Hapot

◼ Ano an dapat manudan kan mga aki tanganing magin maygurang sa espirituwal?

Dakul an ginigibo kan Kristiyanong mga magurang tanganing mapadakula an mga aki ‘sa disiplina asin katukduan’ ni Jehova. (Efe. 6:4, An Marahay na Bareta Biblia) Halimbawa, nahihiling kan mga magurang na kapaki-pakinabang na pag-ulayan an pang-aroaldaw na teksto kada aga kaiba an mga aki. Sa pampamilyang pagsamba asin sa iba pang aktibidad, may mga pamilya na naghihiling nin video dangan pinag-uurulayan iyan, nagpipili nin pag-uulayan na tema sa artikulong Young People Ask, nag-aakto nin sarong istorya sa Bibliya, o nagpapraktis kun paano magpatotoo. Pero tanganing ‘magpadagos pasiring sa [pagkamaygurang],’ dapat na maitukdo man sa mga aki an mas hararom na mga katotoohan sa Bibliya.​—Heb. 6:1.

Isip-isipa an mga itinutukdo ta sa mga nakakaulay ta sa teritoryo. Sa inot o sunod na pagdalaw, hinihinguwa ta nang makapuon nin pag-adal sa Bibliya gamit an librong Ano Man Nanggad an Itinotokdo kan Biblia? Pakatapos kan librong iyan, ginagamit ta an “Magdanay Kamo sa Pagkamoot nin Dios.” Taano? An librong Itinotokdo kan Biblia nagtatao sa mga tinutukduan ta nin pundamental na kaaraman kan Kasuratan. An librong “Pagkamoot nin Dios” nagtutukdo sa sainda kun paano iaaplikar sa pang-aroaldaw na buhay an mga prinsipyo sa Bibliya. Sa pag-adal kan duwang publikasyon na ini, natatabangan an mga baguhan na ‘makagamot’ diyan ki Cristo asin magin ‘marigon sa pagtubod.’ (Col. 2:6, 7) Bako daw na makikinabang man digdi an satong mga aki? Sinda man kaipuhan na matukduan dapit sa pantubos, Kahadian, asin kamugtakan kan mga gadan. Kaipuhan man maaraman kan mga aki kun taano ta tinutugutan nin Diyos an pagsakit asin kun ano an nagpaparisa na yaon na kita sa huring mga aldaw kan sistemang ini nin mga bagay. Dapat na kumbinsido sinda na yaon sa Mga Saksi ni Jehova an katotoohan. Kaipuhan man na masabutan kan mga hoben an mga prinsipyo sa Bibliya asin kun paano sanayon ‘an saindang mga pakamati sa pagmidbid’ o kakayahan sa pagrisa. (Heb. 5:14) Siyempre, kaipuhan na konsideraron kan mga magurang an edad asin kakayahan nin pakasabot kan saindang mga aki. Pero, dakul na aki an nakakanuod na nin hararom na mga katotoohan sa Bibliya dawa akion pa sinda.​—Luc. 2:42, 46, 47.