Mga Reperensiya Para sa Workbook sa Pagtiripon na Pamumuhay Asin Ministeryo
PEBRERO 4-10
KAYAMANAN NA YAON SA TATARAMON NIN DIYOS | ROMA 1-3
“Padagos na Sanayon an Saimong Konsiyensiya”
(Roma 2:14, 15) Dahil an mga tawo kan mga nasyon na mayo nin katugunan, pag ginigibo ninda sa sadiri nindang buot an mga bagay na yaon sa katugunan, an mga tawong ini, maski ngani mayong katugunan, nagigin katugunan sa saindang sadiri. 15 Sinda mismo an mga nagpapatunay na nakasurat sa saindang puso an mga prinsipyo kan katugunan, mantang an saindang konsiyensiya nagseserbing saksi kaiba ninda, asin an sainda mismong mga kaisipan nagsasabi kun may sála sinda o dai.
Paano Nindo Papagdadanayon an Marahay na Konsensia?
6 An mga lingkod ni Jehova sana daw an igwa kan balaog na ini na konsensia? Isipon nindo an ipinasabong na mga tataramon ni apostol Pablo: “Kun an mga tawo kan mga nasyon na mayo nin ley minagibo sa saindang naturalesa nin mga bagay na nasa ley, an mga tawong ini, minsan ngani mayo nin ley, iyo na mismo an ley sa saindang sadiri. Sinda mismo an nagpapaheling na an ley nasusurat sa saindang puso, mantang an saindang konsensia nagpapatotoo kaiba ninda asin, sa sainda mismong mga pag-isip, sinda inaakusar o ipinapahayag pa ngani na daing kasalan.” (Roma 2:14, 15) Dawa an mga tawo na biyong bakong pamilyar sa mga ley ni Jehova tibaad kun beses mapahiro kan saindang konsensia na gumawe kaoyon kan mga prinsipyo nin Dios.
(Roma 2:15) Sinda mismo an mga nagpapatunay na nakasurat sa saindang puso an mga prinsipyo kan katugunan, mantang an saindang konsiyensiya nagseserbing saksi kaiba ninda, asin an sainda mismong mga kaisipan nagsasabi kun may sála sinda o dai.
Paano Nindo Papagdadanayon an Marahay na Konsensia?
8 Paano kamo naggigibo nin desisyon na basado sa konsensia? Garo baga an nagkapira inaaram sana an saindang mga kaisipan asin saboot, dangan nagdedesisyon na kun ano an gigibohon. Pagkatapos kaiyan tibaad magsabi sinda, “Bueno, dai man ako nakokonsensia.” An mga pagmawot kan puso puedeng magin makosogon, na nakakaimpluwensia pa ngani sa konsensia. An Biblia nagsasabi: “Madaya an puso nin orog kisa sa ano pa man na bagay asin desesperado. Siisay an makakamidbid kaiyan?” (Jeremias 17:9) Kun siring, bako an mga minamawot kan satong puso an maninigo na pinakaimportanteng isipon. Imbes, an gusto niatong enot na isipon iyo an kun ano an makakapaogma ki Jehova Dios.
9 Kun an sarong desisyon talagang nakabasar sa satong sinanay na konsensia, mababanaag dian an satong diosnon na pagkatakot, bakong an satong personal na mga pagmawot. Isipon nindo an sarong angay na halimbawa. An maimbod na gobernador na si Nehemias may deretso na maghagad nin bayad asin buhis sa mga tawo sa Jerusalem. Pero, dai nia iyan ginibo. Taano? Ikinaongis nia an mismong ideya na maaanggot sa saiya si Jehova huli sa pag-api sa banwaan nin Dios. Sia nagsabi: “Dai ko ginibo iyan huli sa pagkatakot sa Dios.” (Nehemias 5:15) Mahalagang marhay an sinserong diosnon na pagkatakot, sarong bilog na pusong pagkatakot na mapaanggot an satong langitnon na Ama. An siring na pagkatakot na may pagsambang paggalang mapahiro sa sato na humanap nin paggiya sa Tataramon nin Dios kun igwa kitang gigibohon na mga desisyon.
Maghanap nin Espirituwal na Kayamanan
(Roma 3:4) Bako nanggad arog kaiyan! An Diyos pirming magsasabi nin totoo, maski pa an gabos na tawo magin putikon, siring kan nasusurat: “Tanganing mapatunayan na matanos ka kun ika nagtataram asin manggana ka kun ika inaakusaran.”
Tampok na mga Kabtang sa Surat sa mga Taga Roma
3:4. Kun an sinasabi nin tawo kontra sa sinasabi nin Dios na nasa Tataramon nia, tinotogotan niato na ‘manompongan na an Dios totoo’ paagi sa satong pagtitiwala sa mensahe kan Biblia asin paggawe kaoyon kan kabotan nin Dios. Paagi sa maigot na pakikikabtang sa paghuhulit kan Kahadean asin paggibo nin disipulo, matatabangan niato an iba na manompongan na an Dios totoo.
(Roma 3:24, 25) asin dapat na ibilang na sarong regalong daing bayad an siring na pagpahayag sa sainda na matanos, na saiyang itinatao dahil sa saiyang daing kapantay na kabuutan paagi sa nagpapatalingkas na pantubos na ibinayad ni Cristo Jesus. 25 Itinao siya nin Diyos bilang sarong dulot para makamtan nin mga tawo an Saiyang pabor, na mangyayari paagi sa pagtubod sa dugo ni Cristo. An katuyuhan kaini iyo na maipahiling an pagkamatanos nin Diyos, huling dahil sa saiyang pagkamatinios pinapatawad niya an mga kasalan na nangyari kaidtong nakaaging panahon.
Tampok na mga Kabtang sa Surat sa mga Taga Roma
3:24, 25—Paano mababayadan kan “pantubos na ibinayad ni Cristo Jesus” “an mga kasalan na nangyari kan nakaagi” bago iyan ibinayad? An enot na Mesiyanikong hula, na nakasurat sa Genesis 3:15, naotob kan 33 C.E. kan si Jesus gadanon sa hariging pasakitan. (Gal. 3:13, 16) Minsan siring, kan sabihon ni Jehova an hulang iyan, sa pagmansay nia an halagang pantubos garo man sana ibinayad na, huli ta mayo nin makakaolang sa Dios sa pag-otob nia kan saiyang katuyohan. Kaya basado sa atang ni Jesu-Cristo sa ngapit, mapapatawad ni Jehova an mga kasalan nin mga naggikan ki Adan na nagturubod sa panugang iyan. Pinapagin posible man kan pantubos an pagkabuhay liwat nin mga tawong nabuhay kan mga panahon bago kan mga Kristiano.—Gibo 24:15.
Pagbasa sa Bibliya
(Roma 1:1-17) Ako, si Pablo, na uripon ni Cristo Jesus asin inapod na magin apostol, inasignaran na magpahayag kan maugmang bareta nin Diyos, 2 na patiinot niyang ipinanuga sa banal na Kasuratan paagi sa saiyang mga propeta, 3 mapadapit sa saiyang Aki, na namundag bilang tawo gikan sa lahi ni David, 4 alagad paagi sa kapangyarihan kan espiritu nin kabanalan ipinahayag na Aki nin Diyos kan buhayon siya liwat hali sa mga gadan—iyo, si Jesu-Cristo na satuyang Kagurangnan. 5 Paagi sa saiya nag-ako kami nin daing kapantay na kabuutan asin nin pagkaapostol tanganing an mga tawo sa gabos na nasyon magturubod asin magin masinunod sa saiya para sa kamurawayan kan saiyang ngaran. 6 Hali sa mga nasyon na iyan, inapod man kamo na magin kasaro ni Jesu-Cristo. 7 An surat kong ini para sa gabos na namumutan nin Diyos diyan sa Roma, na inapod tanganing mapabilang sa mga banal: Mapasaindo an daing kapantay na kabuutan asin katuninungan na hali sa Diyos na satuyang Ama asin sa Kagurangnan na Jesu-Cristo.8 Inot sa gabos, sa ngaran ni Jesu-Cristo nagpapasalamat ako sa sakuyang Diyos may koneksiyon sa saindo gabos, huli ta an pagtubod nindo pinag-uurulayan maski sain sa bilog na kinaban. 9 Asin an Diyos, na pinaglilingkudan ko nin lubos paagi sa pagpahayag kan maugmang bareta manungod sa saiyang Aki, iyo an sakuyang saksi kun paanong pirmi ko nanggad kamong sinasambit sa sakong mga pamibi, 10 na nakikimahirak na kun mapupuwede magkaigwa na ako ngunyan nin oportunidad na makadiyan sa saindo, kun bubuuton nin Diyos. 11 Huling minamawot ko nanggad na mahiling kamo, tanganing makapagtao ako sa saindo nin mga bagay na espirituwal para maparigon kamo; 12 o sa ibang pagtaram, tanganing mapakusog nindo ako paagi kan saindong pagtubod asin mapakusog ko man kamo paagi kan sakuyang pagtubod. 13 Alagad habo kong dai nindo ini naaaraman, mga tugang, na dakul na beses kong plinano na magdiyan sa saindo, pero igwang nakakaulang sa sako sagkod ngunyan. Minsan siring, gusto kong magkabunga man ako diyan sa saindo arog kan nagibo ko sa ibang mga nasyon. 14 May utang ako sa mga Griego pati sa mga taga ibang nasyon, sa mga madunong pati sa mga mangmang; 15 kaya gustong-gusto ko man na ipahayag an maugmang bareta sa saindo diyan sa Roma. 16 Huli ta dai ko ikinakasupog an maugmang bareta; sa katunayan, iyan an mapuwersang instrumento nin Diyos para sa kaligtasan kan gabos na may pagtubod, inot kan mga Judio dangan kan mga Griego man. 17 Huling nahihiling kan mga may pagtubod na paagi sa maugmang bareta ihinahayag nin Diyos an saiyang pagigin matanos asin napapakusog kaini an saindang pagtubod, siring kan nasusurat: “Alagad an saro na matanos mabubuhay dahil sa pagtubod.”
PEBRERO 11-17
KAYAMANAN NA YAON SA TATARAMON NIN DIYOS | ROMA 4-6
“Dinadagka Kita nin Diyos na Akuon an Saiyang Pagkamuot”
(Roma 5:8) Alagad dinadagka kita nin Diyos na akuon an saiyang pagkamuot na ipinahiling niya sa arog kaining paagi: si Cristo nagadan para sa sato kan kita mga parakasala pa.
(Roma 5:12) Kaya, kun paanong paagi sa sarong tawo an kasalan luminaog sa kinaban asin an kagadanan paagi sa kasalan, asin sa siring an kagadanan luminakop sa gabos na tawo huling sinda gabos nagkasala—.
Dinadagka Kita nin Diyos na Akuon an Saiyang Pagkamuot
5 Ipinaliwanag ni Pablo an bagay na iyan asin nagpoon sia sa puntong ini: “Paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.” (Roma 5:12) Masasabotan niato ini huling ipinasurat nin Dios an dapit sa pagpoon kan buhay nin tawo. Linalang ni Jehova an duwang tawo, si Adan asin Eva. Perpekto an Kaglalang, asin iyo man an enot na mga tawong idto na satong ginikanan. Sinda tinawan nin Dios nin saro sanang pagbabawal asin sinabihan na an dai pagsunod sa ley na iyan may sentensiang kagadanan. (Gen. 2:17) Minsan siring, pinili nindang gumawe nin kapahapahamak paagi sa pagbalga sa rasonableng pagboot nin Dios, na sa siring isinikwal ninda sia bilang Paratao nin Ley asin Soberano.—Deut. 32:4, 5.
(Roma 5:13, 14) Huli ta an kasalan nasa kinaban bago pa an Katugunan, alagad pag mayo nin katugunan mayo nin kasalan na ikakaakusar sa kiisay man. 14 Minsan siring, an kagadanan naghadi magpuon ki Adan sagkod ki Moises, asin naghadi iyan maski sa mga dai nagkasala na kapareho kan pagkakasala ni Adan, asin siya igwa nin pagkakaagid sa saro na madatong.
Irinerekomendar sa Sato nin Dios an Saiyang Pagkamoot
6 Makasalan na si Adan kan magkaaki sia, kaya an kasalan asin an mga epekto kaiyan namana kan gabos na naggikan sa saiya. Siempre, dai ninda binalga an ley nin Dios arog kan ginibo ni Adan, kaya dai sinda pinapanimbag sa kasalan na iyan; ni tinawan na sinda kaidto nin ano man na kodigo nin ley. (Gen. 2:17) Pero, an mga gikan ki Adan nagmana nin kasalan. Kaya, an kasalan asin an kagadanan namamahala na bago pa tawan nin Dios an mga Israelita nin kodigo nin ley, na malinaw na nagpaheling na sinda makasalan. (Basahon an Roma 5:13, 14.) An epekto nin namanang kasalan puedeng iilustrar paagi sa nagkapirang namamanang helang o depekto, arog nin Mediterranean anemia o hemophilia. Tibaad nabasa na nindo na si Alexis, an aki kan Rusong si Czar Nicholas II asin ni Alexandra, nagmana nin hemophilia, na abnormal na pagdudugo. Totoo, dawa sa siring na pamilya, an nagkapirang aki dai nagsasakit huli sa mga helang na arog kaiyan, alagad puede pa man giraray nindang ikapasa iyan. Bakong arog kaiyan kun dapit sa kasalan. Dai malilikayan an depekto na resulta kan kasalan hale ki Adan. An gabos nagsasakit huli kaiyan. Pirmeng nakakagadan iyan. Asin ikinakapasa iyan sa gabos na aki. Puede daw na makatalingkas sa siring na masakit na kamugtakan?
(Roma 5:18) Kun siring, huling paagi sa sarong pagkakasala nagin kondenado an gabos na klase nin tawo, paagi man sa sarong matanos na gibo ipinapahayag na matanos para sa buhay an gabos na klase nin tawo.
(Roma 5:21) Sa anong katuyuhan? Tanganing kun paanong an kasalan naghadi kaiba an kagadanan, maghadi man sa matanos na paagi an daing kapantay na kabuutan, na magiya pasiring sa buhay na daing katapusan paagi ki Jesu-Cristo na satuyang Kagurangnan.
Irinerekomendar sa Sato nin Dios an Saiyang Pagkamoot
9 Ano an ipinaparisa kan Griegong pananaram para sa “pagpahayag nin katanosan” asin “pagpahayag sa sainda na matanos”? An sarong paratradusir nin Biblia nagsurat dapit dian: “Iyan pagkokomparar sa mga bagay na konektado sa ley asin may legal na aspekto iyan. Sinasabi kaiyan an pagbabago sa kamugtakan nin saro sa atubangan nin Dios, bakong an panglaog na pagbabago sa saro . . . Sa pagkokomparar na iyan, an Dios ilinaladawan bilang an hokom na nagdesisyon pabor sa akusado, na garo man sana iinatubang sa korte nin Dios huli sa akusasyon na pagkabakong matanos. Alagad inabsuelto nin Dios an akusado.”
10 Sa anong basehan aabsueltohon kan matanos na “Hokom kan bilog na daga” an bakong matanos na tawo? (Gen. 18:25) Bilang enot na mahalagang lakdang, mamomoton na isinugo nin Dios sa daga an saiyang bugtong na Aki. Lubos na ginibo ni Jesus an kabotan kan saiyang Ama, sa ibong nin mga pagtentar, grabeng pag-olog-olog, asin pag-abuso. Pinagdanay nia an saiyang integridad sagkod pa ngani na magadan sia sa hariging pasakitan. (Heb. 2:10) Sa pagsakripisyo kan saiyang perpektong buhay bilang tawo, nagtao si Jesus nin pantubos na paagi kaiyan an mga gikan ki Adan makakatalingkas, o mababalukat, sa kasalan asin kagadanan.—Mat. 20:28; Roma 5:6-8.
Maghanap nin Espirituwal na Kayamanan
(Roma 6:3-5) O dai daw nindo aram na kita gabos na binawtismuhan ki Cristo Jesus binawtismuhan man sa saiyang kagadanan? 4 Kaya huling binawtismuhan kita sa saiyang kagadanan, garo kita ilinubong kaiba niya, tanganing kun paanong ibinangon si Cristo hali sa mga gadan paagi sa mamuraway na kapangyarihan kan Ama, dapat man kitang maglakaw sa panibagong buhay. 5 Kun kita nagin nang kasaro niya paagi sa kagadanan niyato na kaagid kan saiyang kagadanan, siguradong magigin kasaro man niya kita paagi sa pagkabuhay liwat niyato na kaagid kan saiyang pagkabuhay liwat.
Tampok na mga Kabtang sa Surat sa mga Taga Roma
6:3-5—Ano an boot sabihon kan bautismohan dian ki Cristo Jesus asin bautismohan dian sa saiyang kagadanan? Kun linalahidan ni Jehova nin banal na espiritu an mga parasunod ni Cristo, sinda nagigin kasaro ni Jesus asin nagigin miembro kan kongregasyon na iyo an hawak ni Cristo, na sia an Payo. (1 Cor. 12:12, 13, 27; Col. 1:18) Ini an saindang bautismo dian ki Cristo Jesus. An linahidan na mga Kristiano ‘binabautismohan man dian sa kagadanan ni Cristo’ huli ta sinda namumuhay na may pagsakripisyo asin binayaan na ninda an ano man na paglaom na buhay na daing katapusan sa daga. Kun siring, an saindang kagadanan sarong sakripisyo, arog kan kagadanan ni Jesus, minsan ngani an saindang kagadanan mayo nin nakakatubos na halaga. An bautismo na ini dian sa kagadanan ni Cristo natatapos pagkagadan ninda asin pagkabuhaya liwat sa sainda pasiring sa buhay sa langit.
(Roma 6:7) Huling an sarong nagadan absuwelto na sa saiyang kasalan.
Ano an Paglaom Para sa Sakong mga Apuon?
Pag binuhay na liwat an mga bakong matanos, huhukuman daw sinda base sa mga ginibo ninda bago sinda magadan? Dai. Sinasabi sa Roma 6:7: “Idtong nagadan butas na sa kasalan.” Buot sabihon, an mga bakong matanos na nagadan na bayad na sa saindang mga kasalan. Kaya, huhukuman sinda base sa gigibuhon ninda pagkabuhay liwat sa sainda, bakong sa ginibo ninda huli sa kadaihan nin pakaaram bago sinda magadan. Paano sinda makikinabang digdi?
Pagbasa sa Bibliya
(Roma 4:1-15) Kun arog kaiyan, ano an masasabi tang nakamtan ni Abraham, an satuyang apuon na ginikanan niyato? 2 Halimbawa, kun si Abraham ipinahayag na matanos dahil sa mga gibo, igwa kutana siya nin dahilan tanganing maghambog, alagad dai siya makakapaghambog sa atubangan nin Diyos. 3 Huli ta ano an sinasabi sa Kasuratan? “Si Abraham nagtubod ki Jehova, asin ibinilang siya na matanos dahil diyan.” 4 Ngunyan sa tawo na nagtatrabaho, an bayad sa saiya dai ibinibilang na pagpahiling sa saiya nin daing kapantay na kabuutan kundi sarong bagay na dapat lang itao sa saiya. 5 Sa ibong na lado, sa sarong tawo na dai nagdedepende sa saiyang mga gibo kundi nagtutubod sa Saiya na nagpapahayag na matanos sa sarong parakasala, ibibilang siyang matanos dahil sa pagtubod niya. 6 Siring kan sinabi man ni David kan magtaram siya mapadapit sa kaugmahan kan tawo na ibinibilang nin Diyos na matanos na dai pinagbabasaran an mga gibo kan tawong iyan: 7 “Maugma an mga pinatawad sa saindang maraot na mga gibo asin tinahuban an mga kasalan; 8 maugma an tawo na an kasalan dai nanggad gigirumdumon ni Jehova.” 9 Ngunyan, an kaugmahan daw na ini para sana sa mga tawong tinuri o para man sa mga tawong dai tinuri? Huli ta an sabi niyato: “Ibinilang si Abraham na matanos dahil sa saiyang pagtubod.” 10 Sa anong kamugtakan daw ibinilang siyang matanos? Kan siya tinuri na o kan dai pa siya tinuri? Kan dai pa siya tinuri. 11 Asin nag-ako siya nin tanda—an pagturi sa saiya—bilang tatak kan saiyang pagigin matanos dahil sa pagtubod niya bago pa siya tinuri, na sa siring siya an magin ama kan gabos na may pagtubod maski bako sindang turi, tanganing ibilang sinda na matanos; 12 asin sa siring siya an magin ama kan mga tinuri, bako sana kan mga nangangapot sa saindang pagigin tinuri kundi pati man kan mga maingat na naglalakaw sa dalan nin pagtubod kapareho kan ginibo kan satuyang amang si Abraham kan siya bako pang turi. 13 Huli ta bakong paagi sa katugunan kaya nag-ako si Abraham o an mga gikan sa saiya nin panuga na nagsasabing magigin tagapagmana siya nin sarong kinaban, kundi nag-ako siya kaiyan paagi sa pagigin matanos dahil sa pagtubod. 14 Huling kun an mga tagapagmana iyo an mga nangangapot sa katugunan, nagigin daing serbi an pagtubod asin nawawaran nin saysay an panuga. 15 An totoo, an Katugunan nagdadara nin kaanggutan, alagad kun mayo nin katugunan, mayo man nin ano man na pagbalga.
PEBRERO 18-24
KAYAMANAN NA YAON SA TATARAMON NIN DIYOS | ROMA 7-8
“Ika Daw ‘Interesadong Marhay na Naghahalat’?”
(Roma 8:19) Huli ta an mga linalang interesadong marhay na naghahalat kan panahon na ihahayag an mga aki nin Diyos.
Magpagiya ki Jehova Pasiring sa Tunay na Katalingkasan
17 Kan tinotokar an katalingkasan na itinagama ni Jehova para sa mga lingkod nia sa daga, si Pablo nagsurat: ‘An gabos na linalang naghahalat na ihayag an mga aki’ nin Dios. Dangan sinabi pa nia: ‘An linalang papatalingkason nin Dios tanganing dai na iyan malapa, asin tanganing makahiras sa mamurawayon na katalingkasan kan mga aki nin Dios.’ (Roma 8:19-21, BPV) “An linalang” nanonongod sa katawohan na may daganon na paglaom, an mga makikinabang kun “ihayag” na an linahidan nin espiritu na mga aki nin Dios. An paghahayag na iyan mapoon kun an “mga aki” na ini, na binuhay na liwat pasiring sa langit, makikabtang na ki Cristo sa paghale kan karatan sa daga asin pagligtas sa “dakulang kadaklan” pasiring sa bagong sistema nin mga bagay.—Kap. 7:9, 14.
(Roma 8:20) Pa’no kaya, an mga linalang ipinasairarom sa kawaran nin saysay, bako dahil sa kabutan ninda, kundi dahil sa kabutan nin Diyos, alagad ginibo niya iyan base sa paglaom
Naggagayagaya sa Satong Paglaom
11 Tinawan ni Jehova nin paglaom an katawohan kan manuga sia nin pagkaligtas sa “orihinal na halas,” si Satanas na Diablo, paagi sa ipinanugang “banhi.” (Kap. 12:9, NW; Gen. 3:15) An pangenot na kabtang kan ‘banhing’ iyan iyo si Jesu-Cristo. (Gal. 3:16) Paagi sa saiyang kagadanan asin pagkabuhay liwat, nagtao si Jesus nin marigon na basehan para sa paglaom nin katawohan na makatalingkas sa pagkaoripon sa kasalan asin kagadanan. An pagkaotob kan paglaom na ini konektado sa ‘paghahayag kan mga aki nin Dios.’ An pinamuraway na mga linahidan iyo an sekondaryong kabtang kan “banhi.” ‘Ihahayag’ sinda kun makaibanan na ninda si Cristo sa paglaglag sa maraot na sistema nin mga bagay ni Satanas. (Kap. 2:26, 27) Maresulta ini sa kaligtasan kan ibang mga karnero na maluwas sa dakulang kahorasaan.—Kap. 7:9, 10, 14.
(Roma 8:21) na an mga linalang mismo mapapatalingkas man sa pagkauripon sa kalapaan asin magkakaigwa man kan mamuraway na katalingkasan bilang mga aki nin Diyos.
Naggagayagaya sa Satong Paglaom
12 Kaginhawahan nanggad an naghahalat sa mga “linalang” na tawo durante kan Sangribong Taon na Paghade ni Cristo! Sa panahon na iyan, ‘mahahayag’ pa an pinamuraway na ‘mga aki nin Dios’ kun sinda humiro na bilang mga saserdote kaiba ni Cristo, na nagtatabang sa katawohan na kamtan an mga pakinabang kan atang na pantubos ni Jesus. Bilang mga sakop kan langitnon na Kahadean, an mga “linalang” na tawo makakatalingkas na sa mga epekto kan kasalan asin kagadanan. An makinuyog na mga tawo luway-luway na makakatalingkas ‘sa kaoripnan nin kalapaan.’ Kun magdadanay sindang maimbod ki Jehova sa bilog na Milenyo asin sa huring pagbalo na mangyayari sa katapusan kaiyan, permanenteng isusurat an saindang mga ngaran sa “libro nin buhay.” Magkakaigwa sinda kan ‘mamuraway na [katalingkasan] kan mga aki nin Dios.’ (Kap. 20:7, 8, 11, 12) Sarong marahayon nanggad na paglaom!
Maghanap nin Espirituwal na Kayamanan
(Roma 8:6) Huling an pagsentro kan isip sa laman nangangahulugan nin kagadanan, alagad an pagsentro kan isip sa espiritu nangangahulugan nin buhay asin katuninungan;
Nagigirumduman Mo Daw?
Ano an pagkakalain kan “pagsentro kan isip sa laman” asin kan “pagsentro kan isip sa espiritu”? (Roma 8:6)
An saro na naggigibo kan nainot nakapokus sa makasalan na mga pagmawot asin tendensiya kan saiyang bakong perpektong laman. Pirmi niyang ipinapakipag-ulay asin ikinakaugmang marhay an mga bagay na may koneksiyon sa laman. An saro na naggigibo kan ikaduwa, nakapokus an buhay sa mga bagay na konektado sa Diyos asin sa Saiyang kaisipan; an siring na Kristiyano ginigiyahan nin banal na espiritu. An pagsentro kan isip sa laman maresulta sa kagadanan, pero an pagsentro kan isip sa espiritu maresulta sa buhay asin katuninungan.—w16.12, p. 15-17.
(Roma 8:26, 27) Apuwera kaiyan, an espiritu man nagtatabang sa sato sa satuyang kaluyahan; huling may mga panahon na kaipuhan niyatong mamibi pero dai niyato aram kun ano an satong ipapamibi, alagad sa panahon na iyan na dai niyato ikinakapahayag an satong mga inagrangay, an espiritu mismo an nakikiulay para sa sato. 27 Asin siya na nagsisiyasat kan mga puso nakakaisi kun ano an katuyuhan kan espiritu, huling nakikiulay iyan para sa mga banal kauyon kan kabutan nin Diyos.
Ano an Ihinahayag Dapit sa Saindo kan Saindong mga Pamibi?
20 Kun beses, tibaad dai niato aram kun ano an sasabihon sa satong personal na mga pamibi. “An problema kun ano an maninigo niatong ipamibi segun sa kaipuhan niato dai niato aram,” an isinurat ni Pablo, “alagad an [banal na] espiritu mismo an nakikimaherak para sa sato na may mga pag-agrangay na dai masayod. Pero sia [an Dios] na nagsisiyasat kan mga puso nakakaaram kun ano an kahulogan kan espiritu.” (Roma 8:26, 27) Dakol na pamibi an ipinasurat ni Jehova sa Kasuratan. Inaako nia an ipinasabong na mga kahagadan na ini na garo man sana gikan sa sato asin kun siring sinisimbag nia iyan. Midbid kita nin Dios asin aram nia an kahulogan kan mga bagay na ipinasabi nia sa saiyang espiritu paagi sa mga kagsurat kan Biblia. Sinisimbag ni Jehova an satong mga pagngayongayo kun an espiritu “nakikimaherak,” o nangongoltanan, para sa sato. Alagad mientras na nagigin mas pamilyar kita sa Tataramon nin Dios, tibaad mas madali niatong naiisip an maninigo niatong ipamibi.
Pagbasa sa Bibliya
(Roma 7:13-25) Kun siring, an sarong bagay daw na marahay iyo an dahilan kan sakong kagadanan? Bako nanggad! Imbes, an kasalan an dahilan, tanganing paagi sa sarong bagay na marahay ikapahiling na an kasalan nagdadara sa sako nin kagadanan, asin tanganing paagi sa tugon na iyan mahayag kun gurano karaot an kasalan. 14 Huli ta aram niyato na an Katugunan espirituwal, alagad ako makalaman, ipinabakal na magin uripon nin kasalan. 15 Huling dai ko naiintindihan an ginigibo ko. Pa’no kaya, an gusto ko dai ko piggigibo, kundi an habuon ko iyo an piggigibo ko. 16 Alagad, kun an piggigibo ko iyo an dai ko gusto, ipinapahiling sana kaiyan na nagtutubod ako na marahay an Katugunan. 17 Pero bako na ako an naggigibo kaiyan, kundi an kasalan na yaon sa sako. 18 Huli ta aram ko na sa sakuya mismong hawak, mayo nin marahay na nagtetener; huling yaon sa sako an pagmawot na gibuhon an marahay pero mayo an kakayahan na isagibo iyan. 19 Mala ta an marahay na gusto ko dai ko piggigibo, alagad an maraot na dai ko gusto iyo an piggigibo ko. 20 Kaya, kun an piggigibo ko iyo an dai ko gusto, bako na ako an naggigibo kaiyan, kundi an kasalan na yaon sa sako. 21 Kun siring, nahihiling ko sa sitwasyon ko an katugunan na ini: Pag gusto kong gibuhon an tama, an maraot an yaon sa sako. 22 Sa kalaog-laugi kan sakuyang pagkatawo, ikinakaugma ko nanggad an katugunan nin Diyos, 23 alagad nahihiling ko sa sakuyang hawak an saro pang katugunan na nakikipaglaban sa katugunan kan sakong isip asin dinadara ako kaiyan na bihag sa katugunan nin kasalan na yaon sa sakuyang hawak. 24 Hirak man sa sako! Siisay an masalbar sa sako sa hawak na ini na nagdadara sa sakuya nin kagadanan? 25 Salamat sa Diyos paagi ki Jesu-Cristo na satuyang Kagurangnan! Kaya ngunyan, sa sakuyang isip, ako mismo uripon kan katugunan nin Diyos, alagad sa sakuyang hawak, ako uripon kan katugunan nin kasalan.
PEBRERO 25–MARSO 3
KAYAMANAN NA YAON SA TATARAMON NIN DIYOS | ROMA 9-11
“An Ilustrasyon Dapit sa Puon nin Olibo”
(Roma 11:16) Dugang pa, kun ibinibilang na banal an parte kan bilog na masa na kinua tanganing magin mga inot na bunga, an bilog na masa banal man; asin kun an gamot banal, an mga sanga iyo man.
‘O an Rarom kan Kadonongan nin Dios!’
13 An mga kabtang kan banhi ni Abraham ikinomparar ni apostol Pablo sa mga sanga sa simbolikong poon nin olibo. (Roma 11:21) An kinultibar na poon na ini nin olibo nagrerepresentar sa kaotoban kan katuyohan nin Dios mapadapit sa Abrahamikong tipan. An gamot kan kahoy banal asin nagrerepresentar ki Jehova bilang an nagtatao nin buhay sa espirituwal na Israel. (Isa. 10:20; Roma 11:16) An hawak kan kahoy nagrerepresentar ki Jesus bilang an pangenot na kabtang kan banhi ni Abraham. Sa kabilogan, an mga sanga nagrerepresentar sa “bilog na bilang” kan mga kaiba sa sekondaryong kabtang kan banhi ni Abraham.
(Roma 11:17) Alagad, kun an nagkapira sa mga sanga pinurutol asin ika, maski saro kang olibo sa kadlagan, isinugpon sa sainda asin nakinabang man sa sustansiyang yaon sa gamot kan olibo,
(Roma 11:20, 21) Totoo iyan! Huli sa kawaran ninda nin pagtubod, pinurutol sinda, alagad ika nakatindog dahil sa pagtubod. Dai ka magin mapalangkaw, kundi matakot ka. 21 Huli ta kun an orihinal na mga sanga ngani dai pinaligtas nin Diyos, dai ka man niya papaligtason.
‘O an Rarom kan Kadonongan nin Dios!’
15 Kun siring, ano an ginibo ni Jehova tanganing otobon an saiyang katuyohan? Ipinaliwanag ni Pablo na an mga sanga nin layas na poon nin olibo isinugpon sa kinultibar na poon nin olibo tanganing isalida sa mga pinutol. (Basahon an Roma 11:17, 18.) Kaya, an linahidan nin espiritu na mga Kristiano na hale sa mga nasyon, arog nin nagkapira sa kongregasyon sa Roma, piguratibong isinugpon sa simbolikong poon na ini nin olibo. Sa paaging ini, sinda nagin kabtang kan banhi ni Abraham. Kan enot, sinda arog nin mga sanga nin layas na olibo na mayo lamang nin oportunidad na magin kabtang kan espesyal na tipan na ini. Alagad tinawan sinda ni Jehova nin oportunidad na magin espirituwal na mga Judio.—Roma 2:28, 29.
(Roma 11:25, 26) Huli ta habo kong dai kamong pakaisi, mga tugang, mapadapit sa sagradong hilom na ini, tanganing dai kamo magin madunong sa sadiri nindong paghiling: Sarong kabtang kan Israel an nawaran nin pakamati, na magdadanay sagkod na makalaog an kumpletong bilang nin mga tawo kan mga nasyon, 26 asin sa paaging ini an bilog na Israel maliligtas. Siring kan nasusurat: “An paraligtas maluwas sa Sion asin hahalion niya sa Jacob an bakong diyosnon na mga gibo.
‘O an Rarom kan Kadonongan nin Dios!’
19 Iyo, an katuyohan ni Jehova dapit sa “Israel nin Dios” naootob sa makangangalas na paagi. (Gal. 6:16) Arog kan sinabi ni Pablo, “maliligtas an bilog na Israel.” (Roma 11:26) Sa itinalaan na panahon ni Jehova, “an bilog na Israel”—na iyo an kompletong bilang kan espirituwal na mga Israelita—magigin mga hade asin saserdote sa langit. Mayo nin makakaolang sa kaotoban kan katuyohan ni Jehova!
Maghanap nin Espirituwal na Kayamanan
(Roma 9:21-23) Ano? Bako daw na an paragibo nin kuron may awtoridad na gumibo nin duwang klaseng lalagan hali sa saro sanang masa nin dalipay, saro para sa espesyal na gamit asin saro man para sa ordinaryo sanang gamit? 22 Kaya, ano man kun kabutan nin Diyos na ipahiling an saiyang kaanggutan saka ihayag an saiyang kapangyarihan, asin ano man kun mapasensiyang marhay niyang tinutugutan na magdanay an mga lalagan na maninigo sa kaanggutan asin nakatagama sa kalaglagan? 23 Asin kun ginibo man ini tanganing ipahiling an kadakulaan kan saiyang kamurawayan sa mga lalagan na maninigo sa pagkahirak, na patiinot niyang inandam para mag-ako nin kamurawayan,
Magpamolde sa Disiplina ni Jehova
5 Paano kun may kasutilan na nagsasayuma an mga tawo na magpamolde sa Dakulang Paragibo nin Kuron? Paano niya ginagamit an saiyang awtoridad bilang Diyos? Isip-isipon an nangyayari sa dalipay kun bako na iyan angay sa katuyuhan para diyan. Iyan puwedeng gibuhon na ibang klase nin lalagan o itapok na sana kan paragibo nin kuron! Pero kun dai na magagamit an dalipay, sa pangkagabsan an paragibo nin kuron an may sala. Dai ini nuarin man nangyayari kun manungod sa satuyang Paragibo nin Kuron. (Deut. 32:4) Kun an sarong tawo dai nagpapamolde ki Jehova, an sala pirming yaon sa tawong iyan. An awtoridad ni Jehova na arog kan sa paragibo nin kuron ginagamit niya sa mga tawo paagi sa pagbago kan saiyang pagtratar sa sainda depende sa reaksiyon ninda sa saiyang pagmolde. An mga may tamang reaksiyon namomolde sa paagi na sinda magigin kapakipakinabang. Halimbawa, an linahidan na mga Kristiyano ‘mga lalagan nin pagkahirak’ na minomolde na magin ‘mga lalagan na makakaumaw’ o may onorableng gamit. Sa ibong na lado, an mga may kasutilan na minakontra sa Diyos nagigin ‘mga lalagan nin kaanggutan na maninigong parasaon.’—Roma 9:19-23.
(Roma 10:2) Huli ta ako makakapagpatotoo na igwa sinda nin kaigutan para sa Diyos, alagad bakong uyon sa tamang kaaraman.
it-1 1260 ¶2
Kaigutan
Salang Klase nin Kaigutan. An sarong tawo tibaad sinsero man talaga sa ipinapahiling niyang kaigutan sa sarong partikular na gibuhon alagad puwedeng sala iyan asin nakakapaanggot sa Diyos. Nangyari iyan sa dakul na Judio kan inot na siglo. Hinihinguwa nindang magin matanos paagi sa sadiri nindang mga gibo sa irarom kan Katugunan ni Moises. Pero ipinahiling ni Pablo na sala an saindang kaigutan huli sa kawaran ninda nin tamang kaaraman. Kaya dai ninda naako an tunay na katanusan na hali sa Diyos. Dapat nindang mahiling na sala sinda asin kaipuhan nindang dumulok sa Diyos paagi ki Cristo tanganing ibilang na matanos asin makatalingkas sa pagkondenar kan Katugunan. (Ro 10:1-10) Arog kaiyan kaidto si Saulo na taga Tarso. Huli sa sobra-sobra niyang kaigutan sa pagsuporta sa Judaismo, “pigparapersegir [niya] nin grabe an kongregasyon nin Diyos asin pigparahinguwang pabagsakon iyan.” Istrikto niyang sinusunod an Katugunan na “pinatunayan an sadiri na daing katuyawan.” (Ga 1:13, 14; Fil. 3:6) Pero an saiyang kaigutan sa Judaismo sarong salang klase nin kaigutan. Huling sinsero an saiyang puso, pinahilingan siya ni Jehova nin daing kapantay na kabuutan paagi ki Cristo sa paggiya sa saiya sa dalan pasiring sa tunay na pagsamba.—1Ti 1:12, 13.
Pagbasa sa Bibliya
(Roma 10:1-15) Mga tugang, tunay nanggad na an minamawot kan sakuyang puso asin an ipinagngangayo-ngayo ko sa Diyos iyo an saindang kaligtasan. 2 Huli ta ako makakapagpatotoo na igwa sinda nin kaigutan para sa Diyos, alagad bakong uyon sa tamang kaaraman. 3 Asin dahil dai ninda aram an pamantayan nin Diyos para sa katanusan kundi gusto nindang magbugtak kan sadiri nindang pamantayan, dai sinda nagpasakop sa pamantayan nin Diyos para sa katanusan. 4 Huli ta natapos an Katugunan paagi ki Cristo, tanganing an siisay man na nagtutubod ibilang na matanos. 5 Nagsurat si Moises manungod sa pagigin matanos paagi sa Katugunan: “An tawong naggigibo kan mga bagay na ini mabubuhay paagi kaiyan.” 6 Alagad manungod sa pagigin matanos na resulta nin pagtubod, arog kaini an sabi: “Dai ka magsabi sa saimong puso, ‘Siisay an masakat sa langit?’ buot sabihon, sumakat duman tanganing ibaba si Cristo, 7 o, ‘Siisay an mababa sa kairaruman?’ buot sabihon, bumaba duman tanganing ibangon si Cristo hali sa mga gadan.” 8 Imbes, ano an sabi kaiyan? “An tataramon harani sa saimo, sa saimo mismong nguso asin sa saimo mismong puso”; an buot sabihon, “an tataramon” mapadapit sa pagtubod, na satuyang ihinuhulit. 9 Huli ta kun hayagan mong ipinapahayag paagi sa saimong nguso na si Jesus Kagurangnan, asin sa saimong puso nagtutubod ka na ibinangon siya nin Diyos hali sa mga gadan, maliligtas ka. 10 Huling sa saiyang puso, an saro nagtutubod para maibilang na matanos, alagad paagi sa nguso an saro hayagan na nagpapahayag para sa kaligtasan. 11 Huli ta sinasabi sa Kasuratan: “An siisay man na siya an sinasarigan kan pagtubod dai makakamati nin pagkasudya sa saiyang linalauman.” 12 Huling mayo nin pagkakalain an Judio asin an Griego. Igwa nin saro sanang Kagurangnan na namamahala sa gabos, na nagtatao nin dakul na bendisyon sa gabos na nag-aapod sa saiya. 13 Huli ta “an gabos na nag-aapod sa ngaran ni Jehova maliligtas.” 14 Alagad, paano sinda maapod sa saiya kun dai sinda nagtutubod sa saiya? Paano man sinda matubod sa saiya kun dai man sindang nadadangog manungod sa saiya? Asin paano man sinda madangog kun mayo nin maghuhulit? 15 Dangan paano man sinda maghuhulit kun dai man sinda isinugo? Siring kan nasusurat: “Kagayon kan mga bitis kan mga nagpapahayag nin maugmang bareta mapadapit sa marahay na mga bagay!”