maigot.
5 Turotimbangon an mga Kamugtakan Nindo: Mantang parateng nagbabago an personal na mga kamugtakan, marahay na estudyaran sa panapanahon kun puede kitang gumibo nin mga pagliliwat tanganing magkaigwa nin mas lubos na pakikikabtang sa paghuhulit. An sarong tugang na babae nagin regular payunir durante kan mga taon nin 1950, 1960, asin 1970 alagad kinaipuhan na pumondo huli sa maluyang salud. Minsan siring, pag-abot nin panahon nagrahay an saiyang salud. Kasuarin pa sana tinurotimbang nia an saiyang mga kamugtakan asin nagdesisyon na puede na giraray siang magpayunir. Kanigoan an kaogmahan nia na makaatender sa Paadalan sa Paglilingkod Bilang Payunir sa edad na 90! Kumusta man kamo? Harani na daw kamong magretiro o maggradwar? An nagbago daw na mga kamugtakan nindo matogot na kamo makapagpayunir?
6 Kan mariparo ni Jesus na si Marta “nasisibot sa pag-asikaso sa dakol na obligasyon,” maboot na isinuherir nia na maani ini nin mas dakulang mga bendisyon kun papagdanayon niang simple an mga bagay. (Luc. 10:40-42) Puede daw nindong gibohon na simple an saindong estilo nin pamumuhay? Kaipuhan daw talaga na an mag-agom parehong magtrabaho nin sekular? Kun maggibo nin mga pagliliwat, puede daw na mabuhay an pamilya sa saro sanang entrada? Dakol an nakinabang sa espirituwal paagi sa paggibo nin mga pagliliwat tanganing magkaigwa nin mas dakulang pakikikabtang sa ministeryo.
7 Logod na sunodon niato gabos an arogan na itinao ni Jesus asin kan mga apostol! Makasisierto kita na bebendisyonan ni Jehova an satong tunay na mga paghihingoa na magkaigwa nin lubos na pakikikabtang sa mahalagang marhay na paghuhulit kan maogmang bareta kan Kahadean.—Luc. 9:57-62.