Paano Ko Babadyeton an Oras Ko?

• Taano ta marahay na badyeton mo an oras mo?

• An puwede mong gibuhon

• An sinasabi kan ibang tin-edyer

Taano ta marahay na badyeton mo an oras mo?

• An oras garo kuwarta. Kun sasayangon mo iyan, mayo ka nang magagamit pag kinaipuhan mo na iyan. Pero kun babadyeton mo an saimong oras, may matatada saimo para sa mga bagay na ikinakaugma mong gibuhon!

  Prinsipyo sa Bibliya: ‘Maski ano an mawuton kan hugakon, dai niya iyan makakamtan. Nakakamtan kan mahigos an saiyang kamawutan.’—Talinhaga 13:4, BPV.a

  Tandaan: Kun babadyeton mo an oras mo, imbes na mabawasan an libreng panahon mo, madadagdagan iyan.

• Kun mahusay kang magbadyet nin oras, kapaki-pakinabang iyan na marhay pag magin adulto ka na. Puwede pa nganing magdepende diyan kun baga magdadanay o masisisante ka sa trabaho. Ta siyempre, kun halimbawang may negosyo ka, pagdadanayon mo daw an empleyado na parating huring maglaog sa trabaho?

  Prinsipyo sa Bibliya: “An tawong maimbod pag-abot sa sadit na bagay maimbod man pag-abot sa dakulang bagay.”—Lucas 16:10.

  Tandaan: An kakayahan mo sa pagbadyet nin oras nagtatao nin indikasyon kun anong klaseng tawo ka.

Pero siyempre, bakong pasil an pagbadyet nin oras. Pag-isipan an pira sana sa mga ulang.

Ulang #1: Mga Amigo

“Pag inaagda ako kan mga friends ko, haros pirmi ko sindang pigpapaonrahan dawa dai talaga iyan kaya kan iskedyul ko. Iniisip ko, ‘Ay kaya ko man hidalion pagpuli su mga gigibuhon ko.’ Pero minsan dai ko iyan nagigibo, kaya nagkakaproblema talaga ako.”—Cynthia.

Ulang #2: Mga Pandisturbo

“An TV garo vacuum cleaner. Hihigupon ka kaiyan paagi sa mga show saka mga pelikula na dipisil talagang palampason.”—Ivy.

“Dakul akong nasasayang na oras sa paggamit nin tablet. Nakakakonsensiya pag minsan na nagpupundo lang ako kun gadan na an battery.”—Marie.

Ulang #3: Pagpaliman-liman

“Pinapaliman-limanan ko an mga assignment ko saka an iba pang mga bagay na kaipuhan kong tapuson. Sinasayang ko an oras ko sa bakong mahalagang mga bagay sagkod na deadline na palan kan assignment ko—bako talagang magayon na halimbawa ’yan nin pagbadyet sa oras.”—Beth.

An puwede mong gibuhon

1. Ilista an mga kaipuhan mong gibuhon. Halimbawa kaiyan an mga gibuhon sa harong asin assignment. Isurat kun gurano kadakul na panahon an kaipuhan mo para matapos an lambang gibuhon sa laog nin sarong tipikal na semana.

   Prinsipyo sa Bibliya: ‘Siyertuhon nindo kun ano an mas importanteng mga bagay.’—Filipos 1:10.

2. Ilista an mga aktibidad na gusto mong gibuhon sa libreng mga oras mo. Halimbawa kaiyan an pag-social network asin pag-TV. Sa giraray, isurat kun gurano kadakul na panahon an ginagamit mo sa mga iyan sa laog nin sarong tipikal na semana.

   Prinsipyo sa Bibliya: “Padagos na maglakaw na may kadunungan . . . , na ginagamit sa pinakamarahay an saindong panahon.”—Colosas 4:5.

3. Gumibo nin plano. Balikan an duwang listang ginibo mo. Igong panahon daw an naitao mo sa importanteng mga gibuhon? Kaipuhan mo daw na bawasan an oras na ginagamit mo sa paglilibang?

   Tip: Gumibo nin lista kan mga gigibuhon mo sa kada aldaw. Lagan nin check an lambang natatapos mo.

   Prinsipyo sa Bibliya: “An mga plano kan mahigos siguradong magigin mapanggana.”—Talinhaga 21:5, NW.

4. Isagibo an plano. Iyo, kakaipuhanon mo kun minsan na magsayuma sa mga imbitasyon para magibo mo an importanteng mga bagay. Pero sa pangkagabsan, mahihiling mo na mas dakul kang libreng panahon—asin lalo mo iyan na ikakaugma.

   Prinsipyo sa Bibliya: “Magin mahigos, dai pagparapaliman-limanan an saindong trabaho.”—Roma 12:11, nota sa ibaba.

5. Maglibang man pero pagkatapos na kan gabos na gigibuhon mo. “Minsan, tatapuson ko an duwa sa mga nakalista kong gigibuhon,” sabi kan hoben na si Tara, “dangan maiisip ko, ‘Ayos, ma-TV nguna ako nin 15 minutos tapos ipapadagos ko na su ginigibo ko.’ Kaso an 15 minutos nagigin 30, tapos su 30 nagigin sarong oras, sagkod na duwang oras na palan su nasayang ko sa pag-TV!”

   Ano an solusyon? Ibilang an paglilibang na premyo mo sa sadiri mo dahil natapos mo an mga gibuhon mo—bako bilang sarong bagay na dai dapat mawara sa aldaw mo.

   Prinsipyo sa Bibliya: ‘Mayo nin [mas] marahay para sa sarong tawo kundi an mag-ugma sa saiyang pinagalan.’—Parahulit 2:24, BPV.