An Panluwas na Itsura Sana daw an Naheheling Nindo?
1 Mantang ginigibo niato an satong pampublikong ministeryo, an enot na impresyon niato sa nagkapirang tawo tibaad makapaalangan sa sato na ihiras an maogmang bareta sa sainda. Halimbawa, ano an magigin reaksion nindo kun an sarong lalaki na maisog an itsura pirmeng suspetsoso an heling sa saindo kun sinosongko nindo an saiyang kataed na nagpaheling nin interes sa katotoohan? An sarong payunir na tugang na babae na nakaeksperyensia kaini nagdesisyon na dolokon an lalaki asin kaolayon sia. Daing modo na tinaratara sia kan lalaki. Alagad, makangangalas, sia naghinanyog sa mensahe kan Biblia asin may kaogmahan na uminoyon na mag-adal. Bilang resulta kan dai paghusgar kan tugang na babae sa panluwas na itsura, nabuksan an dalan para sa lalaking ini asin sa saiyang agom na makanood kan katotoohan.
2 An saro pang tugang na babae sa primero natakot sa panluwas na itsura nin sarong hoben na lalaki na halaba an buhok alagad danay na nagpatotoo sa saiya nin halipot sana kun ini nagduduman sa tindahan na pinagtatrabawohan nia. Nagbunga an saiyang mga paghihingoa, asin an hoben na lalaki saro nang bautisadong Saksi ngonyan. Ano an maolang sa sato na dali-daling magkonklusyon na an mga siring dai maghihimate?
3 Pag-arog sa Halimbawa ni Jesus: Aram ni Jesus na itatao nia an saiyang buhay para sa gabos. Huli kaini, dai nakapogol sa saiya an panluwas na itsura nin iba. Aram nia na maski idtong mga maraot an reputasyon puedeng magin andam na magbago kun tatawan nin tamang tabang asin pag-enganyar. (Mat. 9:9-13) Pinagmaigotan niang tabangan kapwa an mga mayaman asin dukha man. (Mat. 11:5; Mar. 10:17-22) Dai ta logod paghusgaran an mga tawo na satong nanonompongan sa ministeryo paagi sa saindang panluwas na itsura, na binubuta an satong sadiri sa tibaad sarong marahay na kamugtakan nin puso. (Mat. 7:1; Juan 7:24) Ano an makatatabang sa sato na arogon an marahayon na halimbawa ni Jesus?
4 Paagi sa satong pag-adal sa Biblia, nasabotan niato na an Tataramon nin Dios igwa nin puersa na bagohon an kaisipan, gawe-gawe, asin personalidad nin saro. (Efe. 4:22-24; Heb. 4:12) Kun siring, maninigo kitang magpadanay nin positibong aktitud asin ipabaya an ibang bagay sa kamot ni Jehova, an Saro na nakababasa kan puso nin tawo.—1 Sam. 16:7; Gibo 10:34, 35.
5 An sato logod na daing ipinaoorog na paghiras kan maogmang bareta sa gabos na klase nin tawo, ano man an saindang panluwas na itsura, makakontribwir sa dakulang pag-ani sa huring mga aldaw na ini.—1 Tim. 2:3, 4.