Mga Proyekto sa Pagtugdok na Natapos Bago an Pandemya

Dahil ribo-ribo an nababawtismuhan kada taon, kaipuhan ta nin mas dakul na teokratikong pasilidad. Huli kaiyan, an mga Local Design/Construction Department sa manlain-lain na parte kan kinaban nagplano na magtugdok o mag-renovate nin labing 2,700 na lugar nin pagsamba durante kan 2020 na taon nin paglilingkod.a

Kaso, naapektaran kan pandemyang COVID-19 an mga planong iyan. Tanganing maprotektaran an satong mga tugang asin masunod an mga regulasyon kan gobyerno, ipinundo nguna kan Publishing Committee kan Namamahalang Grupo an kadaklan sa mga proyekto sa pagtugdok sa bilog na kinaban. Dawa arog kaiyan, durante kan 2020 na taon nin paglilingkod, labing 1,700 na lugar nin pagsamba an naitugdok asin na-renovate bago an pandemya. Apuwera kaiyan, labing 100 na darakulang proyekto sa mga sangang opisina an natapos. Hilingon kun paano nakatabang sa mga tugang an duwang proyektong natapos.

Sangang opisina sa Cameroon. An dating sangang opisina, na nasa Douala, saditon saka kaipuhan nin dakulon na renovation. Pinag-isipan kan Publishing Committee na i-renovate an sangang opisina, pero an gagastuson kaya para diyan mas dakula pa kisa sa kantidad kan mga pasilidad. Pinag-isipan man ninda kun magtugdok na lang sa sarong bagong lokasyon o magbakal nin haman nang pasilidad tapos i-renovate na sana iyan, pero dai nangyari an arin man diyan.

Dangan, naaraman kan mga tugang na an lokal na gobyerno magibo sa norte kan Duoala nin tinampo harani sa saro sa satong mga Assembly Hall. Dahil sa tinampo, magigin mas pasil iyan na madumanan asin maabot nin linya nin kuryente, tubig, asin iba pang mahalagang mga pangangaipo. Iyan mismo an kaipuhan kan sangang opisina. Kaya inaprubaran kan Namamahalang Grupo an pagtugdok nin bagong sangang opisina sa sarong seksiyon kan daga na sakop kan Assembly Hall.

Nagtinarabangan sa proyekto an mga Saksi asin an mga kontraktor kaya nakatipid nin panahon asin kuwarta. Sa katunayan, nakatipid kita nin labing duwang milyon na dolyar (U.S.)! Nakalipat an pamilyang Bethel sa bagong pasilidad dai nahaloy bago an biglang pagpuon kan COVID-19.

Nakinabang an mga Bethelite sa Cameroon dahil sa mas komportableng istaran asin lugar nin trabaho, saka para sainda regalo hali ki Jehova an bagong sangang opisina. Sinabi nin sarong mag-agom, “Dahil sa regalong ini, gusto ming mas magmaigot saka ipahiling na mahalagang marhay iyan samo.”

Tojolabal Remote Translation Office (RTO), Mexico. Sa laog nin dakul na taon, sa sangang opisina sa Central America harani sa Mexico City nagtatrabaho an Tojolabal translation team. Pero panginot nang tinataram an lengguwaheng Tojolabal sa Altamirano asin sa Las Margaritas na haros 1,000 kilometro an rayo! Kaya masakit para sa mga paratradusir na makasabay sa mga pagbabago sa lengguwaheng Tojolabal. Asin nasasakitan an sangang opisina na makahanap nin haraning mga tugang na kuwalipikadong tumabang sa pagtradusir asin pagrekord nin audio sa lengguwaheng Tojolabal.

Huli kaiyan, gusto kan Writing Committee kan Namamahalang Grupo na ilipat an translation team sa sarong lugar na nagtataram nin Tojolabal. Para magibo iyan, nagdesisyon an sangang opisina na bakalon asin i-renovate an sarong pasilidad. Mas tipid iyan kisa magtugdok o mag-arkila nin mga opisina.

Inistorya nin sarong paratradusir kun paano siya nakinabang: “Sa sampulong taon ko bilang paratradusir sa sangang opisina, mayo lamang akong nanumpungan maski sarong pamilya sa harani na nagtataram kan lengguwahe ko. Ngunyan an opisina mi nasa mismong lugar kun sain tinataram an Tojolabal. Aroaldaw akong may nakakaulay na mga nagtataram nin Tojolabal. Kaya mas naghiwas an bokabularyo ko saka mas naggayon an kalidad kan trabaho ko.”

Mga Proyekto Para sa 2021 na Taon nin Paglilingkod

Para sa 2021 na taon nin paglilingkod, nakaplanong trabahuhon an 75 RTO asin an mga pasilidad para sa mga paadalan sa Bibliya, kun itutugot kan kamugtakan. Ipapadagos an walong darakulang proyekto sa pagtugdok sa mga sangang opisina, kaiba na an bagong proyekto nin pagtugdok kan world headquarters sa Ramapo, New York, pati man an paglipat sa ibang lugar kan mga sangang opisina sa Argentina asin Italia. Dugang pa, labing 1,000 bagong Kingdom Hall an kaipuhan, labing 6,000 na lugar na pagtitiripunan an bako nang komportable asin kaipuhan nang baguhan, asin 4,000 na Kingdom Hall an kaipuhan na i-renovate.

Sain hali an pondo para sa gabos na proyektong ini nin pagtugdok asin pag-renovate? Sinimbag ni Brother Lázaro González, sarong miyembro kan Komite Kan Sangay sa Sentral Amerika an hapot na ini mantang pinag-uulayan an proyekto para sa Tojolabal Remote Translation Office. “Limitado an pinansiyal na kakayahan kan teritoryo kan sangay mi. Kaya kun mayo an suporta kan bilog na asosasyon nin mga tugang, imposible na makatugdok nin mga translation office para sa mga kapagtubod tang katutubo. Dahil sa mga pondong itinatao kan mga tugang sa bilog na kinaban, nagin posible na maparani an mga paratradusir sa mga komunidad na itinataram an lengguwahe ninda. Gusto ming ipaabot an samong udok sa pusong pasasalamat sa satong pambilog na kinaban na kasararuan nin magturugang dahil sa bukas-palad nindang pagsuporta.” Iyo, nagin posible an mga proyektong ini sa pagtugdok huli sa mga donasyon nindo sa pambilog na kinaban na gibuhon, na an dakul diyan ginibo paagi sa donate.jw.org.