KAHON 20A
An Pagbanga-banga kan Daga
An pagkaladawan sa mga linderos na may eksaktong mga sukol nakaasigurar sa mga nadistiyero na an saindang namumutan na daga siguradong ibabalik. Anong mga leksiyon an manunudan ta ngunyan sa bisyon na ini? Pag-isipan an duwang aspekto kan bisyon:
Siguradong lugar asin mahalagang asignasyon
An kada saro sa mabalik na nadistiyero magkakaigwa nin mana sa ibinalik na Dagang Panuga. Arog man kaiyan ngunyan, an gabos na lingkod ni Jehova igwa nin lugar sa espirituwal na paraiso. Gurano man kasadit kan satong papel sa organisasyon, siguradong igwa kita nin lugar asin nin mahalagang asignasyon sa espirituwal na daga. Para ki Jehova, an gabos na lingkod niya pararehong mahalagang marhay.
Pantay-pantay na mana
Sa bisyon ni Ezekiel, sa kada teritoryo sa ibinalik na Dagang Panuga, igwa nin pantay-pantay na oportunidad na makinabang sa mga bunga kan daga. Arog man kaiyan ngunyan, tinawan ni Jehova an gabos niyang lingkod nin pantay-pantay na oportunidad na makinabang sa mga bendisyon kan espirituwal na paraiso.