Pagresolber sa mga Dai Pagkakasundo sa mga Bagay-Bagay sa Negosyo

Sono sa nakasurat sa 1 Corinto 6:1-8, tinokar ni apostol Pablo an mga pag-arasuntohan nin mga magkapagtubod. Ipinahayag nia an saiyang grabeng pagkamondo na an nagkapirang Kristiano sa Corinto ‘nangahas na dumolok sa hokoman sa atubangan nin mga tawong bakong matanos.’ (Bersikulo 1) Nagtao si Pablo nin balidong mga dahelan kun taano ta an mga Kristiano dai maninigong mag-arasuntohan sa sekular na mga korte kundi imbes husayon an mga dai pagkakasundo sa laog kan kongregasyon. Pag-olayan niato an nagkapira sa mga dahelan kun taano ta itinao an ipinasabong na hatol na ini dangan estudyaran niato an nagkapirang situwasyon na dai man talaga sakop kan direktibang ini.

Kun kita asin an sarong kapagtubod dai nagkakasundo sa negosyo, enot sa gabos, hihingoahon niato na husayon an mga bagay-bagay kaoyon kan paagi ni Jehova, bakong kan sadiri niatong paagi. (Talinhaga 14:12) Siring kan ipinaheling ni Jesus, pinakamarahay na husayon tolos an sarong dai pagkakasundo bago iyan magin dakulang isyu. (Mateo 5:23-26) Pero, makamomondo na may mga Kristiano na nagin sobra kaparapakisuhay, na dinadara pa ngani an mga dai pagkakasundo sa sekular na mga korte. Si Pablo nagsabi: “Nangangahulogan nin biyong kadaogan nindo na kamo nag-aarasuntohan.” Taano? An pangenot na dahelan iyo na an siring na legal na mga aksion puedeng magtao nin bakong marahay na impresyon sa reputasyon kan kongregasyon asin kan Dios na sinasamba niato. Kun siring, isinasapuso niato an hapot ni Pablo: “Taano ta dai na sana nindo pabayaan na kamo pagkasalaan?”​—Bersikulo 7.

Si Pablo nangatanosan man na an Dios nagtao sa kongregasyon nin marahayon na areglo para sa paghusay sa dakol na dai pagkakasundo. An kamagurangan mga Kristiano na pinagin madonong kan saindang kaaraman sa mga katotoohan na sono sa Kasuratan, asin sinabi ni Pablo na sinda “makakahokom sa pag-oltanan kan . . . mga tugang” kun mapadapit sa “mga bagay sa buhay na ini.” (Bersikulo 3-5) Ipinaheling ni Jesus na an mga dai pagkakasundo na may kalabot na magabat na mga sala, siring kan pagpakaraot asin pandadaya, maninigong husayon oyon sa proseso na may tolong lakdang: enot, maghingoang husayon sa pribado an problemang iyan sa pag-oltanan kan mga kalabot; ikaduwa, kun dai magin mapanggana an enot na lakdang, magdara nin saro o duwang testigo; asin ikatolo, kun dai magin mapanggana an sinusundan na lakdang, darahon an bagay na iyan sa kongregasyon na irinerepresentar kan kamagurangan.​—Mateo 18:15-17.

Siempre, an Kristianong kamagurangan bako man talagang mga abogado o negosyante asin dai sinda kaipuhan na umakto bilang siring. Bako sinda an magtatao nin mga kondisyon sa paghusay sa mga dai pagkakasundo sa negosyo sa pag-oltanan nin magturugang. Imbes, naghihingoa sindang tabangan an gabos na kalabot na iaplikar an Kasuratan asin magkaoroyon sa matoninong na pagresolber. Sa komplikadong mga kamugtakan, tibaad gusto nindang konsultahon an paraataman sa sirkito o an sangang opisina kan Mga Saksi ni Jehova. Minsan siring, may mga situwasyon na dai man talaga sakop kan hatol ni Pablo. Ano an nagkapira sa mga ini?

Sa nagkapirang kamugtakan, an asunto tibaad sarong simpleng pormalidad o legal na kahagadan tanganing magibo an matoninong asin bakong maimot na mga katuyohan. Halimbawa, an asunto tibaad iyo an solamenteng paagi tanganing makapagdiborsio, makakua nin legal na deretso sa pag-ataman sa aki, madeterminaran kun gurano an isusustento, makakua nin bayad hale sa seguro, makaiba sa listahan nin mga babayadan (creditor) sa kaso nin pagkabangkarote, asin maberepikar sa husgado an mga testamento. May mga kamugtakan man na an sarong Kristiano tibaad mapiritan na magkontra demanda tanganing protehiran an saiyang sadiri sa saryo kan ipinasabong na hatol ni Pablo.a Minsan siring, an maninigong ipaorog nin sarong Kristiano iyo an pagpakangbanal kan ngaran ni Jehova asin an katoninongaong asunto.b

Kun an siring na mga asunto ginigibo na mayo nin espiritu nin iriwal, puedeng dai man binabalga kaiyan an prinsipn saka pagkasararo kan kongregasyon. An mga parasunod ni Cristo pangenot na mamimidbid huli sa saindang pagkamoot, asin an “pagkamoot . . . dai naghahanap kan sadiring kapakanan kaiyan.”​—1 Corinto 13:4, 5; Juan 13:34, 35.