LEKSIYON 4

Tamang Pag-introdusir sa mga Teksto

Mateo 22:41-45

SUMARYO: Andamon an isip kan mga nagdadangog bago magbasa nin teksto.

Pag-isipan kun taano ta babasahon mo an teksto. Iintrodusir an kada teksto sa paagi na makakatabang sa mga nagdadangog na mahiling an mahalagang punto na gusto mong iduon.

Hilingon an konteksto. Siguraduhon na tama an sasabihon mo dapit sa kun siisay an nagtaram kan nasa teksto o an nagsurat kan partikular na libro sa Bibliya.
Sambiton an Bibliya bilang awtoridad. Kun an mga kaulay mo nagtutubod sa Diyos, sambiton an Bibliya bilang Tataramon nin Diyos. Sa paaging ini, maipapahiling mo na diyan makukua an pinakahalangkaw na klase nin kadunungan.
Pukawon an interes kan kaulay sa tekstong babasahon. Magbangon nin hapot na sisimbagon kan teksto, magsambit nin sarong problema na may itataong solusyon an teksto, o magsabi nin sarong prinsipyo na urog na masasabutan sa babasahon na teksto.

Isipon kun ano an dati nang aram kan mga nagdadangog dapit sa pinag-uulayan asin sa tekstong babasahon. Iintrodusir sa interesanteng paagi dawa an pamilyar na mga teksto, asin tabangan an mga nagdadangog na hilingon iyan sa iba na man na anggulo.