HAPOT KAN MGA HOBEN
Paano Makakatabang sa Sako an Bibliya?—Part 2: Kun Paano Gigibuhon na Nakakaugma an Pagbasa nin Bibliya
“Puwedeng magin nakaka-boring an pagbasa nin Bibliya,” an sabi nin sarong tin-edyer na si Will, “kun dai mo aram an tamang paagi nin pagbasa kaiyan.”
Gusto mong maaraman an sekreto tanganing magin nakakaugma an pagbasa nin Bibliya? Makakatabang sa saimo an artikulong ini.
Gibuhon na buhay na buhay an mga istorya sa Bibliya
Tanganing magin buhay na buhay an pagbasa mo, puwede mong gibuhon an minasunod:
Pumili nin sarong istorya sa Bibliya na gusto mong pag-adalan. Puwede iyan na sarong pangyayari sa Bibliya o sarong kabtang kan Ebanghelyo, o puwede kang pumili nin sarong istorya sa dramatikong mga pagbasa sa Bibliya na nasa jw.org/bcl.
Basahon an istorya sa Bibliya. Puwede mong basahon iyan na ika sana, o puwede mo iyan na basahon nin makusog kaiba kan mga amigo o kapamilya mo. An saro puwedeng mag-narrator mantang an iba iyo an mga karakter.
Purbaran an saro o labi pa sa minasunod na mga suhestiyon:
Magdrowing nin mga ritrato na nagpapahiling kan istorya. O magdrowing nin storyboard—simpleng mga ritrato na nagpapahiling kan pagkasunod-sunod kan mga pangyayari. Maggamit nin mga caption para ipaliwanag an lambang eksena.
Gumibo nin mga diagram. Halimbawa, mantang nagbabasa ka mapadapit sa sarong maimbod na karakter, ikonektar an mga kuwalidad asin ginibo kan tawong iyan sa mga bendisyon na nakamtan niya.
Gibuhon na garo bareta an istorya. Ireport an sarong eksena sa manlain-lain na anggulo, asin “interbiyuhon” an panginot na mga karakter asin mga saksi.
Kun an sarong karakter sa istorya nakagibo nin bakong madunong na desisyon, mag-isip nin lain na katapusan kan istorya. Halimbawa, an pagnigar ni Pedro ki Jesus. (Marcos 14:66-72) Ano kuta an mas marahay na ginibo ni Pedro kan nasa dipisil siyang sitwasyon?
Kun gusto mo nin medyo naiiba, puwede kang magsurat nin sadiri mong istorya base sa sarong istorya sa Bibliya. Iiba an mga manunudan sa istoryang iyan.—Roma 15:4.
Puwede mong gibuhon na buhay na buhay an mga istorya sa Bibliya!
Mag-research!
Kun hihilingon mong marhay an mga detalye, puwede mong madiskubre an nakatagong mga kayamanan sa sarong istorya. Sa katunayan, kun minsan dakul kang manunudan maski sa saro o duwang tataramon sa sarong istorya kan Bibliya.
Halimbawa, ikumparar an Mateo 28:7 sa Marcos 16:7.
Taano ta iiniba ni Marcos an detalye na madali nang magpahiling si Jesus sa mga disipulo “asin ki Pedro”?
Clue: Dai mismo nahiling ni Marcos an mga pangyayaring ini; minalataw na nakua niya an impormasyon na ini ki Pedro.
Leksiyon: Taano ta siguradong nakapakusog sa buot ni Pedro na madangog na gusto ni Jesus na mahiling siya giraray? (Marcos 14:66-72) Paano pinatunayan ni Jesus na tunay siyang amigo ni Pedro? Paano ka magigin tunay na amigo sa iba arog ni Jesus?
Kun gigibuhon mong buhay na buhay an Kasuratan asin tatawan nin atensiyon an mga detalye kaiyan, magigin mas nakakaugma nanggad an pagbasa nin Bibliya!