“Pinagmamasdan Ko an mga Buhay na Linalang”

Siguradong nahiling ni Ezekiel an mga darakulaon na estatuwa nin torong baka asin leon na may mga pakpak saka payo nin tawo na nakatindog bilang mga bantay sa atubangan kan mga palasyo asin templo. An arog kaiyan na mga estatuwa mahihiling sa suanoy na Asiria saka Babilonia. Arog kan gabos na nakakahiling kaiyan, siguradong napaturuhok si Ezekiel sa nakakatakot na mga linalang na ini, na an iba haros mga anom na metro an langkaw. Pero maski garo makapangyarihan na marhay paghilingon, an mga iyan mayo nin buhay asin inukit sana hali sa gapo.

Sa kabaliktaran, an apat na linalang na nahiling ni Ezekiel sa bisyon mga “buhay na linalang.” Dakulaon nanggad na pagkakaiba! Dakula an nagin epekto kaini ki Ezekiel mala ta sinambit niya an mga “buhay na linalang” nin 11 beses sa kapinunan kan saiyang propesiya. (Ezek. 1:5-22) Kan mahiling ni Ezekiel an apat na buhay na linalang na sararong naghihiro sa irarom kan trono nin Diyos, siyertong mas napakusog kaiyan an pagtitiwala niya na si Jehova igwa nin lubos na kontrol sa gabos na linalang. Huli sa bisyon na iyan, napapahanga kitang marhay sa kadakulaan asin kakusugan ni Jehova saka sa kabantugan kan saiyang soberaniya.—1 Cron. 29:11.