Pagtukdo sa mga Tawo sa Bilog na Kinaban na Magsurat Saka Magbasa

“Nagdakula ako sa sarong uma,” an sabi ni Agostinho, na taga Brazil. “Tios kaming marhay. Kinaipuhan kong magpundo sa pag-eskuwela para magtrabaho asin makatabang sa pamilya.” Nakanuod na magbasa saka magsurat si Agostinho kaidto lang na 33 anyos na siya. “Kan makanuod na akong magbasa saka magsurat, mas nagkaigwa ako nin dignidad saka pagpapahalaga sa sadiri,” an sabi niya.

Saro si Agostinho sa labing 250 mil katawo na tinukduan kan mga Saksi ni Jehova na magbasa saka magsurat sa nag-aging 70 taon. Taano ta ginigibo iyan kan mga Saksi ni Jehova? Paano nakinabang an mga tawo sa arog kaiyan na pagtutukdo?

Nakakaulang na Makanuod

Kan mga kabangaan kan dekada nin 1930, isinasagibo kan mga Saksi ni Jehova an saindang ministeryo sa 115 kadagaan. Para mapaabutan an mga tawong nagtataram nin ibang lengguwahe, nagpi-play an mga misyonero nin pigtradusir na mga pahayag sa Bibliya, asin sa nagkapirang pagkakataon nakapag-alok sinda nin literatura sa lokal na mga lengguwahe. Dakul na tawo an nagin interesadong marhay sa Bibliya, pero dahil dakul sainda an dai tataong magbasa saka magsurat, nakaulang iyan sainda na makanuod.

Dahil dai ninda kayang magsadiring magbasa nin Bibliya, nasakitan sindang iaplikar an mga prinsipyo sa Bibliya. (Josue 1:8; Salmo 1:2, 3) Nagin masakit man saindang utubon an mga paninimbagan ninda bilang Kristiyano. Halimbawa, kun an magurang dai tataong magbasa, mas masakit sainda na tukduan an mga aki ninda. (Deuteronomio 6:6, 7) Asin kun manungod sa bagong mga Saksi na dai tataong magbasa, nalilimitaran an kakayahan nindang gamiton an Bibliya pag nagtutukdo sa iba.

Kampanya sa Pagtutukdo na Magbasa Asin Magsurat

Kan mga dekada nin 1940 asin 1950, si Nathan H. Knorr asin Milton G. Henschel, duwa sa mga nanginginot kaidto sa mga Saksi ni Jehova, nagbiyahe sa manlain-lain na kadagaan para tumabang na organisaron an gibuhon na paghuhulit. Sa mga kadagaan na dakul an dai tataong magbasa asin magsurat, dinagka ninda an mga sanang opisina duman na magbilog sa mga kongregasyon nin mga klase para sa pagbasa asin pagsurat.

An mga sangang opisina nagtao nin instruksiyon sa mga kongregasyon kun paano an pagkondukta sa mga klase. Sa nagkapirang kadagaan, an lokal na gobyerno igwa na nin dating mga programa na puwedeng gamiton. Halimbawa, sa Brazil nakaresibi an sangang opisina nin mga suplay asin textbook hali sa gobyerno dangan ipinadara iyan sa mga kongregasyon. Sa ibang kadagaan, kinaipuhan kan mga Saksi na gumibo nin sadiri nindang programa sa pagbasa asin pagsurat.

Bukas an mga klase para sa mga lalaki asin babayi, mga hoben asin may edad na. An obheto iyo na tukduan sindang makabasa sa sadiri nindang lengguwahe—dawa kun mangangahulugan iyan na nagkapirang lengguwahe an itutukdo sa sarong kongregasyon.

Sarong Programa na Nakakatabang sa mga Tawo

Paano nakinabang an mga tawo sa programang ini? Sarong Saksi sa Mexico an nagsabi: “Ngunyan nasasabutan ko na an kahulugan kan Bibliya, kaya natataros na kaiyan an puso ko. Dahil tatao na akong magbasa, dai na ako gayong naaalangan na makipag-ulay sa mga tawo, saka mas dakul na an napapaabutan ko kan mensahe kan Bibliya.”

An programa dai lang nakatabang na masabutan kan mga tawo an Bibliya. Si Isaac na taga Burundi nag-istorya: “Dahil tatao na akong magbasa saka magsurat, nakanuod ako nin mga kasanayan sa pagtugdok. Nagin karera ko an pagtugdok, asin ngunyan nasa superbisyon ko an darakulang proyekto sa pagtugdok.”

Si Jesusa na taga Peru 49 anyos kan magpuon siyang mag-atender sa klase. “Bilang ina,” an sabi niya, “kaipuhan kong mabasa an mga presyo saka pangaran kan mga barakalon. Kaidto, masakiton ’yan sako. Dahil sa klase na nagtukdo sako na magbasa asin magsurat, mas may kumpiyansa na ako ngunyan pag nagsasaod para sa pamilya ko.”

Sa paglihis nin mga taon, inumaw kan mga opisyal sa manlain-lain na nasyon an ginigibo kan mga Saksi ni Jehova na pagtukdo sa mga tawo na magbasa saka magsurat. Sa ngunyan, nagkokondukta pa man giraray an mga Saksi ni Jehova nin mga klase para sa pagbasa asin pagsurat, gamit an mga programa asin mga kasangkapan na nagin mas epektibo pa sa paglihis nin mga taon. Nagdisenyo saka nag-imprenta man sinda nin haros 224 milyon na brosyur sa 720 lengguwahe para tabangan an mga tawo na makanuod na magbasa o tabangan an mga dai gayong nakapag-eskuwela.a