HAPOT KAN MGA HOBEN
Ano an Dapat Kong Maaraman Manungod sa Multitasking?
Matibay ka daw mag-multitask?
Kaya mo daw mag-multitask—sarabay na ginigibo an nagkapirang bagay? Iniisip nin dakul na mas matibay mag-multitask an mga tawong aki pa lang naggagamit na nin teknolohiya—inaapod kun minsan na mga “digital native”—kisa sa mga “digital immigrant,” o mga nakanuod maggamit nin teknolohiya kan adulto na sinda. Pero totoo daw talaga iyan?
TAMA o SALA?
Kun ma-multitask ka, mas marikas mong matatapos an mga gibuhon.
Kun purupirmi kang nagmu-multitask, magigin mas matibay ka diyan.
Mas matibay mag-multitask an mga hoben kisa sa mga may edad na.
Kun “tama” an simbag mo sa arin man sa mga nasa itaas, tibaad napaniwala ka na kan salang paghuna kan mga tawo manungod sa multitasking.
Salang paghuna manungod sa multitasking
Kaya mo daw talagang sabay na gibuhon an duwang bagay? May nagkapirang gibuhon na tibaad kaya mong pagsabayon na dai nawawara an pokus mo. Halimbawa, kun nagdadangog ka nin musika mantang naglilinig kan kuwarto mo, posibleng malilinigan mo man iyan nin tultol.
Pero pag pinagsasabay mo an duwang gibuhon na nangangaipo nin pokus, posibleng marhay na pareho iyan dai mo magigibo nin tultol. Tibaad iyan an dahilan kaya an hoben na si Katherine arog kaini an pakahulugan sa multitasking: “Ini an kakayahan na sabay-sabay mong magibo nin sarala an mga gibuhon.”
“May kaulay ako tapos may nag-text sako na kaipuhan kong i-reply. Pigpurbaran kong pagsabayon iyan. An nangyari, dai ko nadangog su kadaklan kan sinabi kan kaulay ko saka sarala na su ispeling kan text ko.”—Caleb.
Isinurat kan eksperto sa teknolohiya na si Sherry Turkle: “Pag sa hiling ta nakakapag-multitask kita, . . . nababawasan an pagigin epektibo ta sa kada may idinadagdag kita sa satong ginigibo. Pag nagmu-multitask kita, nagigin aktibo an satong hutok kaya paghuna ta mas nagigin epektibo kita sa ginigibo ta, pero an totoo lalo kitang dai nagigin epektibo.”a
“Kun minsan, iniisip ko na kaya kong mag-text mantang may kaulay ako, pero idto palan, naitaram ko na su dapat na ite-text ko tapos su sasabihon ko sa kaulay ko, iyo na su nai-text ko!”—Tamara.
Pag an mga tawo nagmu-multitask, pinapasakitan lugod ninda an sadiri ninda. Halimbawa, mas nahahaloy lugod sindang matapos sa assignment ninda. O tibaad kaipuhan lugod nindang utruhon an sarong trabaho na paghuna ninda tapos na. Arin man diyan, an mga nagmu-multitask mas dikit na lang lugod an panahon para sa mga bagay na gusto nindang gibuhon!
Tama sana an sinabi kan psychotherapist saka school counselor na si Thomas Kersting: “Kun an satong hutok ikukumparar ta sa file cabinet na organisadong nagsasaray nin kinakaipuhan na impormasyon, an hutok kan mga pirming nagmu-multitask baralanggado an laog.”b
“Mantang mas dakul kang ginigibo nin sarabay, mas dakul man na detalye an nalilipasan mo. An resulta, nagdakul pa lugod an trabaho mo saka nasayang lang an panahon na sa paghuna mo natipid mo.”—Teresa.
An pagmu-multitask garo pagmaneho sa duwang tinampo nin sabay
An mas marahay na paagi
Sanayon an sadiri na magpokus sa saro sana ngunang gibuhon. Tibaad masakit iyan, lalo na kun sanay ka nang pagsarabayon an mga ginigibo mo—halimbawa, nagte-text mantang naggigibo nin assignment. Pero sinasabi sa sato kan Bibliya na ‘siyertuhon kun ano an mas importanteng mga bagay.’ (Filipos 1:10) May mga gibuhon na mas importante kisa sa iba. Kaya pag-isipan kun arin an iinuton mo, tapos diyan ka lang magpokus sagkod na matapos mo iyan.
“An isip na dai makapagpokus garo sadit na aki; kun minsan dapat mong sabihan ini na dai, dawa mas madali kuta na pabayaan mo na lang ini na gibuhon an gusto kaini.”—Maria.
Halion an mga nakakadisturbo. Dai mo daw mapugulan na maghiling sa cellphone mo mantang nag-aadal ka? Ilaag mo iyan sa ibang kuwarto. Gadanon mo an TV, asin lingawan mo nguna an social media! Sinasabi kan Bibliya na ‘gamiton sa pinakamarahay an saindong panahon.’—Colosas 4:5.
“Mas magayon palan talagang magpokus lang nguna ako sa saro sanang gibuhon. Mas maugma pa ngani ako pag pinapara ko na iyan sa listahan ko nin mga gigibuhon tapos duman na man ako sa sunod na gigibuhon. Kontento talaga ako sa ginigibo ko.”—Onya.
Magdangog na marhay sa kaulay mo. Kun sige kang hiling sa cellphone mo mantang may kaulay ka, dai kamo magkakaintindihan kan kaulay mo saka daing modo iyan. Sinasabi sa sato kan Bibliya na gibuhon ta sa iba kun ano an gusto tang gibuhon ninda sa sato.—Mateo 7:12.
“Kun minsan, pag kaulay ko an tugang ko, nagte-text siya o may ginigibo sa cellphone niya. Suyaon ako! Pero an totoo, ginigibo ko man ‘yan minsan!”—David.