Arogon an Hustisya ni Jehova
1 “Si Jehova mamomoton sa hustisya.” (Sal. 37:28) Huli kaini, minsan ngani ipinagboot nia na laglagon an maraot na kinaban na ini, iinareglo nia na itao nguna an sarong patanid. (Mar. 13:10) Tinatawan kaini nin oportunidad an mga tawo na magsolsol asin maligtas. (2 Ped. 3:9) Nagmamaigot daw kitang arogon an hustisya ni Jehova? An kasakitan asin pagdusa daw kan pamilya nin tawo nagpapahiro sa sato na ihiras sa iba an paglaom sa Kahadean? (Tal. 3:27) An pagkamoot sa hustisya an matulod sa sato na aktibong makikabtang sa paghuhulit.
2 Maghulit na Mayong Ipinapaorog: Kita ‘naggigibo nin hustisya’ paagi sa pagpahayag kan katuyohan nin Dios sa gabos na mayong ipinapaorog. (Miq. 6:8) Dapat niatong labanan an bakong sangkap na tendensia na husgaran na tolos an iba basado sa saindang panluwas na itsura. (Sant. 2:1-4, 9) ‘An kabotan ni Jehova iyo na an gabos na klase nin tawo makaligtas asin makaabot sa tamang kaaraman sa katotoohan.’ (1 Tim. 2:4) An tataramon nin katotoohan nin Dios puedeng magbunga nin pambihirang mga pagbago sa buhay nin mga tawo. (Heb. 4:12) An pakaaram kan katotoohan na ini an makakapahiro sa sato na may kompiansang dolokon an mga tawo, dawa an mga habong maghinanyog kan nakaagi.
3 An sarong tugang na babae na nagtatrabaho sa sarong tindahan medyo natakot sa pisikal na itsura nin sarong regular na parokyano. Minsan siring, kan magkaigwa nin angay na oportunidad, pinagmaigotan niang magpatotoo sa saiya manongod sa ipinanuga nin Dios na Paraiso. Diretsahan na nagsimbag an parokyano na dai sia naniniwala sa mga eroestorya sana asin na sia sarong hippie patin adikto sa droga. Alagad dai nag-ontok an tugang na babae. Sarong aldaw hinapot sia kan parokyano kun ano an opinyon nia manongod sa halabang buhok kaini, kaya mataktika niang ipinaliwanag an sinasabi kan Biblia manongod sa bagay na ini. (1 Cor. 11:14) Sa pagkasorpresa niang marhay, kan sumunod na aldaw an parokyano dai nang bigote asin halipot na an buhok! Nakiolay an parokyano na adalan sia sa Biblia, na maogmang kinonduktahan nin sarong tugang na lalaki, asin nag-oswag sia sagkod sa pagdusay asin bautismo. Siring kan lalaking ini, an dakol na naglilingkod ki Jehova ngonyan nagpapasalamat sa mayong ipinapaorog asin daing ontok na paghihingoa kan mga nagdara sa sainda kan mensahe nin Kahadean.
4 Dai na mahahaloy paparaon na ni Jehova an karatan sa bilog na daga. (2 Ped. 3:10, 13) Sa limitado na sanang panahon na natatada, arogon logod niato an hustisya ni Jehova paagi sa pagtao sa gabos nin oportunidad na makadulag sa nagdadangadang na paglaglag sa maraot na kinaban ni Satanas.—1 Juan 2:17.