Kabtang 1
An Dios daw Talagang May Pagmakolog sa Sato?
1, 2. Ano an ihinahapot nin mga tawo manongod sa Dios, asin taano?
MAY panahon sa buhay nindo na tibaad naghapot kamo: ‘Kun may Dios na talagang nagmamakolog sa sato, taano ta itinotogot nia an makuring kasakitan?’ Kita gabos nakaeksperyensia na nin kasakitan o may midbid na nakaeksperyensia na kaiyan.
2 Tunay na sa bilog na kasaysayan an mga tawo nagtios nin kolog asin kakologan sa puso huli sa guerra, karingisan, krimen, inhustisya, kadukhaan, helang, asin kagadanan nin mga namomotan. Sa satuya sanang ika-20 siglo, an mga guerra guminadan nin labing 100 milyones katawo. An ginatos na milyon pa nalugadan o nawaran nin harong asin mga rogaring. Kadakol na grabeng mga bagay an nangyari sa satong panahon, na nagbunga nin makuring kamondoan, dakol na luha, asin kadaihan nin paglaom kan dai mabilang na mga tawo.
3, 4. Ano an saboot nin dakol manongod sa pagtogot nin Dios sa kasakitan?
3 An iba minapait an boot asin naghohona na kun may Dios, sia daing pagmakolog sa sato. O tibaad maghona pa ngani sinda na mayo nin Dios. Halimbawa, an sarong tawo na nagtios nin paglamag huli sa rasa na dahelan kan pagkagadan nin mga katood asin pamilya kan Guerra Mundial I naghapot: “Haen an Dios kan sia kaipuhan mi?” An saro pa, na natadang buhay sa paggadan kan mga Nazi sa minilyon kan Guerra Mundial II, ikinamondong marhay an kasakitan na naheling nia kaya sia nakasabi: “Kun madidilaan mo an puso ko, maiilo ka kaiyan.”
4 Kaya, dakol an dai nakasasabot kun taano an sarong marahay na Dios ta itinotogot na mangyari an maraot na mga bagay. Pinagdududahan ninda kun baga sia talagang nagmamakolog sa sato o kun baga sia nabubuhay nanggad. Asin an dakol sa sainda naghohona na an kasakitan magdadanay na kabtang kan buhay nin tawo.
[Ritrato sa pahina 2, 3]
Harani na daw an sarong bagong kinaban na daing kasakitan?