An Gabos na Klase nin Tawo Makakaligtas
1. Sa ano depende an satong kamugtakan sa atubangan nin Dios?
1 An dai na kutana maninigong kabootan nin Dios nagbukas kan dalan pasiring sa kaligtasan. Kabotan ni Jehova na “an gabos na klase nin tawo makaligtas asin makaabot sa tamang kaaraman sa katotoohan.” (1 Tim. 2:3, 4) An satong kamugtakan sa atubangan nin Dios depende, bakong sa satong rasa, kamugtakan sa sosyedad, mga abilidad, o panluwas na itsura, kundi sa satong pagtubod sa atang na pantubos ni Jesus. (Juan 3:16, 36) Bilang mga kapwa trabahador nin Dios, dapat na haleon niato sa satong sadiri an ano man na biribid na paghusgar, na tibaad makaimpluwensia sa satong puso na haboan an mga tawo na gustong akoon ni Jehova.
2, 3. Ano an makakatabang sa sato na dai paghusgaran an mga tawo base sa saindang panluwas na itsura?
2 Likayan an Paghusgar: Si Jehova nagheheling sa panlaog na pagkatawo, na mayo sia nin maraot na intension o pagpaorog. (1 Sam. 16:7) Naheheling man nia an saindang potensial. Sa siring, ibinibilang niang kawiliwili an mga boot na paogmahon sia. (Hag. 2:7) Minamansay daw niato an iba nin siring sa pagmansay nin Dios sa sainda?
3 Tibaad mabigla kita sa itsura nin nagkapirang tawo na nanonompongan niato sa ministeryo. Tibaad maati o bakong mabini an saindang gubing, daing kahusayan an barabas, o igwa nin hikaw sa dongo o ngabil. An nagkapira tibaad daing istaran. An iba tibaad bakong magayon an pagtratar sa sato. Imbes na husgaran na an mga siring nungka gayod na magigin parasamba ki Jehova, maninigo kitang magkaigwa nin positibong aktitud, “huli ta kita man kaidto daing isip, masumbikal, [asin] ikinakalagalag.” (Tito 3:3) Sa pakarealisar kaini, kita magigin galaga na hulitan an gabos, dawa an mga tibaad garo baga dai maninigo kun hehelingon sa panluwas na itsura.
4, 5. Ano an manonodan niato sa halimbawa ni Jesus asin ni Pablo?
4 Mga Halimbawa kan Enot na Siglo: Nagtao si Jesu-Cristo nin panahon na tabangan an mga tawo na tibaad ibinibilang nin iba na garo dai na nin pag-asa. (Luc. 8:26-39) Minsan ngani nungkang kinokonsinte an salang mga gibo, aram nia na an mga tawo puedeng masangkot sa salang pamumuhay. (Luc. 7:37, 38, 44-48) Sa siring, sia nagpaheling nin pagsabot, na “napahiro nin pagkaherak sa sainda, ta garo sinda mga karnero na mayo nin pastor.” (Mar. 6:34) Puede daw niatong arogon nin mas lubos an saiyang halimbawa?
5 Si apostol Pablo ginapo, hinampak, asin ibinilanggo. (Gibo 14:19; 16:22, 23) An siring daw na makolog na mga inagihan nagpangyari sa saiya na magraot an boot asin magkonklusyon na sinasayang sana nia an saiyang panahon sa tahaw nin nagkapirang nasyon asin etnikong grupo? Dai nanggad. Aram nia na puedeng manompongan an sadiosan an pusong mga indibiduwal sa gabos na etnikong grupo, asin determinado siang hanapon sinda. Iyan daw an satong pagmansay sa mga tawo sa teritoryo niato na laen an kamugtakan asin kultura?
6. Ano an puedeng magin epekto kan satong aktitud sa mga bagohan sa mga pagtiripon kan kongregasyon?
6 Maogmang Pag-ako sa Iba Ngonyan: Dakol sa banwaan nin Dios an naoogma na sinda maogmang inako kaidto sa kongregasyon nin mga tugang na lalaki asin babae na dai nagheling sa panluwas na itsura. An sarong lalaki na daing kahusayan an barabas asin sagkod sa abaga an buhok patin maati an gubing, nag-abot sa sarong Kingdom Hall sa Alemania. Maraot an reputasyon nia. Minsan siring, sia may init na inako sa pagtiripon. Naghanga siang marhay kaya sia nagbalik pakalihis nin sarong semana. Sa halipot sanang panahon, lininig nia an saiyang itsura, nagpondo sia sa pagsigarilyo, asin linegalisar an saiyang relasyon sa saiyang kailusyon. Dai nahaloy, sinda asin an saindang mga aki naglilingkod na ki Jehova bilang sararong pamilya.
7. Paano niato maaarog an satong daing ipinapaorog na Dios?
7 Bilang pag-arog sa satong daing ipinapaorog na Dios, logod na ipaabot niato sa gabos an imbitasyon na makinabang sa dai na kutana maninigong kabootan nin Dios.
[Blurb sa pahina 3]
“An Dios daing ipinapaorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.”—Gibo 10:34, 35.