Arugon an Saindang Pagtubod
1. Anong libro an gagamiton sa Pag-adal sa Bibliya kan Kongregasyon sa semana nin Oktubre 19?
1 Sa semana nin Oktubre 19, 2015, pupunan tang pag-adalan an librong Arugon an Saindang Pagtubod sa Pag-adal sa Bibliya kan Kongregasyon. Tinutukar digdi an mga istorya sa Bibliya kan 14 lalaki asin babayi na nagpahiling nin pagtubod. Iniistorya iyan sa paaging buhay na buhay sa isip niyato an maimbod na mga karakter na ini, kaya natatabangan kitang isipon sinda bilang totoong mga tawo na napaatubang sa mga pagbalo mantang naglilingkod ki Jehova. Tutukduan man kita kan librong ini nin mga leksiyon na personal niyatong ikakaaplikar ngunyan.—Heb. 6:12.
2. Ano an nagkapirang laog kan librong Arugon an Saindang Pagtubod?
2 Mga Laog: May time line asin mga mapa an libro para tabangan kitang maaraman kun kasuarin asin sain nabuhay an lambang karakter. Saro pa, an kada kapitulo igwa nin kabtang na “Pag-isipan . . . ,” na matabang sato na hurop-hurupon asin iaplikar an praktikal na mga leksiyon. Igwa man iyan nin makulor, detalyado, asin maingat na siniyasat na mga ritrato na matabang sato na imahinaron an mga istorya.
3. Paano kita makikinabang sa pag-adal sa librong ini?
3 Paano Ka Makikinabang: Sinasabi sato kan pambukas na surat kan Namamahalang Grupo: “Gamiton an imahinasyon mo; mation an namamatian kan mga karakter sa Bibliya, hilingon an nahihiling ninda, asin dangugon an nadadangog ninda. Ikumparar an nagin reaksiyon ninda sa sarong sitwasyon sa posibleng magigin reaksiyon mo kun ika an yaon duman.” Siyempre, dai buot sabihon kaini na mag-imahinar kita nin mga espekulasyon, kundi iladawan sa isip an istorya asin sabuton an namatian kan mga karakter. Nangangaipo iyan nin panahon asin paghurop-hurop. (Neh. 8:8) Kun an pag-adal mapuon sa kabangaan kan kapitulo, rerepasuhon nguna kan manginginot an nakaaging pinag-adalan sa laog nin 30 sagkod 60 segundo. Puwedeng magtao nin saro o duwang hapot bilang pantapos na repaso kun dai kaiba sa pinag-adalan an kabtang na “Pag-isipan . . . ”
4. Taano ta kaipuhan na pag-adalan niyato an librong Arugon an Saindang Pagtubod?
4 Nabubuhay kita sa kinaban na naghihinguwa kada aldaw na rauton o paluyahon an pagtubod ta. An librong ini—pati na an nagpapadagos na serye sa An Torrengbantayan na pigbasaran kaini—sarong regalo hali ki Jehova para tabangan kitang pakusugon an satong pagtubod. (Sant. 1:17) Makinabang nin lubos paagi sa regular na pag-atender sa Pag-adal sa Bibliya kan Kongregasyon asin pagkomento!