Tinatabangan Kita kan mga Anghel
1 “Uya! ako nasa saindo sa gabos na aldaw sagkod sa pagtatapos kan sistema nin mga bagay.” Nakakaparigon nanggad sa boot an mga tataramon na iyan sa gabos na naghihimate kan pagboot ni Jesus: “Kun siring paduman kamo asin gumibo kamo nin mga disipulo”! (Mat. 28:18-20) An sarong mahalagang paagi na si Jesus nasa kaibanan kan tunay na mga Kristiano iyo an saiyang mga anghel. (Mat. 13:36-43) Nakakaogmang marhay nanggad na ipahayag an “daing katapusan na maogmang bareta” kasabay asin kaoyon kan maimbod na espiritung mga linalang na ini!—Kap. 14:6, 7.
2 Sa Satong Ministeryo: Ihinahayag kan Biblia na an mga anghel isinusugo “tanganing maglingkod sa mga magmamana kan kaligtasan.” (Heb. 1:14) Kan enot na siglo, kalabot an mga anghel sa paggiya sa mga parasunod ni Jesus na manompongan an mga maninigo. (Gibo 8:26) Ngonyan, padagos na naheheling kan mga lingkod nin Dios an ebidensia kan paggiya nin mga anghel. Sa dakol na pangyayari, nagsabi an mga kagharong na namimibi sinda na logod tabangan sinda kan may dumalaw sa sainda na sarong Saksi. Kita, kaiba kan mga anghel, naggagayagaya nanggad kun an mga siring naghihimate sa mensahe kan Kahadean!—Luc. 15:10.
3 Kun Napapaatubang sa Pagtumang: Si Daniel, an tolong hoben na Hebreo na kairiba nia, si apostol Pedro, asin dakol pang iba na nag-agi nin grabeng mga pagbalo naeksperyensiahan an proteksion ni Jehova paagi sa mga anghel, na “makakamhan sa kapangyarihan.” (Sal. 103:20; Dan. 3:28; 6:21, 22; Gibo 12:11) Minsan ngani kun beses tibaad makamate kita na daing maginibo kun napapaatubang sa pagtumang, mapaparigon an boot niato kan eksperyensia kan katabang ni Eliseo kan maaraman kaini na “mas dakol an nasa sato kisa nasa sainda.” (2 Ha. 6:15-17) Dawa kun kita puersahan na isuhay sa satong Kristianong mga tugang, dai kita kaipuhan na mawaran nin paglaom. Sinisierto sa sato kan Tataramon nin Dios: “An anghel ni Jehova nagkakampo sa palibot kan mga natatakot sa saiya.”—Sal. 34:7.
4 Dai na mahahaloy mangangabayo na an hukbo nin mga anghel tangani na haleon an gabos na pagtumang sa pagkahade ni Cristo. (Kap. 19:11, 14, 15) Mientras na hinahalat niato an aldaw na iyan, logod na padagos niatong omawon si Jehova na may pagkapusoan, na lubos na kompiado sa mapuersang suporta kan langitnon na mga hukbo sa irarom kan pagboot ni Cristo.—1 Ped. 3:22.