Mga Saksi ni Jehova sa New Zealand—Matuninong Asin Debotadong mga Kristiyano?

Kan Oktubre 21, 1940, idineklarar kan New Zealand an Mga Saksi ni Jehova bilang sarong rebeldeng organisasyon asin peligro sa publiko. Sa ibong kan mga kadipisilan na resulta kan deklarasyon na iyan kan gobyerno, dai pinangluyahan nin buot an mga Saksi ni Jehova. Halimbawa, padagos sindang nagtiripon para sa pagsamba dawa namemeligrong laugon asin arestaron kan mga awtoridad.

Narisa ni Andy Clarke an determinasyon kan agom niyang Saksi huling padagos ining nag-aatender sa mga pagtiripon dawa may mga huma. Nahadit siya na tibaad arestaron an agom niya mantang nag-aatender sa mga pagtiripon. Kaya inibanan niya na sana ini sa mga pagtiripon dawa ngani dai niya man iyan ginigibo dati. Sinabi niya ki Mary, “Kun arestaron ka ninda, di arestaron na man ninda ako!” Puon kaidto, inibanan na ni Andy an agom niya sa kada pagtiripon. Pag-abot nin panahon, nagpabawtismo na man siya. Saro lang si Mary sa dakul na Saksi na igwa nin arog kaiyan na determinasyon sa ibong nin persekusyon sa New Zealand kan Giyera Mundiyal II.

Nagpapadagos Dawa Nakapreso

Sarong aldaw, inarestar kan mga pulis an 78 anyos na si John Murray mantang nakikipag-ulay manungod sa Bibliya sa harong-harong. Sinentensiyahan siya kan korte nin pagpartisipar sa mga gibuhon nin sarong rebeldeng organisasyon. Dakul pang ibang Saksi an dinara sa korte; an iba pinamulta, asin an iba man napreso nin sagkod sa tulong bulan.

Dai nagsusuldados an mga Saksi huli sa saindang konsiyensiya na sinanay sa Bibliya. (Isaias 2:4) Bilang resulta, nakakaeksperyensiya sinda nin grabeng mga kadipisilan pag ipinapaapod sinda para sa serbisyo militar. Karibay kan pagsuldados, mga 80 Saksi an iprineso sa mga kampong presuhan sagkod na matapos an giyera. Pero dawa nakapreso, saka sa ibong kan maraot na pagtrato asin grabeng lipot, padagos na maugmang nagsamba ki Jehova an mga tugang na ini.

Nag-organisar tulos an mga Saksi sa mga kampong presuhan na idto nin regular na mga pagtiripon asin paghuhulit. Garo sinda sarong kongregasyon dahil igwa sinda nin regular na mga pagtiripon saka areglo nin paghuhulit sa mga kapwa preso. Tinugutan pa ngani an mga Saksi na magkaigwa nin mga asembleya sa nagkapirang kampo, mantang nakabantay an mga guwardiya. May mga preso na nakanuod nin katotoohan sa Bibliya sa mga kampo asin duman sinda nabawtismuhan.

Nahiling ni Bruce, an kangudhan na aking lalaki ni Mary saka ni Andy na nasambit kasubago, na sarong oportunidad an pagkapreso niya para mas makanuod pa sa Bibliya. Nagigirumduman niya, “Garo ako kaidto malaog sa eskuwelahan, ta sa kampo, makakaulay ko an mas eksperyensiyadong mga tugang asin makakanuod akong marhay sa sainda.”

Kan 1944, papaluwason na kuta an nagkapira sa mga Saksing nakapreso sa mga kampong presuhan. Pero, dai nagtugot an mga opisyal kan militar dahil aram kaya ninda na kun papaluwason an mga Saksi, makakapaghulit na naman sinda sa iba manungod sa saindang pagtubod. Sinabi sa report: “Maski ngani dawa paano puwedeng nakontrol kan presuhan an pagkapanatiko kan mga tawong ini, pero dai lamang iyan makakapabago sainda.”

Bakong Peligro sa Publiko

Huli sa pagbabawal, may mga tawo na nagin interesado manungod sa Mga Saksi ni Jehova. Pag-abot nin panahon, nahiling kan dakul na tawo na bako man talaga sindang peligro sa publiko. Nahiling ninda na mabuot saka matuninong palan na mga Kristiyano an Mga Saksi. Bilang resulta, luminangkaw an bilang kan mga Saksi sa New Zealand–an 320 kan 1939 nagin 536 kan 1945!

Sa parati, nahihiling kan patas na mga opisyal na bakong makatanusan an pagbabawal sa Mga Saksi ni Jehova. Pagkatapos na madangog nin sarong hukom an ebidensiya laban sa sarong tugang na naghuhulit, ibinasura niya an kaso. Sinabi niya: “Sa pagtubod ko saka sa pakasabot ko sa ley, dai ko nanggad maaako na ibilang na sarong krimen an pagdistribwir nin mga kopya kan Bibliya.”

Kan halion na an pagbabawal pagkatapos kan giyera, lalo pang nagin determinado an mga Saksi na tabangan an saindang kapwa na makanuod manungod sa Kahadian nin Diyos. Arog kaini an pagkakasabi sa sarong surat kan 1945 kan sangang opisina para sa gabos na kongregasyon sa New Zealand: “Lugod na an lambang saro magin mataktika, mainamigo, saka mabuot sa gabos. Likayan an mga kontrobersiya asin pakikiargumento. Tandaan na nakagamot sa puso kan mga tawong nakakaulay ta an mga paniniwala ninda asin hinihinguwa nindang isabuhay iyan. . . . Dakul sa sainda an mga ‘karnero’ kan Kagurangnan na kaipuhan tang giyahan pasiring ki Jehova asin sa saiyang kahadian.”

Sa ngunyan, padagos na ipinapaabot kan mga Saksi ni Jehova sa New Zealand an mensahe kan Bibliya sa mga residente duman saka sa mga turista. Sarong beses, nahulitan kan sarong grupo nin apat na Saksi sa Turangi an 67 turista na hali sa 17 nasyon, sa laog sana nin duwang oras!

Nahiling nanggad kan mga tawo sa New Zealand na an Mga Saksi ni Jehova matuninong asin debotadong mga Kristiyano na may dakulang pagpapahalaga sa mga katotoohan sa Bibliya. Ginatos an nababawtismuhan bilang mga Saksi ni Jehova taon-taon. Kan 2019, labing 14,000 na Saksi an maugmang naglilingkod ki Jehova sa nasyon na ini sa timog.