Kaya Niatong Gibohon an Hinahagad sa Sato ni Jehova
1. Anong mga saboot kun beses an tibaad kaipuhan na paglabanan niato, asin taano?
1 An pagsunod sa mga ley asin prinsipyo ni Jehova iyo an pinakamarahay na buhay ngonyan, asin tinatabangan kita kaiyan na magbugtak nin marahayon na pundasyon para sa daing sagkod na ngapit. (Sal. 19:7-11; 1 Tim. 6:19) Minsan siring, tinatawan kita kan kinaban ni Satanas nin dakol na tension. An sato mismong bakong sangkap na laman nakadadagdag pa sa angat. Sa pagmamaigot na otobon an satong mga paninimbagan na sono sa Kasuratan, kun beses tibaad nakakamate kita na nagagabatan. (Sal. 40:12; 55:1-8) Tibaad iniisip pa ngani niato kun kaya niatong gibohon an gabos na hinahagad sa sato ni Jehova. Sa siring na mga panahon, ano an makakatabang sa sato na mapagdanay an satong espirituwal na pagkatimbang?
2. Paano na si Jehova rasonable sa saiyang linalaoman sa sato?
2 An mga Togon ni Jehova Dai Nakapagagabat: Si Jehova nungka na naghahagad sa sato nin bakong rasonable. An saiyang mga togon dai nakapagagabat kundi para sa satong ikararahay. (Deut. 10:12, 13; 1 Juan 5:3) Kinokonsiderar nia an satong mga kaluyahan bilang tawo, “na ginigirumdom na kita kabokabo.” (Sal. 103:13, 14) Maheherakon na inaako nin Dios an satong pinakamarahay na mga paghihingoa na paglingkodan sia, dawa kun an mga ini nalilimitaran kan satong mga sirkonstansia. (Lev. 5:7, 11; Mar. 14:8) Dinadagka nia kita na itao sa saiya an mga pagabat sa sato, asin inaasegurar nia kita na pangyayarihon niang magin posible na kita magdanay na fiel.—Sal. 55:22; 1 Cor. 10:13.
3. Paano kita pinakokosog ni Jehova na magtagal?
3 Kaipuhan an Pakatagal: An mga pagkasaysay sa Biblia manongod sa mga nagpadanay nin integridad arog ni Elias, Jeremias, asin Pablo nagpapaheling kan pangangaipo nin pakatagal. (Heb. 10:36) Pinangatamanan sinda ni Jehova sa mga panahon nin kasakitan asin panluluya nin boot. (1 Ha. 19:14-18; Jer. 20:7-11; 2 Cor. 1:8-11) Asin napahihiro kita kan kaimbodan kan mga tugang niato sa presenteng mga panahon. (1 Ped. 5:9) An paghorophorop sa siring na mga halimbawa makakatabang sa sato na dai panluyahan nin boot.
4. Taano ta importante na pirmeng girumdomon an mga panuga nin Dios?
4 An paglaom sa mga panuga nin Dios “angkla para sa kalag.” (Heb. 6:19) Pinahiro kaiyan si Abraham asin Sara na akoon an kahagadan ni Jehova na bayaan an harong ninda asin ‘mag-erok bilang mga dayo sa daga kan panuga.’ Pinakosog kaiyan si Moises na manindogan na daing takot para sa tunay na pagsamba. Pinasarig kaiyan si Jesus na tagalan an hariging pasakitan. (Heb. 11:8-10, 13, 24-26; 12:2, 3) An pagpapadanay na buhay sa satong puso kan panuga nin Dios na sarong matanos na bagong kinaban makatatabang man sa sato na magdanay na marigon.—2 Ped. 3:11-13.
5. Taano ta nakaparirigon sa boot na horophoropon an nakaagi niatong mga gibo nin kaimbodan?
5 An paggirumdom sa nakaagi niatong mga gibo nin kaimbodan, pagsakripisyo kan sadiri, asin pagkapusoan puede man na makapakosog sa sato sa paglilingkod niato. (Heb. 10:32-34) Ipinagigirumdom kaiyan sa sato an kagayagayahan na naeeksperyensiahan niato kun itinatao niato ki Jehova an hinahagad nia sa sato—an satong bilog na kalag na debosyon.—Mat. 22:37.