LEKSIYON 58
Magdanay na Maimbod ki Jehova
Determinado an tunay na mga Kristiyano na dai pagtugutan an ano man o an siisay man na makapapundo sa saindang pagsamba ki Jehova. Siguradong iyan man an determinasyon mo. Pinapahalagahan ni Jehova an saimong kaimbudan. (Basahon an 1 Cronica 28:9.) Anong mga sitwasyon an puwedeng makapadipisil sa saimo na magdanay na maimbod saiya, asin ano an makakatabang sa saimo para maatubang an mga iyan?
1. Ano an tibaad gibuhon kan iba na puwedeng makapadipisil sa sato na magin maimbod ki Jehova?
May mga tawo na pupurbaran kang papunduhon na maglingkod ki Jehova. Siisay an magibo kan marauton na bagay na iyan? May mga tawo na nagpundo nang maglingkod ki Jehova na nagtataram nin mga pangraraot manungod sa organisasyon nin Diyos tanganing paluyahon an satong pagtubod. Inaapod sindang mga apostata. Igwa man nin mga lider nin relihiyon na nagpapalakop nin bakong totoong mga impormasyon manungod sa sato tanganing papunduhon sa paglilingkod ki Jehova an mga dai nag-iingat asin dai nag-aaram kan peligro. Delikado para sa sato na makipagrasunan sa siisay man na parakontra, na basahon an saindang mga libro o blog, na magduman sa saindang website, o na maghiling kan saindang mga video. Manungod sa mga nagpupurbar na papunduhon an iba sa maimbod na paglilingkod ki Jehova, sinabi ni Jesus: “Pabayai sinda. Mga buta sindang parakabit. Kun tawong buta an makabit sa sarong buta, pareho sindang mahuhulog sa kalot.”—Mateo 15:14.
2. Paano ta maipapahiling sa satong mga desisyon na maimbod kita ki Jehova?
Huling namumutan ta si Jehova, lilikayan ta na magkaigwa nin ano man na koneksiyon sa palsong relihiyon. An satong trabaho, an mga organisasyon na kinabibilangan ta, o an ano man na bagay na ginigibo ta dapat na bakong konektado sa palsong relihiyon. Pinapatanidan kita ni Jehova: “Lumuwas kamo sa [Dakulang Babilonya], banwaan ko.”—Kapahayagan 18:2, 4.
ARAMON PA
Aramon kun paano mo malilikayan na mapaluya nin siisay man an kaimbudan mo ki Jehova. Aramon man kun taano ta pagpahiling nin kaimbudan an pagluwas sa Dakulang Babilonya.
3. Mag-ingat sa palsong mga paratukdo
Ano an dapat tang gibuhon pag nakadangog kita nin negatibong mga bagay manungod sa organisasyon ni Jehova? Basahon an Talinhaga 14:15, dangan pag-ulayan an hapot na ini:
Taano ta dapat na magin maingat kita asin dai tulos magtubod sa ano man na nadadangog ta?
Basahon an 2 Juan 9-11, dangan pag-ulayan an mga hapot na ini:
Ano an dapat na magin pagtrato ta sa mga apostata?
Dawa ngani dai kita direktang nakikipag-ulay sa mga apostata, paano kita puwedeng maimpluwensiyahan kan mga itinutukdo ninda?
Ano sa hiling mo an mamamatian ni Jehova kun madangog kita sa mga pagpakaraot sa saiya o sa saiyang organisasyon?
4. Magdanay na maimbod sa Diyos pag nagkasala an sarong tugang
Kun maaraman ta na nakagibo nin magabat na kasalan an sarong tugang, paninimbagan ta na gibuhon an ano? Pag-isipan an sarong prinsipyo hali sa Katugunan nin Diyos sa suanoy na Israel. Basahon an Levitico 5:1.
Arog kan sinasabi sa bersikulong iyan, kun maaraman ta na nakagibo nin magabat na kasalan an sarong tugang, dapat tang sabihon iyan sa mga elder. Pero bago gibuhon iyan, pagpahiling nin kabuutan kun sasabihan ta nguna an nagkasala na dumulok sa mga elder asin ituga an saiyang kasalan. Kun dai niya iyan gibuhon, an satong kaimbudan ki Jehova mapahiro sa sato na sabihon sa mga elder kun ano an aram ta. Taano ta an paggibo kaiyan pagpahiling nin maimbod na pagkamuot sa . . .
Diyos na Jehova?
tawo na nagkasala?
iba sa kongregasyon?
Kun namemeligro an sarong kapagtubod, tabangan siya!
5. Lumuwas sa Dakulang Babilonya
Basahon an Lucas 4:8 asin Kapahayagan 18:4, 5, dangan simbagon an mga hapot na ini:
Nakalista pa daw an pangaran ko bilang miyembro nin sarong palsong relihiyon?
Miyembro daw ako nin sarong organisasyon na konektado sa ibang relihiyon?
Nagsusuportar daw sa ano man na paagi sa palsong relihiyon an sakong trabaho?
May iba pa daw na aspekto sa sakuyang buhay na konektado sa palsong relihiyon?
Kun iyo an simbag ko sa arin man sa mga hapot na iyan, anong mga pagbabago an dapat kong gibuhon?
Sa ano man na sitwasyon, gumibo nin desisyon na makakatao sa saimo nin malinig na konsiyensiya asin magpapahiling kan saimong kaimbudan ki Jehova.
Ano an gigibuhon mo kun hinahagadan ka nin kontribusyon para sa mga charity nin ibang relihiyon?
MAY MGA NAGSASABI: “Kaipuhan kong maaraman an sinasabi kan mga apostata manungod sa Mga Saksi ni Jehova para maidepensa ko an katotoohan.”
Iyan daw an tamang gibuhon? Taano?
SUMARYO
Tanganing magdanay na maimbod ki Jehova, kaipuhan tang likayan na makiiba-iba sa mga naghihinguwang dayaon kita.
Rebyu
Taano ta dai kita dapat magdangog sa mga ideya kan mga apostata?
Ano an dapat tang gibuhon kun maaraman tang nakagibo nin magabat na kasalan an sarong tugang?
Paano ta masusunod an patanid na lumuwas sa palsong relihiyon?
HILINGON MAN
Aramon kun ano an dapat mong gibuhon pag may nagpapalakop nin bakong totoong impormasyon manungod sa Mga Saksi ni Jehova.
“Tama Daw an mga Impormasyon na Naaaraman Mo?” (An Torrengbantayan, Agosto 2018)
Paano mo maaaraman kun baga an sarong organisasyon o aktibidad nagsusuportar sa Dakulang Babilonya?
Ano an mga ginigibo kan ibang nagkokontra para paluyahon an satong pagtubod?
Sa istorya na “Aki Pa Ako, Hinahanap Ko Na an Dios,” basahon an manungod sa padi nin Shinto na pinutol an saiyang koneksiyon sa palsong relihiyon.
“Binago kan Biblia an Saindang Buhay” (An Torrengbantayan, Hulyo-Setyembre 2011)