“Mamuot Kamo sa Bilog na Kasararuan nin mga Tugang”
An ipinasabong na mga tataramon kan temang iyan isinurat haros dos mil na taon na an nakaagi. (1 Ped. 2:17, NW) Pero dapat na iaplikar niyato iyan ngunyan nin urog kisa kasuarin man! Paano niyato mamumutan an kasararuan nin mga tugang sa bilog na kinaban? Asin sa mayong pagkamuot na kinaban na ini, paano niyato masisigurado na dai nuarin man magin malipot an satong pagkamuot? (Mat. 24:12) Hilingon kun masisimbag nindo an minasunod na mga hapot mantang dinadalan o hinihiling an video na Our Whole Association of Brothers.
(1) Kasuarin kita nagin pormal na kabtang kan satong Kristiyanong kasararuan nin mga tugang? (2) Nakikikabtang kita sa anong tulong aktibidad na ginigibo man kan satong pambilog na kinaban na kasararuan nin mga tugang? (3) Paano ipinahiling kan satong mga tugang an saindang determinasyon na maghulit (a) sa hararayong lugar nin Alaska, (b) sa mahiwason na mga piyer nin Europa, asin (c) sa mahibog na mga kadlagan nin Peru? (4) Taano ta dai niyato nuarin man maninigong isipon na ordinaryo sanang gibuhon an paghuhulit? (5) Magtao nin mga halimbawa kun paano rinanga asin sinuportaran kan mga Saksi ni Jehova an lambang saro (a) pagkatapos nin linog, (b) pagkatapos nin bagyo, asin (c) durante nin giyera sibil? (6) Sa anong praktikal na mga paagi ikakapahiling niyato gabos an dakulang tanda na nagpapamidbid kan satong Kristiyanong kasararuan nin mga tugang? (Juan 13:35) (7) Ano an mga pakinabang sa pagtarabangan sa pagtugdok kan sadiri niyatong mga Kingdom Hall? (8) Paano napagdanay kan satong mga tugang sa Eastern Europe asin Rusia an saindang espirituwalidad kan ipagbawal an gibuhon? (9) Anong pambihirang paghihinguwa an ginigibo nin dakul na Saksi tanganing makaatender sa mga kombensiyon, asin taano? (10) Paano napakusog kan video na ini an determinasyon mo (a) na sambahon si Jehova sa Kristiyanong mga pagtiripon kaiba kan saimong mga tugang, (b) na tabangan an iba sa mga panahon nin pangangaipo, asin (c) na maghulit na may kaimbodan sa ano man na panahon asin paaging magigibo mo? (11) Paano asin nuarin niyato puwedeng gamiton an video na ini sa ministeryo?
An panginot na dahilan na kabilang kita sa Kristiyanong kasararuan nin mga tugang iyo an pagkamuot niyato ki Jehova. Kaya gusto niyato na makanuod dapit sa saiya asin itukdo man iyan sa iba. Asin namumutan niyato an mga tawong namumutan ni Jehova. Kun tinatabangan niyato sinda sa mga panahon nin pangangaipo, dai kita nag-aasa na papasalamatan kita nin Diyos. Imbes, nagpapasalamat kita sa Diyos huling ibinibilang niyato na mahal na marhay na regalo hali sa saiya an satong Kristiyanong kasararuan nin mga tugang. Mantang haranihon na an katapusan kan mayong pagkamuot na kinaban na ini, padagos lugod na ipahiling niyato an pagkamuot sa bilog na kasararuan nin mga tugang!