Pagtaram na May Kombiksion

KUN an saro nagtataram na may kombiksion, naheheling nin iba na marigon niang tinutubod an saiyang sinasabi. An siring na kombiksion risang-risa sa ministeryo ni apostol Pablo. Sa mga tuminubod sa Tesalonica, sia nagsurat: “An maogmang bareta na samong ihinuhulit dai nagdatong sa saindo sa tataramon sana kundi siring man sa . . . makosog na kombiksion.” (1 Tes. 1:5) An kombiksion na iyan risang-risa sa paagi nin saiyang pagtaram sagkod sa saiyang pamumuhay. An makosog na kombiksion maninigo na magin risang-risa man sa paagi nin satong pag-atubang kan mga katotoohan sa Biblia.

An pagpahayag nin kombiksion bakong kapareho nin pagigin matagas sa sadiring opinyon, dogmatiko, o arogante. Imbes, kun an saro na nagpapaheling nin kombiksion nagtataram manongod sa mga bagay na yaon sa Tataramon nin Dios, ginigibo nia iyan sa paagi na nagpapaheling nin makosog na pagtubod.​—Heb. 11:1.

Mga Okasyon na Makapagpahayag nin Kombiksion. Importante na magtaram na may kombiksion kun kamo nasa ministeryo sa langtad. Parate na naririsa nin mga tawo an pagtaram nindo, bako sanang an mensahe nindo. Namamatean ninda kun ano an talagang saboot nindo manongod sa sinasabi nindo. Ikakapahayag kan kombiksion nindo, na mas mapuersa kisa tataramon sana, na may ipapaabot kamong mahalagang marhay.

Kaipuhan man na magpahayag nin kombiksion kun kaolay an grupo nin mga kapagtubod. Isinurat ni apostol Pablo an enot niang ipinasabong na surat “tanganing magtao nin pagparigon sa boot asin odok na patotoo na ini iyo an tunay na dai na kutana maninigong kabootan nin Dios.” Digdi sinadol nia an mga tugang: “Manindogan kamo nin marigon.” (1 Ped. 5:12) Kan magsurat sa kongregasyon sa Roma, si apostol Pablo nagpahayag nin kombiksion na pinakinabangan ninda. Isinurat nia: “Ako kombensido na ni an kagadanan ni an buhay ni an mga anghel ni an mga gobyerno ni an mga bagay na yaon na digdi ngonyan ni an mga bagay na madatong pa ni an mga kapangyarihan ni an kalangkawan ni an kararoman ni an arin man na ibang linalang dai makakapasuhay sa sato sa pagkamoot nin Dios na yaon dian ki Cristo Jesus na satong Kagurangnan.” (Roma 8:38, 39) Nagsurat man si Pablo sa nakabebensir na paagi mapadapit sa pangangaipo na maghulit sa iba, asin an kaigotan nia mismo sa aktibidad na iyan nagtao nin malinaw na prueba na sia personalmenteng kombensido sa importansia kaiyan. (Gibo 20:18-21; Roma 10:9, 13-15) Maninigo na magin risang-risa man an kaparehong kombiksion sa Kristianong kamagurangan ngonyan mantang sinda nagtotokdo gikan sa Tataramon nin Dios.

Durante kan mga panahon nin pag-adal asin sa iba pang panahon, kaipuhan na magtaram na may kombiksion an mga magurang kun ipinakikipag-olay sa saindang mga aki an espirituwal na mga bagay. Hinahagad kaini na kultibaron nin mga magurang sa sainda mismong puso an pagkamoot sa Dios asin sa saiyang mga dalan. Sa siring makatataram sinda sa saindang mga aki na may odok sa pusong kombiksion, ‘huli ta gikan sa kapanoan kan puso an ngoso nagtataram.’ (Luc. 6:45; Deut. 6:5-7) An pagkaigwa kan siring na kombiksion mamotibar man sa mga magurang na tumao nin halimbawa sa ‘pagtubod na dai nin pagsaginsagin.’​—2 Tim. 1:5.

Nangorognang importante na kamo magtaram na may kombiksion kun kinukuestion an saindong pagtubod. Tibaad magpahayag nin pagngalas an sarong kaeskuela, maestro, o katrabaho na dai kamo minaayon sa sarong selebrasyon. An marigon, pinag-isipan na marhay na simbag tibaad makatabang sa saiya na igalang an paninindogan nindo na basado sa Biblia. Ano kun may magtentar sa saindo sa salang gawe-gawe​—pandadaya, pag-abuso sa droga, o seksuwal na inmoralidad? Importanteng linawon na dai talaga kamo makikikabtang sa siring na gawe-gawe asin na minsan guranong pangongombensir dai makakapabago sa isip nindo. Hinahagad kaini na kamo magtaram na may kombiksion kun hinahaboan an alok. Kan linalabanan an inmoral na mga alok kan agom ni Potifar, marigon na sinabi ni Jose: “Paano ko magigibo an dakulang karatan na ini asin totoong magkasala tumang sa Dios?” Kan ini magprosegir, duminulag sia sa harong.​—Gen. 39:9, 12.

Kun Paano Ipinaheheling an Kombiksion. An mga tataramon na ginagamit nindo dakula an magigibo na ikapahayag an saindong kombiksion. Sa balakid na pangyayari iinintrodusir ni Jesus an importanteng mga deklarasyon sa pagsabi: “Totoong-totoo na sinasabi ko sa saimo.” (Juan 3:3, 5, 11; 5:19, 24, 25) An kombiksion ni Pablo nababanaag sa mga pananaram na arog kan “Ako kombensido,” “Aram ko asin bensido ako sa Kagurangnan na Jesus,” asin “Totoo an sinasabi ko, dai ako nagpuputik.” (Roma 8:38; 14:14; 1 Tim. 2:7) Mapadapit sa kaotoban kan saiyang tataramon, kun beses pinasasabngan ni Jehova an saiyang mga propeta na magtaram na may pagdodoon, arog kan, “Iyan daing salto na maootob.” (Hab. 2:3) Kun nasasambitan nindo an mga hulang ini, puede kamong gumamit nin kaagid na pananaram. Kun makompiar kamo bakong sa saindong sadiri kundi ki Jehova asin kun mataram kamo sa iba sa magalang na paagi, an mga pananaram na nagpapabanaag nin kaagid na kombiksion magpapatunay na marigon an saindong pagtubod.

An kombiksion ikapaheheling man sa pagigin odok asin maigot kan saindong pananaram. An saindong panlauog, an saindong mga mustra, asin an hiro kan saindong hawak gabos nakakokontribwir digdi, minsan ngani tibaad medyo nagkakalaenlaen ini sa laen-laen na tawo. Dawa kamo natural na masusupgon o maluway magtaram, kun biyo kamong bensido na an sinasabi nindo iyo an katotoohan asin na kaipuhan iyan na madangog nin iba, maririsa an saindong kombiksion.

Siempre, dapat na tunay an ano man na kapahayagan niato nin kombiksion. Kun mamatean nin mga tawo na kita nagsasaginsagin imbes na nagtataram gikan sa puso, posibleng marhay na isipon ninda na mayo nin praktikal na halaga an satong mensahe. Kun siring, orog sa gabos, magin kamong natural na natural. Depende kun gurano kadakol kan nagdadangog sa saindo, tibaad kaipuhan na magtaram kamo nin mas makosog kisa dati asin mas mapuersa. Alagad maninigo na an obheto nindo magtaram nin sinsero asin natural.

Mga Pantabang sa Pagpahayag nin Kombiksion. Mantang kalabot sa kombiksion nindo an saindong saboot manongod sa materyales nindo, importanteng marhay an igong pag-andam. Bakong igo an pagkopya sana nin materyales sa sarong publikasyon dangan itaram na iyan. Kaipuhan na masabotan nindo nin malinaw an materyales asin ikapahayag iyan sa sadiri nindong tataramon. Dapat na lubos kamong kombensido na iyan totoo asin na an sinasabi nindo mahalaga sa mga nagdadangog sa saindo. Ini nangangahulogan na sa pag-andam kan pag-atubang nindo, kokonsideraron nindo an saindang mga kamugtakan saka kun ano an tibaad aram na ninda manongod sa tema o kun ano an saboot ninda manongod dian.

Mas pasil para sa iba na mamatean an satong kombiksion kun suelto an satong pagkapahayag. Kun siring, apuera sa pag-andam nin marahay na materyales, magmaigot sa saindong pagpahayag. Tawan nin espesyal na atension an mga kabtang kan materyales nindo na naghahagad nin orog na pagigin odok tangani na ikapahayag nindo iyan na dai kamo nagdedependeng marhay sa saindong mga nota. Girumdoma man na arangon an bendisyon ni Jehova sa saindong mga paghihingoa. Sa paaging ini kamo ‘magkakapusoan paagi sa satong Dios’ na magtaram sa paagi na nagpapabanaag kan saindong kombiksion kun dapit sa pagigin totoo asin importante kan saindong mensahe.​—1 Tes. 2:2.