Kun Paano Mapoon nin mga Pag-adal sa Biblia sa Librong Itinotokdo kan Biblia

Dakol sa sato an maoogmang marhay na makapagkondukta nin pag-adal sa Biblia kun makakapoon sana kita nin pag-adal. Makakatabang sa sato an bagong librong Ano Man Nanggad an Itinotokdo kan Biblia? Dinisenyo an introduksion sa pahina 3-7 tangani na makaolay sa Biblia an kagharong na ginagamit an publikasyon na iyan. Dawa an mga may limitadong eksperyensia sa ministeryo mapapasilan na gamiton iyan sa pagpoon nin mga pag-adal.

◼ Puede nindong probaran an pamamaaging ini na ginagamit an pahina 3:

Pakatapos na sambiton an sarong bareta o sarong problema na ikinakapurisaw nin mga tawo sa saindong teritoryo, darahon an atension kan kagharong sa mga hapot na nakasurat sa mas maitom na letra sa pahina 3, asin pakomentohon sia. Dangan buksan an pahina 4-5.

◼ O tibaad mas gusto nindong pumoon paagi sa pagtampok kan pahina 4-5:

Puede nindong sabihon, “Bako daw na marahayon kun an mga pagbabago na ilinadawan digdi talagang mangyari na?” O puede nindong ihapot, “Arin sa mga panugang ini an gusto nindong maheling na maotob?” Maghinanyog nin maingat sa simbag.

Kun an kagharong magpaheling nin espesyal na interes sa saro kan mga teksto, ipaheling sa saiya an itinotokdo kan Biblia manongod sa temang iyan paagi sa pag-oolay sa mga parapo sa libro na nagtotokar kan tekstong iyan. (Helingon an kahon sa pahinang ini kan suplemento.) Pag-olayan iyan siring kan ginigibo nindo sa pag-adal sa Biblia. Magigibo ini sa laog nin lima sagkod sampulong minuto sa enot na pagdalaw sa may pinto mismo.

◼ An saro pang pamamaagi iyo na enganyaron an kagharong na magtaram na ginagamit an pahina 6:

Darahon an atension kan kagharong sa mga hapot sa ibaba kan pahina, asin maghapot, “Napaghorophorop na daw nindo an arin man sa mga hapot na ini?” Kun sia magpahayag nin interes sa saro kan mga hapot, buksan an mga parapo sa libro na nagsisimbag kan hapot na iyan. (Helingon an kahon sa pahinang ini kan suplemento.) Mantang magkaibanan nindong pinag-oolayan an impormasyon, nagkokondukta na kamo nin pag-adal sa Biblia.

◼ Puedeng gamiton an pahina 7 na masagkod sa sarong demonstrasyon nin pag-adal sa Biblia:

Basahon an enot na tolong sentence sa pahinang iyan, dangan buksan an kapitulo 3 asin idemonstrar an sarong pag-adal na ginagamit an parapo 1-3. Iareglo an pagdalaw liwat tangani na pag-olayan an simbag sa mga hapot sa parapo 3.

◼ Kun paano iaareglo an pagdalaw liwat:

Sa pagtatapos kan enot na pag-adal, iareglo an pagpadagos kan pag-orolay. Puede sana nindong sabihon: “Sa laog sana nin pirang minuto, nanodan niato an itinotokdo kan Biblia manongod sa sarong importanteng tema. Sa masunod, puede niatong pag-olayan [magwalat nin sarong hapot na pag-oolayan]. Puede daw akong maghapit sa arog kaining oras sa masunod na semana?”

Mantang orog kitang nagrarani sa itinalaan na panahon ni Jehova, padagos nia kitang sinasangkapan para sa gibohon. (Mat. 28:19, 20; 2 Tim. 3:17) Gamiton niato nin marhay an marahayon na bagong kasangkapan na ini sa pagpoon nin mga pag-adal sa Biblia.

Kun Paano Iaalok an Librong Itinotokdo kan Biblia

Kaiba sa suplementong ini an laen-laen na suhestion sa pag-alok kan librong Itinotokdo kan Biblia. Tangani na magin epektibong marhay, sabihon iyan sa sadiri nindong tataramon, ibagay an saindong pamamaagi sa mga tawo sa saindong teritoryo, asin magin pamilyar sa mapag-oolayan na mga punto sa libro. Puede man na gamiton an iba pang mga pag-atubang na praktikal sa saindong teritoryo.—Helingon An Satong Ministeryo sa Kahadean na Enero 2005, p. 8.

Armagedon

◼ “Kun nadadangog nin mga tawo an terminong ‘Armagedon,’ dakol an nag-iisip dapit sa lagdoan na paglaglag. Mabibigla daw kamong maaraman na an Armagedon sa katunayan sarong bagay na dapat na galagang antisiparon? [Pasimbagon. Dangan basahon an Kapahayagan 16:14, 16.] Mangnoha an komentong ini manongod sa kun ano an magigin buhay pagkatapos kan Armagedon.” Buksan sa pahina 82-4, asin basahon an parapo 21.

Biblia

◼ “Parate na inaapod nin mga tawo an Biblia bilang Tataramon nin Dios. Napag-isip-isip na daw nindo kun paanong an sarong libro na isinurat nin mga tawo angay na apodon na Tataramon nin Dios? [Pasimbagon. Dangan basahon an 2 Pedro 1:21 asin parapo 5 sa pahina 19-20.] Itinatao kan publikasyon na ini an simbag kan Biblia sa mga hapot na ini.” Ipaheling an mga hapot sa pahina 6.

◼ “Ngonyan na mga aldaw, mas dakol na impormasyon an nakukua nin mga tawo kisa kasuarin man kaidto. Alagad sa paghona nindo, saen daw kita makakakua nin marahay na hatol na makakatabang sa sato na magkaigwa nin maogma asin mapangganang buhay? [Pasimbagon. Dangan basahon an 2 Timoteo 3:16, 17 asin parapo 12 sa pahina 22-3.] Ipinapaliwanag kan publikasyon na ini kun paano kita makakapamuhay sa paagi na nakakapaogma sa Dios asin kapakipakinabang sa sato.” Ipaheling an tsart asin retrato sa pahina 122-3.

Buhay na Daing Katapusan

◼ “An kadaklan na tawo nagmamawot nin marahay na salud asin halawig na buhay. Alagad kun posible, gusto daw nindong mabuhay sagkod lamang? [Pasimbagon. Dangan basahon an Kapahayagan 21:3, 4 asin parapo 17 sa pahina 53-4.] Tinotokar kan librong ini kun paano kita magkakamit nin buhay na daing katapusan asin kun ano an magigin buhay kun maotob na an panugang iyan.”

Guerra/Katoninongan

◼ “Hinihidaw nin mga tawo sa gabos na lugar an katoninongan. Sa paghona daw nindo saro sanang pangatorogan an paglaom na katoninongan sa daga? [Pasimbagon. Dangan basahon an Salmo 46:8, 9.] Tinotokar kan publikasyon na ini kun paano ootobon nin Dios an saiyang katuyohan asin papangyayarihon an panglobong katoninongan.” Ipaheling an retrato sa pahina 35, asin pag-olayan an parapo 17-21 sa pahina 34-6.

Istaran

◼ “Sa dakol na lugar, orog na nagin masakit an paghanap nin disenteng maiistaran na barato sana. Sa paghona daw nindo maabot an aldaw na magkakaigwa na nin bastanteng istaran para sa gabos? [Pasimbagon. Dangan basahon an Isaias 65:21, 22 asin parapo 20 sa pahina 34.] Ipinapaliwanag kan publikasyon na ini kun paano maootob an panugang ini hale sa Dios.”

Jehova Dios

◼ “Dakol na nagtutubod sa Dios an gustong magin mas harani sa saiya. Aram daw nindo na iniimbitaran kita kan Biblia na rumani sa saiya? [Pasimbagon. Dangan basahon an enot na kabtang kan Santiago 4:8 asin parapo 20 sa pahina 16.] Iinandam an publikasyon na ini tangani na tabangan an mga tawo na makanood nin orog pa manongod sa Dios, na ginagamit an saindang sadiring Biblia.” Ipaheling an mga hapot na nasa irarom kan titulo kan kapitulo sa pahina 8.

◼ “Dakol an namimibi na logod santipikaron, o pakangbanalon an ngaran nin Dios. Napag-isip-isip na daw nindo kun ano an ngaran na iyan? [Pasimbagon. Dangan basahon an Salmo 83:18 asin parapo 2-3 sa pahina 195.] Ipinapaliwanag kan librong ini kun ano man nanggad an itinotokdo kan Biblia manongod ki Jehova Dios asin an saiyang katuyohan para sa katawohan.”

Jesu-Cristo

◼ “An mga tawo sa bilog na daga may nadangog na manongod ki Jesu-Cristo. An nagkapira nagsasabi na sia saro sanang marahayon na tawo. An iba sinasamba sia bilang Dios na Makakamhan sa Gabos. Sa paghona daw nindo mahalaga kun ano an pagtubod niato manongod ki Jesu-Cristo?” Pasimbagon. Dangan basahon an Juan 17:3 asin parapo 3 sa pahina 37-8. Darahon an atension sa mga hapot na nasa irarom kan titulo kan kapitulo.

Kagadanan/Pagkabuhay Liwat

◼ “Dakol an nag-iisip-isip kun ano man nanggad an nangyayari pagkagadan. Sa paghona nindo posible daw na maaraman niato iyan? [Pasimbagon. Dangan basahon an Eclesiastes 9:5 asin parapo 5-6 sa pahina 58-9.] Ipinapaliwanag man kan librong ini kun ano an magigin kahulogan kan panuga kan Biblia na pagkabuhay liwat para sa mga nagadan.” Ipaheling an retrato sa pahina 75.

◼ “Kun magadan an saro niatong namomotan, natural sana na gusto niato siang maheling giraray. Bako daw? [Pasimbagon.] Dakol an naranga kan panuga kan Biblia na pagkabuhay liwat. [Basahon an Juan 5:28, 29 asin parapo 16-17 sa pahina 72.] Sinisimbag man kan kapitulong ini an mga hapot na ini.” Ipaheling an mga hapot na nasa irarom kan titulo kan kapitulo sa pahina 66.

Pamibi

◼ “Napag-isip-isip na daw nindo kun paano sinisimbag nin Dios an mga pamibi? [Pasimbagon. Dangan basahon an 1 Juan 5:14, 15 asin parapo 16-18 sa pahina 170-2.] Ipinapaliwanag man kan kapitulong ini kun taano ta maninigo kitang mamibi sa Dios asin kun ano an dapat niatong gibohon tangani na dangogon nia.”

Pamilya

◼ “Kita gabos interesado na magkaigwa nin maogmang buhay pampamilya. Bako daw? [Pasimbagon.] May sinasabi an Biblia na magigibo kan gabos na miembro kan pamilya tangani na makakontribwir sa kaogmahan kan pamilya—arogon an Dios sa pagpaheling nin pagkamoot.” Basahon an Efeso 5:1, 2 asin parapo 4 sa pahina 135.

Relihion

◼ “Minamansay nin dakol na tawo an mga relihion sa kinaban na sarong dahelan kan mga problema nin katawohan imbes na sarong solusyon. Sa paghona daw nindo ginigiyahan kan relihion an mga tawo pasiring sa tamang direksion? [Pasimbagon. Dangan basahon an Mateo 7:13, 14 asin parapo 5 sa pahina 145-6.] Sinisiyasat kan kapitulong ini an anom na aspekto na nagtatabang na mamidbid an pagsamba na inooyonan nin Dios.” Ipaheling an lista sa pahina 147.

Trahedya/Pagdusa

◼ “Kun may nangyayaring trahedya, dakol an naghahapot kun baga talagang may pagmakolog an Dios sa mga tawo asin naririparo nia an saindang pagdusa. Napag-isip-isip na daw nindo an manongod dian? [Pasimbagon. Dangan basahon an 1 Pedro 5:7 asin parapo 11 sa pahina 11.] Ipinapaliwanag kan publikasyon na ini kun paano biyong hahaleon nin Dios an pagdusa nin katawohan.” Ipaheling an mga hapot na nasa irarom kan titulo kan kapitulo sa pahina 106.

[Kahon sa pahina 5]

Mga Paagi Kun Paano Sasabihon an Areglo sa Donasyon

“Kun gusto nindong magtao nin sadit na donasyon para sa samong pambilog na kinaban na gibohon, naoogma akong akoon iyan.”

“Minsan ngani an samong mga babasahon iinaalok na daing hinahagad na depinidong kantidad, nag-aako kami nin sadit na donasyon para sa samong pambilog na kinaban na gibohon.”

“Tibaad nag-iisip-isip kamo kun paano niamo nagigibo an gibohon na ini. Iyan huli ta an samong pambilog na kinaban na gibohon sinusustentohan nin boluntad na mga donasyon. Kun gusto nindong magtao ngonyan nin sadit na donasyon, naoogma akong akoon iyan.”

(1) Hapot, (2) Teksto, Asin (3) Kapitulo

An sarong simpleng paagi na iatubang an Ano Man Nanggad an Itinotokdo kan Biblia? iyo na (1) magpalataw nin sarong hapot sa punto de vista, (2) magbasa nin sarong angay na teksto, asin (3) magtampok nin sarong kapitulo sa libro na nagtotokar kan temang iyan paagi sa pagbasa kan mga hapot sa irarom kan titulo kan kapitulo. Kun magpaheling nin interes an kagharong, tibaad puede nindong idemonstrar an sarong pag-adal sa Biblia na ginagamit an enot na mga parapo kan kapitulong iyan. An pamamaaging ini magagamit sa pagpoon nin pag-adal kun enot na pagdalaw o nagdadalaw liwat.

◼ “Sa paghona daw nindo posibleng mamidbid nin mga tawo an satong makakamhan sa gabos na Kaglalang, arog kan sinabi digdi sa Biblia?” Basahon an Gibo 17:26, 27, asin pasimbagon. Dangan itampok an kapitulo 1.

◼ “Huli sa mga problema na inaatubang niato ngonyan, sa paghona daw nindo posibleng makanompong nin karangahan asin paglaom na sinabi digdi?” Basahon an Roma 15:4, asin pasimbagon. Dangan itampok an kapitulo 2.

◼ “Kun may kakayahan kamong gibohon ini, papangyayarihon daw nindo an mga pagbabagong ini?” Basahon an Kapahayagan 21:4, asin pasimbagon. Dangan itampok an kapitulo 3.

◼ “Sa paghona daw nindo makakamtan pa kan mga aki niato an mga kamugtakan na ilinadawan sa suanoy na awit na ini?” Basahon an Samo 37:10, 11, asin pasimbagon. Dangan itampok an kapitulo 3.

◼ “Sa paghona daw nindo maabot pa an aldaw na maootob an mga tataramon na ini?” Basahon an Isaias 33:24, asin pasimbagon. Dangan itampok an kapitulo 3.

◼ “Napaghorophorop na daw nindo kun aram kan mga gadan an ginigibo kan mga buhay?” Pasimbagon. Dangan basahon an Eclesiastes 9:5, asin itampok an kapitulo 6.

◼ “Sa paghona daw nindo posible na sarong aldaw maheheling giraray niato an satong nagadan na mga namomotan, arog kan sinabi ni Jesus sa mga bersikulong ini?” Basahon an Juan 5:28, 29, asin pasimbagon. Dangan itampok an kapitulo 7.

◼ “Sa paghona daw nindo posible na mangyari an kabotan nin Dios digdi sa daga kun paano sa langit, arog kan nasambit sa bantog na pamibing ini?” Basahon an Mateo 6:9, 10, asin pasimbagon. Dangan itampok an kapitulo 8.

◼ “Sa paghona daw nindo nabubuhay na kita sa peryodo nin panahon na ilinadawan sa hulang ini?” Basahon an 2 Timoteo 3:1-4, asin pasimbagon. Dangan itampok an kapitulo 9.

◼ “Dakol an naghohorophorop kun taano an mga problema nin katawohan ta garo baga orog na nagraraot. Napag-isip-isip na daw nindo ini bilang posibilidad?” Basahon an Kapahayagan 12:9, asin pasimbagon. Dangan itampok an kapitulo 10.

◼ “Haloy na daw nindong gustong maaraman an simbag sa hapot na siring kaini?” Basahon an Job 21:7, asin pasimbagon. Dangan itampok an kapitulo 11.

◼ “Sa paghona daw nindo makakatabang sa mga tawo na magkamit nin maogmang buhay pampamilya an pag-aplikar kan sadol na ini gikan sa Biblia?” Basahon an Efeso 5:33, asin pasimbagon. Dangan itampok an kapitulo 14.

Puedeng ireport an pag-adal sa Biblia kun iyan nagibo na nin duwang beses pakatapos na idemonstrar an areglo nin pag-adal asin kun igwa nin dahelan na maniwala na magpapadagos an pag-adal.