Puede Kamong Makinabang sa Bagong Tipan

1. Anong asignasyon na may duwang kabtang an inotob ni Jeremias?

TINAWAN ni Jehova si Jeremias nin asignasyon na may duwang kabtang. An enot iyo an “manggabot asin mangraot asin manglaglag patin manggaba.” An ikaduwa iyo an “magtogdok asin magtanom.” Inotob kan propeta an enot paagi sa pagbuyagyag kan karatan kan mapalangkaw na mga Judio, na ipinapahayag an paghokom nin Dios sa sainda saka sa Babilonya. Pero, an mga hula ni Jeremias may kaibang paglaom para sa ngapit. Ihinula nia an pagtogdok kan binoot nin Dios na itogdok asin an pagtanom kan binoot Niang itanom. Halimbawa, an ikaduwang kabtang kan asignasyon ni Jeremias an inootob nia kan sambiton nia na an mga Judio ibabalik sa saindang dagang tinuboan.—Jer. 1:10; 30:17, 18.

2. Taano ta hinokoman ni Jehova an saiyang banwaan, asin paano nia ini ginibo?

² An pagpahayag ni Jeremias na ibabalik nin Dios an saiyang banwaan dai nangahulogan na kokonsintehon Nia sinda o ikokompromiso Nia an Saiyang pamantayan nin hustisya. Imbes, hohokoman nia an masumbikal na mga Judio. (Basahon an Jeremias 16:17, 18.) Kan panahon ni Jeremias, pira sana sa Jerusalem an “naggigibo nin hustisya” o “naghahanap nin kaimbodan,” asin ubos na an pasensia ni Jehova. Sinabi nia: “Nagsawa na ako sa pagparabasol.” (Jer. 5:1; 15:6, 7) An mga Judiong idto ‘nagbalik sa mga sala kan saindang mga apoon, an mga naenot, na habong kumuyog’ sa mga tataramon ni Jehova. Apuera dian, naanggot sainda an Dios huli sa saindang pakikisambay, o pagsamba, sa falsong mga dios. (Jer. 11:10; 34:18) Itatanos ni Jehova an saiyang banwaan, kakastigohon pa ngani, “nin tama sana.” Bilang resulta, an nagkapira tibaad makapag-isip-isip asin bumalik sa saiya.—Jer. 30:11; 46:28.

3. Taano ta maninigo nindong estudyaran an hula manongod sa bagong tipan?

³ Ginamit nin Dios si Jeremias sa paghula nin sarong bagay na magtatao nin mas dakol asin nagdadanay na mga pakinabang—sarong bagong tipan. Sa pag-estudyar sa propetikong mga isinurat ni Jeremias, dakol kitang dahelan na magkonsentrar sa maogmang aspektong ini: an bagong tipan. Iyan an masalida sa ipinakipagtipan sa Israel pagkahale ninda sa Egipto, na si Moises an parapangoltanan. (Basahon an Jeremias 31:31, 32.) Kan ponan ni Jesu-Cristo an Pamanggihan kan Kagurangnan, sinambit nia an bagong tipan na ini, kaya talagang interesante iyan para sa sato. (Luc. 22:20) Sinambit ni apostol Pablo an tipan na ini kan sia magsurat sa mga Hebreo. Kinotar nia an hula ni Jeremias asin idinoon an kahalagahan kan bagong tipan. (Heb. 8:7-9) Alagad ano man nanggad an bagong tipan? Taano ta kinaipuhan iyan? Sairisay an kalabot, asin paano kamo personalmenteng makikinabang? Helingon niato.

TAANO TA KINAIPUHAN AN BAGONG TIPAN?

4. Ano an inotob kan tipan nin Ley?

⁴ Tanganing masabotan an bagong tipan, kaipuhan nguna niatong masabotan an katuyohan kan naenot, an tipan nin Ley. Ootobon kaiyan an nagkapirang marahayon na obheto para sa nasyon na naghahalat sa ipinanugang Banhi, na gagamiton tanganing bendisyonan an dakol. (Gen. 22:17, 18) Kan akoon kan mga Israelita an tipan nin Ley, sinda nagin “espesyal na rogaring” nin Dios. Segun sa tipan na iyan, sa tribo ni Levi magikan an magigin mga saserdote sa nasyon. Kan ipakipagtipan iyan ni Jehova sa nasyon nin Israel sa may Bukid nin Sinai, may sinambit siang “kahadean nin mga saserdote asin banal na nasyon” pero dai nia sinabi kun noarin asin kun paano iyan mangyayari. (Ex. 19:5-8) Mientras tanto, nagin malinaw paagi sa tipan na iyan na dai kayang otobon kan mga Israelita an gabos na aspekto kan Ley. Kaya huli kaiyan nahayag an saindang mga kasalan. Dahel kaini, segun sa Ley, an mga Israelita kaipuhan na regular na magdolot nin mga atang tanganing matahoban an saindang mga kasalan. Pero, malinaw na orog pa dian an kaipuhan, sarong sangkap na atang na dai na kaipuhan otrohon. Iyo, kaipuhan na marhay an nagdadanay na kapatawadan nin kasalan.—Gal. 3:19-22.

5. Taano ta ihinula ni Jehova an bagong tipan?

⁵ Huli kaini, masasabotan niato kun taano ta, dawa kan balido pa an tipan nin Ley, ipinahula nin Dios ki Jeremias an saro pang tipan, an bagong tipan. Huli sa pagkamoot asin kabootan ni Jehova, boot niang magtao nin permanenteng tabang bako sana sa sarong nasyon. Paagi ki Jeremias, an Dios nagsabi mapadapit sa mga magigin kabilang sa tipan na ini sa ngapit: “Papatawadon ko an saindang sala, asin an saindang kasalan dai ko na gigirumdomon pa.” (Jer. 31:34) Minsan ngani kan panahon pa ni Jeremias itinao an panugang iyan, nagtatao iyan nin marahayon na paglaom sa bilog na katawohan. Paano?

6, 7. (a) Ano an namamatean nin nagkapira manongod sa pagigin makasalan ninda? (b) Taano ta mapaparigon kamo kun eestudyaran nindo an bagong tipan?

⁶ Kita bako pang sangkap asin parate niatong narerealisar ini. Maheheling iyan sa sarong tugang na lalaki na may linalabanan na sarong seryosong personal na problema. Sia nagsabi: “Kan madaog giraray ako kan sakong kaluyahan, grabe an kamondoan ko. Paghona ko dai na ako makakabayad sa sala na nagibo ko. Nadepisilan akong mamibi. Minapoon ako sa pagsabing, ‘Jehova, dai ko po aram kun baga dadangogon mo an pamibing ini, pero . . . ’” An nagkapira na nadaog giraray nin kaluyahan o nakagibo nin kasalan nakakamate na garo baga may “panganoron” na nakakaolang sa saindang mga pamibi kaya dai iyan nakakaabot sa Dios. (Lam. 3:44) An iba napupurisaw kun nagigirumdoman an salang ginibo kan nakaagi, dawa dakol nang taon kan mangyari iyan. May arogan pa nganing mga Kristiano na tibaad nakakapagsabi nin mga bagay na pinagbabasolan ninda sa huri.—Sant. 3:5-10.

⁷ Mayo sa sato an maninigong mag-isip na dai kita noarin man masasala sa paggawe. (1 Cor. 10:12) Dawa si apostol Pablo nag-admitir na sia nakagibo nin sala. (Basahon an Roma 7:21-25.) Mapadapit digdi, maninigo niatong isaisip an bagong tipan. An Dios nanuga na an sarong mahalagang aspekto kan bagong tipan iyo na dai na nia gigirumdomon pa an mga kasalan. Daing kapareho nanggad na pakinabang iyan! Siertong napahiro nanggad an boot ni Jeremias kan ihula nia iyan, asin kita mapapahiro man mantang dakol pa kitang nanonodan manongod sa bagong tipan asin kun paano kita makikinabang dian.

ANO AN BAGONG TIPAN?

8, 9. Ano an isinakripisyo ni Jehova tanganing magin posible an kapatawadan nin kasalan?

⁸ Mantang orog nindong namimidbid si Jehova, orog nindong narerealisar kun gurano sia kaboot asin kamaheherakon sa bakong sangkap na mga tawo. (Sal. 103:13, 14) Kan ihula ni Jeremias an bagong tipan, idinoon nia na ‘papatawadon ni Jehova an saindang sala’ asin dai na gigirumdomon pa an saindang kasalan. (Jer. 31:34) Maiimahinar nindo na tibaad inisip-isip ni Jeremias kun paano gigibohon nin Dios an pagpapatawad na iyan. Minsan paano nasasabotan nia na kan an Dios magtaram dapit sa bagong tipan, an boot Niang sabihon magkakaigwa nin kasundoan, o kontrata, sa pag-oltanan Nia asin nin mga tawo. Sa paano man, paagi sa tipan na iyan, ootobon ni Jehova an ipinasabong niang isurat ni Jeremias, kaiba an kapatawadan. Dakol pang detalye an orog na ihahayag nin Dios dapit sa saiyang katuyohan, kaiba an gigibohon kan Mesiyas.

⁹ Tibaad may mga magurang kamong naheheling na pigpaparasunod sana an gusto kan saindang mga aki, na dai sinda dinidisiplina. Sa paghona daw nindo arog kaiyan si Jehova? Bako nanggad! Malinaw ini sa kun paano nagin balido an bagong tipan. Imbes na kanselaron sana an mga kasalan, maingat na sinunod nin Dios an saiya mismong pamantayan nin hustisya paagi sa pagtao nin legal na basehan sa pagpapatawad sa mga kasalan, asin dakula an isinakripisyo nia sa paggibo kaiyan. Masasabotan nindo ini paagi sa pagtao nin atension sa isinurat ni Pablo kan tinotokar nia an bagong tipan. (Basahon an Hebreo 9:15, 22, 28.) Sinambit ni Pablo an “pagkabutas paagi sa pantubos” asin sinabi nia na “kun dai nin pagpabolos nin dugo dai nin kapatawadan.” Kun dapit sa bagong tipan, dai ini nanonongod sa iinatang na dugo nin mga toro o kanding segun sa Ley. Imbes, an bagong tipan nagin balido paagi sa dugo ni Jesus. Basado sa sangkap na atang na iyan, permanenteng ‘mapapatawad ni Jehova an sala asin kasalan.’ (Gibo 2:38; 3:19) Alagad sairisay an magigin kabilang sa bagong tipan na ini asin magkakamit kan kapatawadan na iyan? Bako an nasyon nin mga Judio. Sinabi ni Jesus na isisikwal nin Dios an mga Judio, idtong mga nag-atang nin hayop na kahagadan sa Ley, asin Sia matao nin atension sa ibang nasyon. (Mat. 21:43; Gibo 3:13-15) Iyan iyo an “Israel nin Dios,” na kompuesto nin mga Kristianong linahidan nin banal na espiritu. Sa simpleng pananaram, an tipan nin Ley pakipagtipan nin Dios sa literal na Israel, mantang an bagong tipan pakipagtipan ni Jehova Dios sa espirituwal na Israel, na si Jesus an Parapangoltanan.—Gal. 6:16; Roma 9:6.

10. (a) Siisay an “supang” ni David? (b) Paano an mga tawo makikinabang sa “supang”?

¹⁰ Ilinadawan ni Jeremias an maabot na Mesiyas bilang “supang” ni David. Angay iyan. Dawa kaidtong panahon ni Jeremias bilang propeta, pinalod siring sa kahoy an pamilya nin mga hade gikan ki David. Minsan siring, dai nagadan an pungo kaiyan. Pag-abot nin panahon, si Jesus namundag sa pamilyang gikan ki Hadeng David. Inapod siang “Si Jehova an Satong Katanosan,” na nagdodoon kan hararom na pagpahalaga nin Dios sa kualidad na iyan. (Basahon an Jeremias 23:5, 6.) Itinogot ni Jehova na an saiyang bugtong na Aki magsakit sa daga asin magadan. Dangan, kaoyon nin hustisya, magagamit ni Jehova bilang basehan sa pagpatawad an halaga kan atang na pantubos kan “supang” ni David. (Jer. 33:15) Ini an nagpangyari na an nagkapirang tawo ikapahayag na “matanos para sa buhay” asin lahidan nin banal na espiritu, na nagin kabilang sa bagong tipan. Bilang orog pang ebidensia kan pagpahalaga nin Dios sa katanosan, an iba na bako direktang kabilang sa tipan na iyan puede asin talagang makikinabang dian, arog kan maheheling niato.—Roma 5:18.

11. (a) Sa ano isinurat an ley kan bagong tipan? (b) Taano ta interesado an “ibang mga karnero” sa ley kan bagong tipan?

¹¹ Gusto daw nindong maaraman an ibang daing kaagid na mga aspekto kan bagong tipan? An sarong mayor na pagkakalaen kaiyan asin kan tipan nin Ley ni Moises iyo an kun sa ano iyan isinurat. (Basahon an Jeremias 31:33.) An Sampulong Togon kan tipan nin Ley isinurat sa mga tablang gapo, na nawara pag-abot nin panahon. Sa kabaliktaran, ihinula ni Jeremias na an ley kan bagong tipan isusurat sa puso nin mga tawo, asin magdadanay iyan. An ley na ini talagang pinapahalagahan kan mga kabilang sa bagong tipan, an linahidan na mga Kristiano. Kumusta man an mga bako direktang kabilang sa bagong tipan, an “ibang mga karnero,” na naglalaom na mabuhay sagkod lamang sa daga? (Juan 10:16) Sinda naoogma man na marhay sa ley nin Dios. Sa sarong paagi, sinda arog kan mga nakikihimanwa sa Israel, na inako an Ley ni Moises asin nakinabang dian.—Lev. 24:22; Bil. 15:15.

12, 13. (a) Ano an ley kan bagong tipan? (b) Sa “ley kan Cristo,” taano ta dai nindo mamamatean na pinipirit kamong maglingkod sa Dios?

¹² Ano an isisimbag nindo kun hapoton kamo, ‘Ano an ley na ini na isinurat sa puso kan linahidan na mga Kristiano?’ Bueno, an ley na ini inaapod man na “ley kan Cristo.” Ini enot na itinao sa espirituwal na mga Israelita, an mga kabilang sa bagong tipan. (Gal. 6:2; Roma 2:28, 29) Puede nindong sumaryohon “an ley kan Cristo” sa sarong tataramon: pagkamoot. (Mat. 22:36-39) Paano an ley na ini ikinakasurat sa puso kan mga kabilang sa linahidan? An mahalagang mga paagi iyo an pag-adal ninda kan Tataramon nin Dios asin pagdolok ki Jehova sa pamibi. Huli kaiyan, an mga aspektong iyan nin tunay na pagsamba maninigong magin regular na kabtang kan buhay nin gabos na tunay na Kristiano, dawa kan mga bakong kabilang sa bagong tipan alagad gustong makinabang dian.

¹³ “An ley kan Cristo” inaapod na “sangkap na ley para sa katalingkasan” asin “ley nin sarong talingkas na banwaan.” (Sant. 1:25; 2:12) Dakol an namundag na sakop kan Ley ni Moises, alagad mayo nin namundag na kabilang sa bagong tipan o sakop kan ley kan Cristo. Mayo sa mga nagin makinuyog sa ley kan Cristo an pinipirit na maglingkod sa Dios. Imbes, sinda naoogmang marhay na maaraman na an ley nin Dios ikakasurat sa puso asin puedeng makamtan ngonyan nin mga tawo an nagdadanay na mga pakinabang kan tipan na ihinula ni Jeremias.

AN MGA MAKIKINABANG SA BAGONG TIPAN

14. Sairisay an malinaw na nakikinabang sa bagong tipan?

¹⁴ Kan maaraman nin nagkapira na 144,000 an kabilang sa bagong tipan, tibaad naghona sinda na an mga ini sana an makikinabang dian. Tibaad arog kaiyan an paghona ninda huling mga linahidan sana an nagkakakan asin nag-iinom kan mga emblema sa taonan na Memorial kan kagadanan ni Cristo, na an arak nagrerepresentar sa “dugo kan tipan.” (Mar. 14:24) Pero, girumdomon na an mga kabilang sa bagong tipan magigin kairiba ni Jesus bilang an “banhi” ni Abraham, na paagi kaiyan bebendisyonan an gabos na nasyon. (Gal. 3:8, 9, 29; Gen. 12:3) Kaya, paagi sa bagong tipan, ootobon ni Jehova an saiyang panuga na bendisyonan an bilog na katawohan paagi sa “banhi” ni Abraham.

15. Ano an ihinulang magigin katongdan kan mga linahidan?

¹⁵ Si Jesu-Cristo, an pangenot na kabtang kan banhi ni Abraham, iyo an Halangkaw na Saserdote, asin itinao nia an sangkap na atang na nagpagin posible na mapatawad an sala asin kasalan. (Basahon an Hebreo 2:17, 18.) Pero, an Dios haloyon nang may ihinulang “kahadean nin mga saserdote asin banal na nasyon.” (Ex. 19:6) Sa literal na Israel, an mga saserdote gikan sa sarong tribo, asin an mga hade gikan sa ibang tribo. Kaya paano maootob an ipinanugang nasyon na ini nin mga hade na saserdote? An enot na surat ni apostol Pedro ipinanongod nia sa mga pinakangbanal kan espiritu. (1 Ped. 1:1, 2) Sinda inapod nia na “banal na nasyon, banwaan na magigin espesyal na pagsadiri.” (1 Ped. 2:9) Sa siring, magigin mga katabang na saserdote an linahidan na mga Kristiano na kabilang sa bagong tipan. Isip-isipa an kahulogan kaiyan! Kita aroaldaw na nakikipaglaban sa impluwensia nin kasalan, na ‘namamahala pa bilang hade.’ Naeksperyensiahan man iyan kan mga katabang na saserdote. (Roma 5:21) Aram ninda an pagmate nin sarong nakakagibo nin mga sala asin nakikipaglaban sa pakamate nin kasalan. Kaya kaiba ni Cristo, sinda makakapakidamay sa sato mantang pinapangganahan niato an mga tendensia na magkasala.

16. Paano nakakaparigon sa “dakulang kadaklan” an Kapahayagan 7:9, 14?

¹⁶ Sa Kapahayagan 7:9, 14, an “dakulang kadaklan” naheheling na “may sulot na puting haralabang gubing,” na nagpaparisa nin malinig na kamugtakan sa pagheling nin Dios. Tinitipon na ngonyan an dakulang kadaklan na iyan na may paglaom na makaligtas sa “dakulang kahorasaan.” Huli kaini, dawa ngonyan sinda igwa na nin matanos na kamugtakan sa pagheling nin Dios. Sinda ipinapahayag na matanos bilang mga katood ni Jehova. (Roma 4:2, 3; Sant. 2:23) Dakulang pakinabang nanggad iyan! Kun kamo kabilang sa dakulang kadaklan, makakasierto kamo na andam an Dios na tabangan kamo mantang pinagmamaigotan nindong magdanay na malinig sa saiyang pagheling.

17. Ano an boot sabihon na dai na ‘ginigirumdom’ pa ni Jehova an mga kasalan?

¹⁷ Ano an mangyayari sa mga kasalan kan mga nagkakamit kan pabor nin Dios? Arog kan nasambitan sa enotan, sinabi ni Jehova paagi ki Jeremias: “Papatawadon ko an saindang sala, asin an saindang kasalan dai ko na gigirumdomon pa.” (Jer. 31:34) Ginigibo ini nin Dios para sa mga linahidan basado sa atang ni Jesus. Kaagid kaiyan, mapapatawad nin Dios an mga kasalan kan dakulang kadaklan basado sa iyo man sanang “dugo kan tipan.” An pagsabi ni Jeremias na dai na “gigirumdomon” pa nin Dios an mga kasalan dai nagpaparisa na Sia makakalingaw asin basta na sana dai magigirumdoman iyan. Imbes, ipinaparisa kaiyan na oras na si Jehova magtao nin ano man na kinakaipuhan na disiplina asin magpatawad sa sarong nagkasala, garo man sana iinaapon nin Dios sa likod Nia an nakaaging kasalan. Isip-isipa an mga kasalan ni Hadeng David may koneksion ki Bat-seba asin Urias. Si David dinisiplina asin naeksperyensiahan nia an mga epekto kan saiyang mga kasalan. (2 Sam. 11:4, 15, 27; 12:9-14; Isa. 38:17) Pero, si David dai danay na pinapanimbag nin Dios sa mga kasalan na idto. (Basahon an 2 Cronica 7:17, 18.) Arog kan ipinaparisa sa bagong tipan, oras na si Jehova magpatawad nin mga kasalan, basado sa atang ni Jesus, iyan dai na Nia ginigirumdom pa.—Ezeq. 18:21, 22.

18, 19. Anong leksion manongod sa pagpapatawad an manonodan sa bagong tipan?

¹⁸ Huli kaiyan, itinatampok kan bagong tipan an sarong marahayon na aspekto kan pagtratar ni Jehova sa makasalan na mga tawo—sa mga linahidan, na kabilang sa tipan, sagkod sa mga may daganon na paglaom. Makakapagtiwala kamo na oras na pinatawad na ni Jehova an saindong mga kasalan, iyan dai na nia uungkaton giraray. Sa siring, an panuga nin Dios manongod sa bagong tipan nagtatao nin leksion sa lambang saro sa sato. Hapota an saimong sadiri, ‘Nagmamaigot daw akong arogon si Jehova paagi sa dai na pag-ungkat sa mga sala nin iba na sinabi kong pinatawad ko na?’ (Mat. 6:14, 15) Aplikado ini sa saradit saka seryosong gayo na mga sala, arog baga kun nagkasala nin pagsambay an Kristianong agom. Kun an pinagkasalaan mag-oyon na patawadon an saiyang agom na nagsambay pero nagsosolsol na, bako daw tama na ‘dai na paggirumdomon pa an kasalan’? Totoo, tibaad bakong madali para sa sato na lingawan an salang mga nagibo, pero iyan sarong paagi na maaarog niato si Jehova.a

¹⁹ An leksion na ini may koneksion sa bagong tipan puede niatong iaplikar dawa kun dapit sa saro na natiwalag pero nagsolsol asin nakabalik na. Paano kun an tawong iyan may ginibong maraot sa saindo o pinakaraot kamo? Dangan ibinalik na sia ngonyan sa kongregasyon. Paano makakaimpluwensia sa satong personal na kaisipan asin reaksion an Jeremias 31:34? Papatawadon daw niato an nagkasala asin dai na pagpaparaungkaton giraray an ginibong sala? (2 Cor. 2:6-8) Tunay nanggad, iyan sarong bagay na maninigong pagmaigotan na iaplikar sa aroaldaw na buhay kan gabos na nagpapahalaga sa bagong tipan.

MGA BENDISYON KAN BAGONG TIPAN SA PRESENTE ASIN SA NGAPIT

20. Ano an kalaenan kan kaisipan nindo asin kan dakol na tawo kan panahon ni Jeremias?

²⁰ Kan panahon ni Jeremias, dakol na Judio an garo man sana nagsasabi: “Si Jehova dai magibo nin marahay, asin dai sia magibo nin maraot.” (Sof. 1:12) Minsan ngani may kaaraman sinda kun siisay si Jehova asin kun anong klaseng Dios sia, nag-isip sinda na dai sia magibo nin aksion; ni aasahan man nia sinda na sumunod sa ano man na mga pamantayan. Pero, aram nindo na mayo nin ano man na puedeng itago sa pagheling nin Dios. Kamo igwa nin magalang na pagkatakot sa Dios asin siertong habong gumibo nin maraot. (Jer. 16:17) Kadungan kaiyan, aram nindo na si Jehova maboot na Ama. Naheheling nia an satong marahay na mga gibo, baga man naheheling iyan nin iba o dai.—2 Cron. 16:9.

21, 22. Taano ta dai na kamo kaipuhan sabihan na, ‘Midbidon nindo si Jehova’?

²¹ An sarong mahalagang aspekto kan bagong tipan iyo ini: “Ibubugtak ko sa laog ninda an sakong ley, asin isusurat ko iyan sa saindang puso. Asin ako magigin saindang Dios, . . . Asin an lambang saro dai na matokdo pa sa saiyang kaibanan asin sa saiyang tugang, na nagsasabi, ‘Midbida si Jehova!’ huli ta sinda gabos makakamidbid sa sako.” (Jer. 31:33, 34) Ipinapaheling kan mga linahidan sa daga ngonyan na an ley nin Dios nasa puso ninda. Namomotan ninda an mga katotoohan na yaon dian, imbes na magsarig sa mga katokdoan nin siisay man na tawo. Asin an kaaraman sa Biblia maogma nindang ihinihiras sa mga kabilang sa dakulang kadaklan. Huli kaiyan, an mga may daganon na paglaom na ini namimidbid asin namomotan man si Jehova. Sinda gikan sa boot na nagpapasakop sa saiyang paggiya asin nagtitiwala sa saiyang mga panuga. Posibleng arog man kamo kaiyan. Sia midbid nindong marhay asin igwa kamo nin personal na relasyon sa saiya. Dakulang pakinabang nanggad iyan!

²² Paano nindo napapakosog an saindong relasyon ki Jehova? Mayong duda na may nagigirumdoman kamong mga pangyayari na namatean nindo na sinimbag nia an saindong mga pamibi. Paagi sa siring na mga eksperyensia, napararom nindo an saindong pakasabot sa kun anong klaseng Dios sia. Tibaad namatean nindo an pagtabang nia kan magirumdoman nindo an sarong teksto na nakatabang sa saindo na maatubang an sarong problema. Pahalagahan nindo an siring na mga eksperyensia. Mantang danay nindong pinag-aadalan an saiyang Tataramon, padagos na madadagdagan an saindong kaaraman dapit sa saiya—sarong dagos-dagos na pakinabang.

23. Paano an pakamidbid ki Jehova makakatabang sa saindo na mahale an dai kinakaipuhan na pagkapurisaw?

²³ Alagad konektado sa bagong tipan an saro pang bendisyon na puede niatong makamtan ngonyan. An pakamidbid ki Jehova na iyo an nagtatao nin kapatawadan kaoyon kan tipan na iyan makakatabang sa sato na mahale an dai nawawarang pakamate nin kasalan. Halimbawa, an nagkapira na nagpaaborsion bago ninda naaraman an mga pamantayan nin Dios tibaad makamate nin kasalan asin kamondoan huling tinuyo nindang taposon an buhay nin sarong aki na dai pa namumundag. An iba nakakamate nin arog kaiyan huling may mga ginadan sinda kan sinda nakikiguerra. An atang na pantubos ni Jesus—na pangenot na kabtang kan bagong tipan—nagtatao nin kapatawadan sa mga tunay na nagsosolsol. Kun arog kaiyan, bako daw na maninigo kitang magin kombensido na kun pinatawad na ni Jehova an satong mga kasalan, para sa saiya tapos na iyan? Dai niato kaipuhan na pagparagirumdomon pa an mga kasalan na lubos nang pinatawad ni Jehova.

24. Paano nakakaparigon sa saindo an Jeremias 31:20?

²⁴ May maheheling kitang malinaw na ebidensia kan pagpapatawad nin Dios sa Jeremias 31:20. (Basahon.) Dakol na dekada bago kan panahon ni Jeremias, pinadusahan ni Jehova an sampulong tribong kahadean nin Israel sa amihanan (na irinerepresentar kan Efraim, an prominenteng tribo) huli sa saindang idolatriya. Sinda idinistiero. Pero, an Dios dayupot na marhay sa mga tawo sa nasyon na iyan asin nagpaheling sa sainda nin mamomoton na kapadangatan. Namomotan pa man giraray nia sinda bilang “kinawiwilihan na aki.” Kun iniisip nia sinda, an saiyang mga bituka nagigin ‘maribok,’ na nangangahulogan na napapahiro an saiyang boot. An pagkasaysay na ini, na may koneksion sa bagong tipan, nagpapaheling kun gurano kamapagpatawad si Jehova sa mga nagsosolsol sa nakaaging kasalan.

25. Taano ta dapat kamong magpasalamat ki Jehova huli sa bagong tipan?

²⁵ An panuga ni Jehova na patawadon an mga kasalan paagi sa bagong tipan magigin lubos sa katapusan kan Milenyal na Paghade ni Cristo. Si Jesu-Cristo, kaiba an 144,000 na katabang na saserdote, ibabalik sa pagkasangkap an maimbod na mga tawo. Pagkatapos kan pangultimong pagbalo, an katawohan magigin nang lubos na mga miembro kan unibersal na pamilya ni Jehova. (Basahon an Roma 8:19-22.) Sa laog nin dakol na siglo, an gabos nag-aagrangay huli sa pagabat na kasalan. Minsan siring, an mga tawong linalang ni Jehova magkakaigwa na “kan mamuraway na katalingkasan kan mga aki nin Dios,” katalingkasan sa kasalan asin kagadanan. Huli kaiyan, makakapagtiwala kamo na paagi sa mamomoton na areglo kan bagong tipan, magkakamit kamo nin dakol na pakinabang. Makikinabang kamo ngonyan asin sagkod lamang paagi sa “supang” ni David asin maeeksperyensiahan nindo an “katanosan sa daga.”—Jer. 33:15.